ଭୁବନେଶ୍ୱର,୨୫-୯(ବ୍ୟୁରୋ):ରାଜ୍ୟ ସରକାରୀ କର୍ମଚାରୀଙ୍କ ପାଇଁ ଖୁସି ଖବର। ଏଣିକି ମାସର ଶେଷ କାର୍ଯ୍ୟ ଦିବସରେ କର୍ମଚାରୀଙ୍କୁ ଦରମା ମିଳିବ। ଏ ସମ୍ପର୍କିତ ଏକ ବିଜ୍ଞପ୍ତି ମଙ୍ଗଳବାର ଅର୍ଥ ବିଭାଗ ପକ୍ଷରୁ ଜାରି କରାଯାଇଛି। ପୂର୍ବରୁ ପରବର୍ତ୍ତୀ ମାସର ପ୍ରଥମ ଦିନରେ ଦରମା ମିଳୁଥିଲା। ମାତ୍ର ଏବେ ଏହା ଦିନକ ପୂର୍ବରୁ ଅର୍ଥାତ୍ ମାସର ଶେଷ ଦିନରେ ମିଳିବ ବୋଲି ଅର୍ଥ ବିଭାଗ ପକ୍ଷରୁ ନିଷ୍ପତ୍ତି ନିଆଯାଇଛି।
ପ୍ରଚଳିତ ନିୟମାନୁଯାୟୀ, ଦରମା ଦେବା ପୂର୍ବରୁ ମାସର ଶେଷ ୫ ଦିନ ମଧ୍ୟରେ ଏହାକୁ ପ୍ରଥମେ ଟ୍ରେଜେରିରେ ରଖାାଯାଉଥିଲା ଏବଂ ଏହାକୁ ପରବର୍ତ୍ତୀ ମାସର ପ୍ରଥମ ଦିବସରେ ପ୍ରଦାନ କରାଯାଉଥିଲା। ଏହି ପ୍ରକ୍ରିୟା ଦ୍ୱାରା ପ୍ରାୟ ୧୫ ଲକ୍ଷ କାଗଜ ବ୍ୟବହୃତ ହେଉଥିଲା। ଏପରି କି ଦରମା ସମ୍ପର୍କିତ ନଥିପତ୍ର ଟ୍ରେଜେରି ଏଣ୍ଡ ଏଜିଙ୍କ ନିକଟରେ ପହଞ୍ଚିବା ୫୦ ଦିନ ସମୟ ଲାଗୁଥିଲା। ଏଭଳି ସ୍ଥିତିରେ ଦରମା ଉଠାଣ ବ୍ୟବସ୍ଥାକୁ ସରଳୀକରଣ କରିବା ଏବଂ ସରକାରଙ୍କ ୫-ଟି ର ସୁପରିଚାଳନା ପାଇଁ ଏକକ ବ୍ୟବସ୍ଥା ଉପରେ ଗୁରୁତ୍ୱ ଦିଆଯାଇଛି। ଫଳରେ ମାସର ଶେଷ ଦିନରେ ହିଁ ଟ୍ରେଜେରି ମାଧ୍ୟମରେ ଦରମା ପ୍ରଦାନ କରାଯିବ।
