ଭୁବନେଶ୍ୱର,୧୭।୧୨(କ୍ରୀଡ଼ା ପ୍ରତିନିଧି)-
ଓଡ଼ିଶାର ତାରକା କ୍ୟୁସ୍ପୋଟର୍ସ ସ୍ପେଶାଲିଷ୍ଟ ତଥା ବର୍ତ୍ତମାନର ରାଜ୍ୟ ଚାମ୍ପିୟନ ସୁବ୍ରତ ଦାସ ୨୫ ଦିନ ମଧ୍ୟରେ ୩ଟି ଟାଇଟଲ ଜିତି ରେକର୍ଡ ସୃଷ୍ଟି କରିଛନ୍ତି। ପାଟଣାରେ ଅନୁଷ୍ଠିତ ଇଷ୍ଟ ଇଣ୍ଡିଆ ଓପନ ସ୍ନୁକର ପ୍ରତିଯୋଗିତାରେ ଚାମ୍ପିୟନ ହୋଇଛନ୍ତି ଓଡ଼ିଶାର ଓଡ଼ିଶାର ସୁବ୍ରତ ଦାସ। ସୋମବାର ଅନୁଷ୍ଠିତ ଫାଇନାଲରେ ସେ ଝାଡ଼ଖଣ୍ଡର ନମ୍ବର ଓ୍ବାନ ଖେଳାଳି ଆଦର୍ଶ ବର୍ମାଙ୍କୁ ୫-୪ ଫ୍ରେମ୍ରେ ପରାସ୍ତ କରିଛନ୍ତି। ଟାଇଟଲ ମୁକାବିଲା ତୀବ୍ର ସଂଘଷପୂର୍ଣ୍ଣ ହୋଇଥିବାବେଳେ ଶେଷରେ ସୁବ୍ରତ ୭୦-୨୫, ୪୦-୬୫, ୬୪-୨୩, ୫୩-୧୨, ୨୩-୬୪, ୭୧-୩୦, ୫୯-୫୯, ୬୧-୪୩ ପଏଣ୍ଟରେ ବାଜି ମାରିଥିଲେ। ପୂର୍ବରୁ ସୁବ୍ରତ ନଭେମ୍ବର ୩୦ରେ ରାଜ୍ୟ ସ୍ନୁକର ଫାଇନାଲରେ ପୂର୍ବତନ ଜାତୀୟ ଚାମ୍ପିୟନ ଆଶୁତୋଷ ପାଢ଼ୀଙ୍କୁ ହରାଇ ଚାମ୍ପିୟନ ହୋଇଥିଲେ। ଏହାପରେ ଡିସେମ୍ବର ୮ରେ ସେ ୫ମ ଗୋଲ୍ଡେନ କିଙ୍ଗ୍ ଓପନ ସ୍ନୁକର ଟାଇଟଲ ଜିତିଥିଲେ। ଏବେ ଇଷ୍ଟଇଣ୍ଡିଆ ସ୍ନୁକର ଚାମ୍ପିୟନ ହୋଇ ସେ ଟାଇଟଲ ହାସଲରେ ହ୍ୟାଟ୍ରିକ ଅର୍ଜନ କରିଛନ୍ତି। ଓଡ଼ିଶାରେ ସ୍ଥିର ପ୍ରଦର୍ଶନ କରୁଥିବା କ୍ୟୁ ସ୍ପୋଟର୍ସ ତାରକାଙ୍କ ମଧ୍ୟରେ ଶୀର୍ଷରେ ଥିବା ସୁବ୍ରତ ଏହାକୁ ମିଶାଇ କ୍ୟାରିୟରରେ ୨୮ଟି ଓପନ ଟାଇଟଲ ଜିତିଛନ୍ତି। ବିହାର ବିଲିୟାଡର୍ସ ଆସୋସିଏଶନ ସମ୍ପାଦକ ଶ୍ୟାମଲ ଶର୍ମା ଓ ଆଡିକ୍ଶନ ସ୍ନୁକର ସେଣ୍ଟର ଅଧ୍ୟକ୍ଷ ସକେତ ତିଓ୍ବାରୀ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ।
