ଅନୁଗୋଳ ଅଫିସ, ୧୩।୪- କରୋନା ପାଇଁ ଚାଷୀ କୁଳ ଓ କ୍ଷୁଦ୍ର ବ୍ୟବସାୟୀମାନେ ସମସ୍ୟାରେ ପଡ଼ିଥିଲେ। ବିଶେଷକରି ହାଟଗୁଡ଼ିକ ଉପରେ ପ୍ରଶାସନ ଓ ପୋଲିସ କଟକଣା ଲଗାଇଥିବାରୁ କ୍ଷେତରେ ଫଳିଥିବା ପରିବା ଚାଷୀମାନେ ବିକ୍ରି ପାଇଁ ଆଣିପାରୁ ନ ଥିଲେ। ଫଳରେ ଖାଉଟିମାନେ ଚଢ଼ା ଦରରେ ପନିପରିବା କିଣୁଥିଲେ। ଏବେ କିନ୍ତୁ ଅନୁଗୋଳ ଜିଲାରେ କୌଣସି ହାଟ ବନ୍ଦ ହେବ ନାହିଁ। ସାମାଜିକ ଦୂରତା ରକ୍ଷା ସହ ବ୍ୟବସାୟୀଙ୍କ ମଧ୍ୟରେ ଯଥା ସମ୍ଭବ ଦୂରତା କିପରି ରହିବ ତାହା ଉପରେ ଧ୍ୟାନ ଦିଆଯିବ ବୋଲି ଅନୁଗୋଳ ଏସ୍ପି ଜଗମୋହନ ମୀନା ସୂଚନା ଦେଇଛନ୍ତି।
ଏସ୍ପି କହିଛନ୍ତି ଯେ, ଜିଲାର ବିଭିନ୍ନ ସ୍ଥାନରେ ବସୁଥିବା ହାଟଗୁଡ଼ିକ ପୂର୍ବ ସ୍ଥାନରେ ହେବ। କିଛି ହାଟ ନିକଟରେ ଥିବା ପଡ଼ିଆକୁ କେତେଜଣ ବ୍ୟବସାୟୀ ଓ ଚାଷୀଙ୍କୁ ଉଠାଯିବ। ପଡ଼ିଆର ବିଭିନ୍ନ ପାର୍ଶ୍ୱରେ ସେମାନଙ୍କୁ ବସାଯାଇ ବ୍ୟବସାୟ କରିବାକୁ ଅନୁମତି ପ୍ରଦାନ କରାଯିବ। ଏ ନେଇ ଜିଲାରେ ଥିବା ସମସ୍ତ ଥାନା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ପୋଲିସ ଅଧିକାରୀମାନେ ଉକ୍ତ ଅଞ୍ଚଳକୁ ଯାଇ କେଉଁଠି ବ୍ୟବସାୟୀମାନେ ବସିବେ ତାହାର ବ୍ୟବସ୍ଥା କରିବେ। ଯଥା ସମ୍ଭବ ସେମାନଙ୍କ ମଧ୍ୟରେ ଦୂରତାକୁ ଧ୍ୟାନ ଦିଆଯିବ। ଏହାଦ୍ୱାରା ଲୋକଙ୍କ ମଧ୍ୟରେ ସାମାଜିକ ଦୂରତା ବଜାୟ ରହିବା ସହ ଚାଷୀ ଓ କ୍ଷୁଦ୍ର ବ୍ୟବସାୟୀମାନେ ମଧ୍ୟ ଆର୍ଥିକ ସ୍ବଚ୍ଛଳ ହେବେ। ଜିଲାବାସୀ ମଧ୍ୟ କମ୍ ଦରରେ ତଟକା ପରିବା ପାଇପାରିବେ। ଅନ୍ୟପକ୍ଷରେ ଅନୁଗୋଳ ସହରରେ ବସୁଥିବା ସାପ୍ତାହିକ ହାଟରେ ଏକ ପ୍ଲାଟୁନ୍ ଫୋର୍ସ ମୁତୟନ କରାଯାଇଥିଲା। ବ୍ୟବସାୟୀମାନଙ୍କୁ ବିଭିନ୍ନ ପିଣ୍ଡିରେ ବସାଯାଇ ଥିବାବେଳେ ଲୋକଙ୍କ ମଧ୍ୟରେ ଯେପରି ସାମାଜିକ ଦୂରତା ରହିବ। ସେ ନେଇ ପୋଲିସ ପକ୍ଷରୁ ନଜର ରଖାଯାଇଥିଲା।
