କୋଲକାତା,୧୩।୯:ପଶ୍ଚିମବଙ୍ଗରେ ସିବିଆଇ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଭଳି କେନ୍ଦ୍ରୀୟ ଏଜେନ୍ସିଗୁଡ଼ିକ ଅତି ମାତ୍ରାରେ ସକ୍ରିୟ ରହିବା ବିରୋଧରେ ଶାସକ ତୃଣମୂଳ କଂଗ୍ରେସ (ଟିଏମ୍ସି) ରାଜ୍ୟ ବିଧାନସଭାରେ ପ୍ରସ୍ତାବ ଆଣିବାକୁ ନିଷ୍ପତ୍ତି ନେଇଛି। ଏଥିପାଇଁ ବୁଧବାର ବିଧାନସଭାର ଏକ ସଂକ୍ଷିପ୍ତ ଅଧିବେଶନ ଡକାଯାଇଛି। ପ୍ରସ୍ତାବ ବିଧାନସଭାରେ ଦାଖଲ ହୋଇଥିବା ବାଚସ୍ପତି ବିମାନ ବନ୍ଦୋପାଧ୍ୟାୟ ସୋମବାର ସୂଚନା ଦେଇଛନ୍ତି। ଏହା ଉପରେ ଉଭୟ ଶାସକ ଓ ବିରୋଧୀ ଦଳ ସଦସ୍ୟମାନେ ଆଲୋଚନା କରିବେ। ରାଜ୍ୟରେ ଭୟ ଓ ଉତ୍ତେଜନାର ଏକ ବାତାବରଣ ସୃଷ୍ଟି କରାଯାଉଛି। ଯେକୌଣସି ସମୟରେ କେନ୍ଦ୍ରୀୟ ସଂସ୍ଥାର ଅଧିକାରୀମାନେ ଲୋକଙ୍କ ଘରେ ପହଞ୍ଚତ୍ୟାଉଛନ୍ତି। ଏହା ଉପରେ ଆଲୋଚନା ହେବ ବୋଲି ବାଚସ୍ପତି କହିଛନ୍ତି।
ଚାଇନାର ମୋବାଇଲ ଗେମିଂ ଆପ୍ ଦୁର୍ନୀତିରେ ସମ୍ପୃକ୍ତି ନେଇ ଦୁଇଦିନ ପୂର୍ବରୁ ଇଡି କୋଲକାତାର ଜଣେ ବ୍ୟବସାୟୀଙ୍କ ଘରେ ଚଢ଼ାଉ କରି ୧୭.୩୨ କୋଟି ଟଙ୍କା ଜବତ କରିଥିଲା। କେନ୍ଦ୍ରୀୟ ଏଜେନ୍ସିର ଏଭଳି କାର୍ଯ୍ୟକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିନ୍ଦା କରିଛନ୍ତି। ଦେଶରେ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେଉ, ଏହା କେନ୍ଦ୍ର ସରକାର ଚାହାନ୍ତି ନାହିଁ। ଦେଶରେ ଏଜେନ୍ସିରାଜ୍ ପ୍ରତିଷ୍ଠା ଲାଗି ଉଦ୍ୟମ ହେଉଥିବା ମମତା କହିଛନ୍ତି। ଏହା ବ୍ୟତୀତ ରାଷ୍ଟ୍ରାୟତ୍ତ ଉଦ୍ୟୋଗଗୁଡ଼ିକରୁ କେନ୍ଦ୍ର ସରକାର ପୁଞ୍ଜି ପ୍ରତ୍ୟାହାର କରିନେଉଥିବାରୁ ଟିଏମ୍ସି ନେତ୍ରୀ ଏହାର କଡ଼ା ସମାଲୋଚନା କରିଛନ୍ତି। କେନ୍ଦ୍ର ସରକାର ରେଲଓ୍ବେ, ସେଲ୍, ସିଆଇଏଲ୍ ଆଦି ସଂସ୍ଥାକୁ ବିକ୍ରି କରୁଛନ୍ତି। ନୂଆ ନିଯୁକ୍ତି କିପରି ସୃଷ୍ଟି ହେବ ବୋଲି ମମତା ପ୍ରଶ୍ନ କରିଛନ୍ତି। ଏଜେନ୍ସି ରାଜ୍ ସତ୍ତ୍ୱେ ଟିଏମ୍ସି ସରକାର ରାଜ୍ୟରେ ଶିଳ୍ପ ବିକାଶ ଓ ନିଯୁକ୍ତି ସୃଷ୍ଟି ଦିଗରେ କାର୍ଯ୍ୟ କରୁଛି। ଏଠାରେ ତାଲିମ ପାଉଥିବା ଛାତ୍ରୀଛାତ୍ର ବାହାର ରାଜ୍ୟରେ ନିଯୁକ୍ତି ସୁଯୋଗ ପାଉଛନ୍ତି। ପଶ୍ଚିମବଙ୍ଗରେ ଯଥେଷ୍ଟ ନିଯୁକ୍ତି ସୁଯୋଗ ରହିଥିବାରୁ ସେମାନଙ୍କୁ ଫେରିଆସିବା ପାଇଁ ମମତା ଆହ୍ବାନ ଦେଇଛନ୍ତି।
