ପୁରୀକୁ ପ୍ରତିଦିନ ଦେଶ ବିଦେଶର ପର୍ଯ୍ୟଟକ ଆସିଥାନ୍ତି। ଏହାକୁ ଦୃଷ୍ଟିରେ ରଖି ସହରର ବିଭିନ୍ନ ହୋଟେଲ ଏବଂ ରେଷ୍ଟୁରାଣ୍ଟରେ ସୁଆଦିଆ ଖାଦ୍ୟ ପ୍ରସ୍ତୁତ କରାଯାଏ। ତେବେ ଗ୍ରାହକଙ୍କୁ ଆକୃଷ୍ଟ କରିବା ପାଇଁ କେତେକ ହୋଟେଲ ସର୍ବଦା ସେମାନଙ୍କ ଡିସ୍ ପରିବର୍ତ୍ତନ କରିଥାନ୍ତି। ସିଟି ରୋଡରେ ଥିବା ପ୍ରମୋଦ କନ୍ଭେନସନ ଆଣ୍ଡ୍ ବିଚ୍ ରିସର୍ଟରେ ଉଭୟ ଆମିଷ ଏବଂ ନିରାମିଷ ଖାଦ୍ୟ ଗ୍ରାହକଙ୍କୁ ପରଷା ଯାଇଥାଏ। ଏହାର ଅନ୍ୟତମ ଚାହିଦାଯୁକ୍ତ ଡିସ୍ କଚି ମିର୍ଚି କା ମୁର୍ଗର ପ୍ଲେଟ୍ ଦାମ୍ ୩୨୦ ଟଙ୍କା। କଚି ମିର୍ଚି କା ମୁର୍ଗର ପ୍ରସ୍ତୁତି ସମ୍ପର୍କରେ ପ୍ରମୋଦ କନ୍ଭେନସନ ବିଚ୍ ରିସର୍ଟର ମୁଖ୍ୟ ଶେଫ୍ ହିକ୍ମତ୍ ଖାନ୍ କହନ୍ତି…
ଆବଶ୍ୟକ ସାମଗ୍ରୀ
ଚିକେନ: ୩୦୦ଗ୍ରାମ୍
କଟା ପିଆଜ: ୩୦ଗ୍ରାମ୍
କଟା ଟମାଟୋ: ୩୦ଗ୍ରାମ୍
କାଜୁ ପେଷ୍ଟ: ୫୦ଗ୍ରାମ୍
ଅଦା ପେଷ୍ଟ: ୨୦ଗ୍ରାମ୍
ରସୁଣ ପେଷ୍ଟ: ୨୦ଗ୍ରାମ୍
ରିଫାଇନ ତେଲ: ୬୦ଗ୍ରାମ୍
ଦେଶୀଘିଅ: ୨୦ଗ୍ରାମ୍
ଅମୁଲ କ୍ରିମ୍: ୨୦ଗ୍ରାମ୍
ହଳଦୀ ପାଉଡ଼ର: ୧୦ଗ୍ରାମ୍
ଲଙ୍କା ପାଉଡ଼ର: ୧୦ଗ୍ରାମ୍
ଧନିଆପତ୍ର: ୧୫ ଗ୍ରାମ୍
ପୋଦିନା ପତ୍ର: ୧୫ଗ୍ରାମ୍
କଞ୍ଚାଲଙ୍କା: ୧୦ଟା
ଗରମ ମସଲା: ୫ଗ୍ରାମ୍
ସ୍ବାଦ ଅନୁଯାୟୀ ଲୁଣ
ପ୍ରସ୍ତୁତି ପ୍ରଣାଳୀ
ପ୍ରଥମେ ଚିକେନକୁ ଭଲ ଭାବେ ଧୋଇ ଏକ ପାତ୍ରରେ ରଖନ୍ତୁ। ନିଅଁାରେ କଡାଇ ବସାଇ ରିଫାଇନ ତେଲ ପକାନ୍ତୁ। ତେଲ ଗରମ ହୋଇଗଲା ପରେ ସେଥିରେ କଟା ପିଆଜ ପକାଇ ଭାଜନ୍ତୁ। ପିଆଜ ରଙ୍ଗ ବ୍ରାଉନ ହୋଇଗଲେ ସେଥିରେ ଅଦା, ରସୁଣ ପେଷ୍ଟ ପକାଇ ୧୦ ମିନିଟ୍ କଷିବା ପରେ ହଳଦୀଗୁଣ୍ଡ, ଲଙ୍କାଗୁଣ୍ଡ ଓ କଟା ଟମାଟୋ ପକାନ୍ତୁ। ମସଲାରୁ ତେଲ ଛାଡିଗଲା ପରେ କାଜୁପେଷ୍ଟ ପକାଇ ଏହାର ୧୦ ମିନିଟ୍ ପରେ ଚିକେନ ପକାନ୍ତୁ ଓ ଭଲ ଭବେ କଷି ଘୋଡାଇ ଦିଅନ୍ତୁ।୧୫ ରୁ ୨୦ ମିନିଟ୍ ପରେ ଘୋଡଣୀ ଖୋଲି ସେଥିରେ ପୂର୍ବରୁ ଛେଚା ହୋଇଥିବା ଧନିଆପତ୍ର, ପୋଦିନାପତ୍ର ଓ କଞ୍ଚାଲଙ୍କା ପକାଇ ଗୋଳାନ୍ତୁ। ଏହାପରେ ସ୍ବାଦ ଅନୁଯାୟୀ ଲୁଣ ଏବଂ ଗରମ ମସଲା ପକାନ୍ତୁ। ଶେଷରେ ଏହା ଉପରେ ଅମୁଲ କ୍ରିମ୍ ଓ ଦେଶୀ ଘିଅ ପକାଇ ତଳକୁ ଓହ୍ଲାଇ ଦିଅନ୍ତୁ। ଏବେ ପ୍ରସ୍ତୁତ ହୋଇଗଲା କଚି ମିର୍ଚି କା ମୁର୍ଗ।
