ଚେନ୍ନାଇ,୧୨।୭: ତାମିଲନାଡୁର ପେରାମ୍ବୁଲୁର ଜିଲାର ଏକ ସରକାରୀ ହାଇସ୍କୁଲରେ ଜଣେ ଏଚ୍ଆଇଭି ପୀଡ଼ିତ ଛାତ୍ରଙ୍କୁ ନାମଲେଖାର ସୁଯୋଗ ଦିଆଯାଇନାହିଁ। ଏହାପରେ ଶୁକ୍ରବାର ତାମିଲନାଡୁ ଶିକ୍ଷା ବିଭାଗ ଏହି ମାମଲାର ଯାଞ୍ଚ ପାଇଁ ନିର୍ଦ୍ଦେଶ ଦେଇଛନ୍ତି। ଏଥିସହ ସ୍କୁଲ ଶିକ୍ଷା ନିର୍ଦ୍ଦେଶକ ଏସ୍. କାନାପ୍ପାନ ଏହି ଘଟଣାରେ ଜିଲା ମୁଖ୍ୟ ଅଧିକାରୀଙ୍କୁ ରିପୋର୍ଟ ତଲବ କରିଛନ୍ତି। ସୂଚନାଯୋଗ୍ୟ, ପ୍ରାୟ ୧ ସପ୍ତାହ ପୂର୍ବରୁ ପେରାମ୍ବୁଲୁର ଜିଲାର କୋଲାକନାଥମ୍ର ଏକ ସ୍କୁଲରେ ନାମଲେଖାଇବା ପାଇଁ ଜଣେ ଛାତ୍ରଙ୍କୁ ଆସିବାକୁ କୁହାଯାଇଥିଲା। ହେଲେ ବୁଧବାର ତାଙ୍କୁ ସେଠାରୁ ନିରାଶ ହୋଇ ଫେରିବାକୁ ପଡ଼ିଲା। କାରଣ ଛାତ୍ରଙ୍କ ଏକାଡେମିକ୍ କ୍ୟାରିୟରରେ ଖରାପ ପ୍ରଦର୍ଶନ ଯୋଗୁ ତାଙ୍କୁ ନାମଲେଖା ଅନୁମତି ଦିଆଯାଇପାରିବ ନାହିଁ ବୋଲି ଅଭିଭାବକଙ୍କୁ ପ୍ରଧାନ ଶିକ୍ଷକ କେ. କାମରାଜ କହିଥିଲେ। ଅପରପକ୍ଷରେ ଏନେଇ ମୁଖ୍ୟ ଶିକ୍ଷା ଅଧିକାରୀ କହିଛନ୍ତି, ଯଦି ଛାତ୍ର ତାଙ୍କ ପାଖକୁ ଆସେ ତେବେ ତାଙ୍କୁ ସ୍କୁଲରେ ଲେଖାଇବାକୁ ଅନୁମତି ଦିଆଯିବ।
