ମହୀଶୂର,୨୬।୮: କର୍ନାଟକର ମହୀଶୂରରେ ରୁହନ୍ତି ଆୟୁବ ଅହମ୍ମଦ। ନିଶା ତାଙ୍କର ଅଜଣା ମୃତଦେହକୁ ସଂସ୍କାର କରିବା। ଆଉ ଫୁଟ୍ପାଥରେ ରହୁଥିବା ଲୋକଙ୍କୁ ସାହାଯ୍ୟ କରିବା। ମାତ୍ର ଦ୍ୱିତୀୟ ଶ୍ରେଣୀ ପର୍ଯ୍ୟନ୍ତ ପାଠ ପଢିଥିବା ଆୟୁବଙ୍କ ଏହି କାମ ପାଇଁ ଏବେ ସେ ସମସ୍ତଙ୍କର ପ୍ରଶଂସାର ପାତ୍ର ପାଲଟି ଯାଇଛନ୍ତି। ପ୍ରଥମେ ପ୍ରଥମେ ତାଙ୍କର ଏହି କାର୍ଯ୍ୟକୁ ସମସ୍ତେ ନିନ୍ଦା କରୁଥିବା ବେଳେ ଏବେ କିନ୍ତୁ ଅଜଣା ମୃତଦେହ ଦେଖିଲେ ଖୋଜା ପଡୁଛନ୍ତି ଆୟୁବ। ସେ କୁହନ୍ତି ଯେତେବେଳେ ସେ ଗୁନ୍ଦୁଲପେଟ ତାଙ୍କର ଏକ କାର୍ କିଣିବାକୁ ଯାଉଥିଲେ ସେତେବେଳେ ସେ ବାଟରେ ଏକ ଅଜଣା ମୃତଦେହ ନିକଟରେ ଜନଗହଳି ଦେଖିଥିଲେ। ଏହାପରେ ସେ କାର୍ କିଣି ଫେରିବା ପର୍ଯ୍ୟନ୍ତ ସେମିତି ସେହିଠାରେ ମୃତଦେହଟି ପଡି ରହିଥିବାବେଳେ କେହି ପୋଲିସକୁ ଖବର ମଧ୍ୟ ଦେଇ ନ ଥିଲେ। ଏହାପରେ କିଛି ଚିନ୍ତା ନ କରି ଆୟୁବ ନିଜ ହାତରେ ଅଜଣା ବ୍ୟକ୍ତିଙ୍କ ମୃତ ଦେହକୁ ଉଠାଇ କାର୍ରେ ଲଦି ଆଣି ଅନ୍ତିମ ସଂସ୍କାର କରିଥିଲେ। ଅବଶ୍ୟ ପୋଲିସକୁ ଖବର ନ ଦେଇଥିବାରୁ ଏହାର ପରିଣାମ ବି ତାଙ୍କୁ ଭୋଗିବାକୁ ପଡିଥିଲା। ଆଉ ଏ କଥା ଘର ଲୋକଙ୍କୁ କହିବା ପରେ ଏମିତି ବିରୋଧର ଶିକାର ହୋଇଥିଲେ ଯେ ଶେଷରେ ସେ ଘର ଛାଡି ବେଙ୍ଗାଲୁର ଚାଲି ଯାଇଥିଲେ। ସେଠାରେ ମଧ୍ୟ ସେ ଏହି କାମକୁ ଜାରି ରଖିଲେ। ଏମିତି ଦିନେ ସ୍ଥିର କଲେ କି ସେ ନିଜ ଗାଁକୁ ଫେରି ମା’ବାପାଙ୍କୁ ଏକଥା ବୁଝାଇବେ। ତାହାହିଁ ହେଲା ଆଉ ଏଥିରେ ତାଙ୍କ ମା’ ସହଯୋଗର ହାତ ବଢାଇଲେ। ସେବେଠାରୁ ଆଜି ପର୍ଯ୍ୟନ୍ତ ପ୍ରାୟ ୨୦ ବର୍ଷ ମଧ୍ୟରେ ସେ ପାଖାପାଖି ୧୦ ହଜାର ଅଜଣା ମୃତଦେହର ସଂସ୍କାର କରି ସାରିଥିବା କୁହନ୍ତି। ଆଉ ଏଥିରେ ଖର୍ଚ୍ଚ ହେଉଥିବା ଅର୍ଥ ତାଙ୍କ ରୋଜଗାରର ଏକ ଭାଗ ବୋଲି ସେ କୁହନ୍ତି। ଆୟୁବ ତାଙ୍କ ଆୟକୁ ୩ ଭାଗ କରି ଦେଇଥିବା ବେଳେ ଆଉ ଗୋଟିଏ ଭାଗ ନିଜ ଘର ଖର୍ଚ୍ଚ ଓ ଅନ୍ୟ ଭାଗଟିକୁ ଫୁଟ୍ପାଥରେ ରହୁଥିବା ଲୋକଙ୍କ ପାଇଁ ଖର୍ଚ୍ଚ କରନ୍ତି। ଏବେ କିନ୍ତୁ ଆୟୁବଙ୍କର ଏହି କାମ ପାଇଁ ତାଙ୍କୁ ବହୁ ପ୍ରଶଂସା ମିଳୁଛି ହେଲେ ଏହାକୁ ଦେଖିବାକୁ ତାଙ୍କ ନିକଟର ତାଙ୍କ ମା’ ନ ଥିବା ସେ କୋହଭରା କଣ୍ଠରେ ପ୍ରକାଶ କରନ୍ତି। ଏବେ ତାଙ୍କ ସ୍ତ୍ରୀ ତାଙ୍କୁ ଏଥିରେ ସହଯୋଗ କରୁଥିବା ସେ କହିଛନ୍ତି।
