ଆଳି,୧୦ା୪(ଡି.ଏନ.ଏ.)କେନ୍ଦ୍ରାପଡ଼ା ଜିଲାର ଆଳି ଅଞ୍ଚଳରୁ ଜଣେ କରୋନା ଆକ୍ରାନ୍ତ ଚିହ୍ନଟ ହେବାପରେ ଜିଲା ପ୍ରଶାସନ ପକ୍ଷରୁ ଆକ୍ରାନ୍ତଙ୍କ ଗ୍ରାମର ୩ କିମି ପରିଧି ମଧ୍ୟରେ ଥିବା ୧୨ ଗାଁ ଓ ବଜାରକୁ ମଙ୍ଗଳବାର ସକାଳ ୮ଟାଠାରୁ ୪୮ଘଣ୍ଟା ପାଇଁ ଶଟଡାଉନ ଘୋଷଣା କରାଯାଇଥିଲା। ଗୁରୁବାର ସକାଳ ୮ଟାରେ ପ୍ରଶାସନ ପକ୍ଷରୁ ଏହି ଶଟ୍ଡାଉନକୁ ଉଠାଇ ଦିଆଯାଇଥିବାବେଳେ ଲକ୍ଡାଉନ ବଳବତ୍ତର ରହିଛି। ଶଟଡାଉନ ନିମନ୍ତେ ଆଳି ବଜାରରେ ବନ୍ଦ ରହିଥିବା ଅତ୍ୟାବଶ୍ୟକ ସାମଗ୍ରୀ ଦୋକାନଗୁଡିକ ଗୁରୁବାର ସକାଳୁ ଖୋଲିଥିଲା। ଲୋକେ ଅତ୍ୟାବଶ୍ୟକ ସାମଗ୍ରୀ କିଣିବା ପାଇଁ ବଜାରକୁ ଆସିଥିବା ଦେଖିବାକୁ ମିଳିଥିଲା। ପ୍ରଶାସନର ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ ସକାଳ ୬ଟାରୁ ୧୧ଟା ପର୍ଯ୍ୟନ୍ତ ଦୋକାନ ଖୋଲା ରହିଥିଲା। ଏହାପରେ ବଜାର ପୁଣି ଶୂନଶାନ ହୋଇ ଯାଇଥିଲା। ପୋଲିସ ପକ୍ଷରୁ ପାଟ୍ରୋଲିଂ କଡାକଡି କରାଯିବା ସହ ବଜାରକୁ ବାଇକ ନ ଆଣିବା ଓ ସମସ୍ତଙ୍କୁ ମାସ୍କ ପିନ୍ଧିବା ପାଇଁ ବାଧ୍ୟ କରାଯାଇଥିଲା। ଅପରପକ୍ଷେ କରୋନା ଆକ୍ରାନ୍ତଙ୍କ ଦୂର ସମ୍ପର୍କୀୟ ୯ ଜଣଙ୍କ ସ୍ବାବ୍ ପରୀକ୍ଷା ନିମନ୍ତେ ଜିଲା କୋଭିଡ୍-୧୯ ଟିମ ନେଇଥିବା ସୂଚନା ମିଳିଛି। ଆଳି ବ୍ଲକର ଆଳି ବଜାର, ମେଣ୍ଢପୁର ପଞ୍ଚାୟତ ଓ ନିଆଳ ପଞ୍ଚାୟତର ୧୩ ସ୍ଥାନରେ ନିୟୋଜିତ ହୋଇଥିବା ଆକ୍ଟିଭ ସର୍ଭିଲାନ୍ସ ଟିମ୍ ସର୍ଭେ କରି ୪ ଜଣଙ୍କ ଦେହରେ ସାମାନ୍ୟ ନମୁନା ଥିବା ଲକ୍ଷ୍ୟ କରି ତାଙ୍କ ସ୍ବାବ ସଂଗ୍ରହ କରିଥିବା ବେଳେ ଜିଲା କୋଭିଡ୍-୧୯ ଟିମ୍ ଦୂର ସମ୍ପକୀୟ ଅନ୍ୟ ୫ ଜଣଙ୍କ ସ୍ବାବ ନେଇଛନ୍ତି। ଆକ୍ରାନ୍ତଙ୍କ ଇନଡାଇରେକ୍ଟ କଣ୍ଟାକ୍ଟରେ ଆସିଥିବା ଆଉ କେତେଜଣଙ୍କୁ ଷ୍ଟ୍ରେସ କରାଯାଉଛି ବୋଲି ଆଳି କରୋନା ନୋଡାଲ ହେଲ୍ଥ ଅଫିସର ଡା. ଇନ୍ଦ୍ରଭାନୁ ପ୍ରଧାନ ସୂଚନା ଦେଇଛନ୍ତି।
