ଭୁବନେଶ୍ୱର,୧୫ା୬(ବ୍ୟୁରୋ): ରସୁଲଗଡ଼ସ୍ଥିତ ଓଡ଼ିଶାର ବଡ଼ ମଲ୍ ଏସ୍ପ୍ଲାନେଡ୍ ଓ୍ବାନ୍ରେ ରଜ ମହୋତ୍ସବ ‘ଖୁସିର ରଜ’ ଆରମ୍ଭ ହୋଇଯାଇଛି। ରଜ ପାଇଁ ମଲ୍ରେ କରାଯାଇଥିଲା ସ୍ବତନ୍ତ୍ର ବ୍ୟବସ୍ଥା। ପୂରା ମଲ୍କୁ ଆଲୋକରେ ସୁସଜ୍ଜିତ କରାଯିବା ସହ ବିଭିନ୍ନ ପାରମ୍ପରିକ ସାମଗ୍ରୀ ପ୍ରଦର୍ଶିତ ହୋଇଥିଲା। ଦର୍ଶକଙ୍କ ପାଇଁ ଦୋଳିଠୁ ଆରମ୍ଭ କରି ପାନ, ପିଠା ଆଦି ଖାଇବା ବ୍ୟବସ୍ଥା କରାଯାଇଥିଲା। ଗେଣ୍ଡୁଫୁଲରେ ସଜ୍ଜିତ ଦୋଳିଗୁଡ଼ିକ ମୁଖ୍ୟ ଆକର୍ଷଣ ପାଲଟିଥିଲା। ଦର୍ଶକଙ୍କୁ ଆକୃଷ୍ଟ କରିବା ପାଇଁ ମଲ୍ରେ ଥିବା ବିଭିନ୍ନ ବ୍ରାଣ୍ଡ୍ର ଅଫର ରହିଥିଲା। ଝିଅମାନଙ୍କ ପାଇଁ ସର୍ପ୍ରାଇଜ ଗିଫ୍ଟ ରହିଥିଲା। ମଲ୍ ପକ୍ଷରୁ ଝିଅମାନଙ୍କୁ ମାଗଣାରେ ମେହେନ୍ଦୀ ଲଗାଇବା ସହିତ ଶୃଙ୍ଗାର କରାଯାଇଥିଲା। ଏଠାରେ ପ୍ରବଳ ଗହଳି ପରିଲକ୍ଷିତ ହୋଇଥିଲା। ଏ ସବୁ ଭିତରେ ମଲ୍ରେ ବୁଲୁଥିବା ନକଲି ଡାଇନାସୋର ଦର୍ଶକଙ୍କୁ ଭରପୂର ମଜା ଦେବା ସହିତ କେତେଜଣଙ୍କୁ ମଧ୍ୟ ଡରାଇଥିଲା। ତିନିଦିନ ପାଳନ ହେବାକୁ ଥିବା ଏହି ରଜ ମହୋତ୍ସବକୁ ଆସିବା ପାଇଁ ମଲ୍ ପକ୍ଷରୁ ଅନୁରୋଧ କରାଯାଇଛି। ସେଣ୍ଟର ଡାଇରେକ୍ଟର ପାର୍ଥ ପ୍ରତିମ ନାୟକ ଏହି ପର୍ବ ପାଇଁ ସମସ୍ତଙ୍କୁ ଶୁଭେଚ୍ଛା ଜଣାଇବା ସହିତ ଏଥିରେ ସମସ୍ତେ ସାମିଲ ହୁଅନ୍ତୁ ବୋଲି କହିଛନ୍ତି।
