ଭୁବନେଶ୍ୱର,୨୬।୭(ବ୍ୟୁରୋ) : କଟକରେ ଫୁଟ୍ପାଥ୍ରେ ଶୋଇଥିବା ୩ଜଣ ଦିନମଜୁରିଆଙ୍କୁ ଅତି ନୃଶଂସ ଭାବେ ହତ୍ୟା କରାଯିବା ପରେ ସାରା ସହରରେ ଚାଞ୍ଚଲ୍ୟ ଖେଳିଯାଇଛି। କିଏ ଓ କାହିଁିକି ଏହି ଦିନମଜୁରିଆଙ୍କୁ ହତ୍ୟା କରିଛି ତାହା ଏବେ ପ୍ରଶ୍ନ ପାଲଟିଛି। ଏହି ଘଟଣାକୁ ନେଇ ଭୁବନେଶ୍ୱରର ବିଭିନ୍ନ ଫୁଟ୍ପାଥ୍ରେ ଶୋଉଥିବା ଦିନମଜୁରିଆ ଆତଙ୍କିତ ହୋଇପଡ଼ିଛନ୍ତି। ଏହି ହତ୍ୟାକାଣ୍ଡ ପଛରେ କେହି ସାଇକୋ କିଲରର ହାତଥିବା ପୋଲିସ କମିଶନର କହିଛନ୍ତି। ସେ ଅନ୍ୟ ଜଣଙ୍କୁ ଟାର୍ଗେଟ କରିବା ପୂର୍ବରୁ ପୋଲିସ ତାଙ୍କୁ ଧରିବା ପାଇଁ ଯୋଜନା କରିଛି। ପୋଲିସ ଆଶଙ୍କା କରିଛି କଟକରେ ଛାନ୍ଭିନ୍ ପରେ ସାଇକୋ କିଲର ଭୁବନେଶ୍ୱରକୁ ଚାଲିଆସି ଏଭଳି କାଣ୍ଡ ଘଟାଇ ପାରନ୍ତି। ତେଣୁ ପୋଲିସ କମିଶନର ସତ୍ୟଜିତ୍ ମହାନ୍ତି ଓ ଡେପୁଟି ପୋଲିସ କମିଶନର ଅଖିଳେଶ୍ୱର ସିଂ ବୁଧବାର ଓ ଗୁରୁବାର ବିଳମ୍ବିତ ରାତିରେ ଷ୍ଟୁଡିଓ ଛକ, ପୋଖରୀପୁଟ, ନୟାପଲ୍ଲୀ ଆଦି ବିଭିନ୍ନ ସ୍ଥାନ ବୁଲି ପାଟ୍ରୋଲିଂ କରିଛନ୍ତି। ଫୁଟ୍ପାଥରେ ଶୋଉଥିବା ଲୋକଙ୍କୁ ସଚେତନ କରିବା ସହ ଆଶ୍ରୟସ୍ଥଳୀରେ ରହିବାକୁ ପରାମର୍ଶ ଦେଇଛନ୍ତି। ସେହିପରି କମିଶନର ପୋଲିସ କଣ୍ଟ୍ରୋଲ ରୁମ୍ ଅନୁଧ୍ୟାନ କରିଛନ୍ତି। ଗତ ଦୁଇଦିନ ହେଲା ରାତିରେ ବିଭିନ୍ନ ଫୁଟ୍ପାଥ୍ରେ ଶୋଇଥିବା ଦିନମଜୁରିଆଙ୍କୁ ପୋଲିସ କର୍ମଚାରୀମାନେ ଉଠାଇ ଆଣି ଆଶ୍ରୟସ୍ଥଳୀରେ ଛାଡ଼ିଛନ୍ତି। ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରାଯିବା ସହ ଯାଞ୍ଚ ହେଉଛି। କୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିଲେ ତାଙ୍କୁ ତୁରନ୍ତ ଥାନାକୁ ଆଣି ପଚରାଉଚରା କରିବା ପାଇଁ ପୋଲିସ କମିଶନର ନିର୍ଦ୍ଦେଶ ଦେଇଛନ୍ତି। ବିଳମ୍ବିତ ରାତିରେ ଯଦି କେହି କଣ୍ଟ୍ରୋଲ ରୁମ୍କୁ ଫୋନ୍ କରନ୍ତି ତେବେ ତୁରନ୍ତ ଜବାବ ଦେବା ସହ ଉପରିସ୍ଥ ଅଧିକାରୀଙ୍କୁ ଜଣାଇବାକୁ କୁହାଯାଇଛି। ପୋଲିସ କମିଶନର କହିଛନ୍ତି, ଭୁବନେଶ୍ୱରରେ ସେଭଳି କିଛି ହେବାର ଆଶଙ୍କା ନାହିଁ। କିନ୍ତୁ ସୁରକ୍ଷା ଦୃଷ୍ଟିରୁ ମୁଁ ଓ ଡିସିପି ବିଭିନ୍ନ ସ୍ଥାନ ବୁଲି ପାଟ୍ରୋଲିଂ କରୁଛୁ। ଅନ୍ୟପକ୍ଷରେ କଟକ ପୋଲିସ ହାତରେ କିଛି ସିସିଟିଭି ଫୁଟେଜ ଲାଗିଥିବା କୁହାଯାଉଛି। ଏହି ଫୁଟେଜ ସାଇକୋ କିଲରର ନା ଆଉ କାହାର ତାହା ପୋଲିସ ଯାଞ୍ଚ କରୁଛି।
