ଭୁବନେଶ୍ୱର,୨୪ା୧୧(ବ୍ୟୁରୋ)- ଅତ୍ୟାବଶ୍ୟକ ସାମଗ୍ରୀ ପିଆଜ ଦର ବୃଦ୍ଧି ଗରିବ, ନିମ୍ନ ମଧ୍ୟବିତ୍ତ ପରିବାର ମୁଣ୍ଡରେ ଚଡ଼କ ପକାଇଛି। ପ୍ରତ୍ୟେକ ଦିନ ଦର ବଢ଼ି ବଢ଼ି ଚାଲଛି । ବଜାରରେ ଏହାର ଖୁଚୁରା ଦର ୯୦ରୁ ୧୦୦ ଟଙ୍କା ଛୁଇଁଲାଣି। ଘରଖର୍ଚ୍ଚ ପାଇଁ କିଲୋ ଜାଗାରେ ଅଢ଼େଇଶ କିମ୍ବା ଅଧା କେଜିରେ କାମ ଚଳାଇବାକୁ ପଡୁଛି। ଏହି ଦର ବୃଦ୍ଧିକୁ ନେଇ ସାଧାରଣ ଖାଉଟି ହନ୍ତସନ୍ତ ହେଉଛନ୍ତି। ଖୁଚୁରା ବ୍ୟବସାୟୀଙ୍କ ଉପରେ ନିୟନ୍ତ୍ରଣ ନ ଥିବାରୁ ସେମାନେ ମନଇଚ୍ଛା ଦର ବଢ଼ାଇ ଗ୍ରାହକଙ୍କୁ ଶୋଷଣ କରୁଥିବା ଅଭିଯୋଗ ହେଉଛି। ଗତ ଦୁଇମାସ ହେବ ପିଆଜ ଦର ବଢ଼ି ଚାଲିଛି। ତେବେ ଆସନ୍ତା ଦିନେ ଦୁଇଦିନ ମଧ୍ୟରେ ଦର ତଳକୁ ଖସିବ। ମିଳିଥିବା ସୂଚନା ଅନୁଯାୟୀ, ଆନ୍ଧ୍ରରୁ ନୂଆ ପିଆଜ ଓଡ଼ିଶା ଆସିବା ଆରମ୍ଭ ହୋଇଗଲାଣି। ଗତ ୧୫ ଦିନ ହେବ ଭୁବନେଶ୍ୱରକୁ ମାତ୍ର ୧୦୦ରୁ ୧୨୦ ଟନ୍ ପିଆଜ ଆମଦାନୀ ହେଉଥିଲା। ତେବେ ରବିବାର ୨୨୦ ଟନ୍ ପିଆଜ ଆସି ପହଞ୍ଚତ୍ଛି। ରବିବାର ନୂଆ ପିଆଜର ହୋଲ୍ସେଲ୍ ଦର ୬୫ରୁ ୭୦ ଟଙ୍କା ମଧ୍ୟରେ ରହିଥିବା ବେଳେ ପୁରୁଣା ପିଆଜ ୮୦ରୁ ୮୫ ଟଙ୍କା ରହିଛି। ତେବେ ନୂଆ ପିଆଜ ଆସିବା ଆରମ୍ଭ ହୋଇଥିବାରୁ ଦର ତଳକୁ ଖସିବ ବୋଲି ଆଇଗିଣିଆ ବ୍ୟୟସାୟୀ ସଂଘର ସାଧାରଣ ସମ୍ପାଦକ ଶକ୍ତିଶଙ୍କର ମିଶ୍ର କହିଛନ୍ତି। ତେବେ ପ୍ରଥମ ସପ୍ତାହରେ ୫ରୁ ୧୦ ଟଙ୍କା କିଲୋ ପିଛା କମିବ। ଅଧିକ ପିଆଜ ଆମଦାନୀ ଆରମ୍ଭ ହୋଇଗଲେ ଧୀରେ ଧୀରେ ପିଆଜ ଦର ତଳକୁ ଖସିଯିବ ବୋଲି ସେ ଆଶା ରଖିଛନ୍ତି।
