ଲଣ୍ଡନ, ୮।୮ (ଏଏଫ୍ପି)- ଦକ୍ଷିଣ ଆଫ୍ରିକା ସ୍ପିନର କଲିନ୍ ଏକରମ୍ୟାନ ଟି୨୦ କ୍ରିକେଟ୍ର ଶ୍ରେଷ୍ଠ ବୋଲିଂ ଫିଗର୍ ହାସଲ କରିବାର ସୌଭାଗ୍ୟ ଲାଭ କରିଛନ୍ତି। ଏଠାରେ ଚାଲିଥିବା ଟି୨୦ ବ୍ଲାଷ୍ଟର ଏକ ମ୍ୟାଚ୍ରେ ସେ ୧୮ ରନ୍ ବିନିମୟରେ ୭ ଉଇକେଟ୍ ଅକ୍ତିଆର କରି ବିଶ୍ୱ ରେକର୍ଡକୁ ନିଜ ନାମରେ ପ୍ରତିଷ୍ଠା କରିଛନ୍ତି। ୨୮ ବର୍ଷୀୟ କଲିନ୍ ଲିସେଷ୍ଟରଶାୟର ଅଧିନାୟକ ରହିଥିବାବେଳେ ଓ୍ବର୍କଶାୟର ବିପକ୍ଷରେ ଏହି ମାରାତ୍ମକ ସ୍ପେଲ ବୋଲିଂ କରିଥିଲେ। ଟସ୍ ଜିତି ଲିସେଷ୍ଟରଶାୟର ଅଧିନାୟକ କଲିନ୍ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ହ୍ୟାରୀ ସ୍ବିଣ୍ଡେଲ୍ସ (୬୩) ଓ ଉଇକେଟ୍କିପର ଲୁଇସ୍ ହିଲ୍ (୫୮)ଙ୍କ ଅର୍ଦ୍ଧଶତକ ବଳରେ ଲିସେଷ୍ଟରଶାୟର ନିର୍ଦ୍ଧାରିତ ୨୦ ଓଭରରେ ୬ ଉଇକେଟ୍ ହରାଇ ୧୮୯ ରନ୍ କରିଥିଲା। ଜବାବରେ ଓ୍ବର୍କଶାୟର ୧୭.୪ ଓଭରରେ ୧୩୪ ରନରେ ସୀମିତ ରହିଥିଲା। ଦଳ ଏକଦା ୧୩ ଓଭରରେ ୧୧୪ ରନ କରି ଦୃଢ଼ସ୍ଥିତିରେ ରହିଥିଲେ ମଧ୍ୟ ଏକରମ୍ୟାନଙ୍କ ଅଫ୍ସ୍ପିନକୁ ବୁଝି ନ ପାରି ୨୦ ରନରେ ବଳକା ୮ ଉଇକେଟ୍ ହରାଇଥିଲା। ମ୍ୟାଚ୍ ବିଜୟୀ ବୋଲିଂ ଲାଗି ଏକରମ୍ୟାନଙ୍କୁ ଶ୍ରେଷ୍ଠ ଖେଳାଳି ବିବେଚିତ କରାଯାଇଥିଲା। ପୂର୍ବରୁ ଟି୨୦ କ୍ରିକେଟ୍ରେ ଶ୍ରେଷ୍ଠ ବୋଲିଂ ଫିଗର ମାଲେସିଆର ଅରୁଲ ସୁଇଫ୍ଙ୍କ ନାମରେ ରହିଥିଲା। ୨୦୧୧ରେ ସେ ସମରସେଟ୍ ପକ୍ଷରୁ ଖେଳି ଗ୍ଲାମରଗନ୍ ବିପକ୍ଷରେ ୫ ରନରେ ୬ ଉଇକେଟ୍ ଅକ୍ତିଆର କରିଥିଲେ। ଉଲ୍ଲେଖଯୋଗ୍ୟ, ପ୍ରଥମଶ୍ରେଣୀ କ୍ରିକେଟ୍ରେ ଶ୍ରେଷ୍ଠ ବୋଲିଂ ଫିଗର୍ ଇଂଲଣ୍ଡର ହେର୍ଡଲୀ ଭରିଟ୍ଙ୍କ ନାମରେ ରହିଛି। କାଉଣ୍ଟି କ୍ଲବ ୟର୍କଶାୟର ପକ୍ଷରୁ ପ୍ରତିନିଧିତ୍ୱ କରି ଏହି ବାମହାତୀ ସ୍ପିନର ୧୯୩୨ରେ ନଟ୍ଟିଂହାମଶାୟର ବିପକ୍ଷରେ ୧୦ ରନରେ ସମସ୍ତ ୧୦ ଉଇକେଟ୍ ଅକ୍ତିଆର କରିଥିଲେ। ସେହିଭଳି ଲ୍ିଷ୍ଟ-ଏ କ୍ରିକେଟ୍ରେ ଶ୍ରେଷ୍ଠ ବୋଲିଂ ଫିଗର୍ ଭାରତର ଶାହବାଜ ନଦୀମଙ୍କ ନାମରେ ରହିଛି। ୨୦୧୮/୧୯ ସିଜନରେ ଝାଡ଼ଖଣ୍ଡ ପକ୍ଷରୁ ଖେଳୁଥିବାବେଳେ ରାଜସ୍ଥାନ ବିପକ୍ଷରେ ୧୦ ରନରେ ୮ ଉଇକେଟ୍ ଦଖଲ କରିଥିଲେ। ଟି୨୦ କ୍ରିକେଟ୍ର ଶ୍ରେଷ୍ଠ ବୋଲିଂ ଫିଗର୍ ଏବେ ଏକରମ୍ୟାନଙ୍କ ନାମରେ ଲିପିବଦ୍ଧ ହୋଇଛି।
