ବ୍ରହ୍ମପୁର ଅଫିସ,୨୬ା୧୨- ଗଞ୍ଜାମ ଜିଲା ଲେଖକ ସାମ୍ମୁଖ୍ୟର ସପ୍ତଦଶତମ ସ୍ବନକ୍ଷତ୍ର ସମାରୋହ ବୁଧବାର ବ୍ରହ୍ମପୁର ଉତ୍କଳ ଆଶ୍ରମ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ବର୍ତ୍ତମାନର ଡିଜିଟାଲ ଓ ଇଣ୍ଟରନେଟ ବ୍ୟବସ୍ଥାରେ ଓଡ଼ିଆ ଭାଷାର ପ୍ରଚାର ଓ ପ୍ରସାରରେ ବାଧକ ସାଜିଥିବା ଦର୍ଶାଇ ସାରସ୍ବତ ସାଧକଙ୍କ ପକ୍ଷରୁ ଉଦ୍ବେଗ ପ୍ରକାଶ ପାଇଥିଲା। ମୁଖ୍ୟତଃ ଯୁବପିଢ଼ି ଏହି ବ୍ୟବସ୍ଥାରୁ ମୁକୁଳିବା କଷ୍ଟକର ହୋଇପଡ଼ିଛି। ସେମାନେ ପୁସ୍ତକ ପଠନ ପ୍ରତି ବିମୁଖ ଭାବ ପ୍ରକାଶ କରୁଛନ୍ତି। ତେଣୁ ଏହାର ପ୍ରତିକାର ବ୍ୟବସ୍ଥା କରାଯିବା ଉପରେ ଗୁରୁତ୍ୱାରୋପ କରାଯାଇଥିଲା। ପ୍ରଫେସର ସୁଦର୍ଶନ ଆଚାର୍ଯ୍ୟ ଏଥିରେ ମୁଖ୍ୟଅତିଥି ଭାବେ ଯୋଗଦେଇ ଏହା କହିଥିଲେ। ସାମ୍ମୁଖ୍ୟ ସଭାପତି ପ୍ରଫେସର ଡ଼. ରବି ନାରାୟଣ ମିଶ୍ରଙ୍କ ଅଧ୍ୟକ୍ଷତାରେ ହୋଇଥିବା ସାରସ୍ବତ ସମାରୋହରେ ପ୍ରଫେସର ଡ଼. ରାଜା ରାଓ ମୁଖ୍ୟବକ୍ତା ଭାବେ ଯୋଗ ଦେଇଥିଲେ। ଯୁବଗୋଷ୍ଠୀ ମୋବାଇଲ ଫୋନ ଓ ଇଣ୍ଟରନେଟରୁ ନିବୃତ୍ତ ରହି ଓଡ଼ିଆ ଭାଷା ସାହିତ୍ୟ ପଠନ ପାଇଁ ପରାମର୍ଶ ଦେଇଥିଲେ। ପ୍ରାରମ୍ଭରେ ସମ୍ପାଦକ ଦୀନବନ୍ଧୁ ଶ୍ରୀପଲ୍ଲବ ସ୍ବାଗତ ଭାଷଣ ଦେଇଥିବା ବେଳେ ସାଧାରଣ ସମ୍ପାଦକ ହାଡ଼ିବନ୍ଧୁ ମାଳୀ ବିବରଣୀ ପାଠ କରିଥିଲେ। ଏହି ଅବସରରେ କବୟିତ୍ରୀ ତଥା ମହାମାୟୀ ମହିଳା କଲେଜ ଗୃହ ବିଜ୍ଞାନ ବିଭାଗ ପ୍ରାଧ୍ୟାପିକା ଜୟନ୍ତୀରାଣୀ ପଣ୍ଡାଙ୍କୁ ପ୍ରତିଭା ସମ୍ମାନ ପ୍ରଦାନ କରାଯାଇଥିଲା। ଅନୁଷ୍ଠାନ ମୁଖପତ୍ର ଋଷିକୁଲ୍ୟା ଓ ରବି ନାରାୟଣ ମିଶ୍ରଙ୍କ ଗଳ୍ପ ସଂକଳନ ‘ଶୀତ ବାଦର’ କବି ଭିକାରୀ ଚରଣ ମହାପାତ୍ରଙ୍କ କବିତା ସଂକଳନ ‘ପଞ୍ଚପର୍ଣ୍ଣା’, ଜ୍ୟୋତିଷ ବିଶାରଦ ପଣ୍ଡିତ ଶିଶିର କୁମାର ଶତପଥୀଙ୍କ ଜ୍ୟୋତିଷ ଦିଗ୍ଦର୍ଶନ ଓ କାଳସର୍ପ ଦୋଷ, ମଙ୍ଗଳ ଦୋଷ ଏବଂ ତା’ର ପ୍ରତିକାର ଶୀର୍ଷକ ଦୁଇଟି ଗ୍ରନ୍ଥ ଲୋକାର୍ପିତ ହୋଇଥିଲା। ସମାରୋହ ପ୍ରଥମ ଅଧିବେଶନ ଶେଷରେ ଲେଖିକା ସାମ୍ମୁଖ୍ୟ ସାଧାରଣ ସମ୍ପାଦିକା ଡ଼. ସୂଚନା ପାଢ଼ୀ ଧନ୍ୟବାଦ ଦେଇଥିଲେ। ଲେଖିକା ସାମ୍ମୁଖ୍ୟ ସଭାନେତ୍ରୀ ସ୍ବର୍ଣ୍ଣପ୍ରଭା ମିଶ୍ରଙ୍କ ଅଧ୍ୟକ୍ଷତାରେ ଆୟୋଜିତ କବିତା ପାଠୋତ୍ସବରେ କବୟିତ୍ରୀ ସ୍ବର୍ଣ୍ଣପ୍ରଭା ପାଢ଼ୀ ଉଦ୍ଘାଟନ କରିଥିବା ବେଳେ ଜ୍ୟୋତ୍ସ୍ନାମୟୀ ପ୍ରଧାନ, ଆରତୀ ଶତପଥୀ, ମନ୍ମଥ ପାଢ଼ୀ, ପ୍ରଫୁଲ୍ଲ ରାଉତ, ଭଗବାନ ତ୍ରିପାଠୀ, କୈଳାସ ରଥ, ଅଶୋକ ସାହୁ, ଦଣ୍ଡପାଣି ମହାପାତ୍ର, ପ୍ରମିଳା ମହଲା, କୁମୁଦିନୀ ଶ୍ରୀପଲ୍ଲବ, ଶ୍ୟାମ ସୁନ୍ଦର ଖାଡ଼ଙ୍ଗା ଓ ବିଷ୍ଣୁପ୍ରିୟା ଆଚାର୍ଯ୍ୟ ପ୍ରମୁଖ ସ୍ବରଚିତ କବିତା ପାଠ କରିିଥିଲେ।
