ଓ୍ବାଶିଂଟନ,୨୮-୭: ଭାରତ ସମେତ ବିକାଶଶୀଳ ରାଷ୍ଟ୍ର ପଛରେ ପଡିଯାଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ବିକାଶଶୀଳ ରାଷ୍ଟ୍ରର ଦ୍ୱାହି ଦେଇ ଆମେରିକା ଠାରୁ ଅନୁଚିତ ଲାଭ ନେଉଥିବା ଭାରତ ସମେତ ସମସ୍ତ ବିକାଶଶୀଳ ରାଷ୍ଟ୍ରକୁ ଆଉ କୌଣସି ପ୍ରକାର ସୁବିଧାସୁଯୋଗ ଦେବାକୁ ସେ ଚାହୁଁନାହାନ୍ତି। ଏହି ଆମତ୍ଘୋଷିତ ଦେଶଗୁଡ଼ିକ ଯେପରି ଆମେରିକା ଠାରୁ ଅଯଥା ସହାୟତା ନେଇ ନ ପାରିବେ ସେଥିଲାଗି ନିୟମରେ ପରିବର୍ତ୍ତନ ପାଇଁ ଟ୍ରମ୍ପ ତାଙ୍କ ପ୍ରଶାସନକୁ ୯୦ ଦିନ ସମୟ ଦେଇଛନ୍ତି। କେଉଁମାନେ ବିକାଶଶୀଳ ରାଷ୍ଟ୍ର ତାହା ଏବେ ଟ୍ରମ୍ପ ପ୍ରଶାସନ ସ୍ଥିର କରିବାକୁ ଯାଉଛି।
ଆମେରିକା ରାଷ୍ଟ୍ରପତି କହିଛନ୍ତି ଯେ, ବିଶ୍ୱ ବାଣିଜ୍ୟ ସଂଗଠନ(ଡବ୍ୟ୍ଲୁଟିଓ)ର ପ୍ରାୟ ଦୁଇ ତୃତୀୟାଂଶ ସଦସ୍ୟ ରାଷ୍ଟ୍ର ନିଜକୁ ବିକାଶଶୀଳ ରାଷ୍ଟ୍ର ଭାବେ ଉଲ୍ଲେଖ କରି ଆମେରିକାଠାରୁ ସ୍ବତନ୍ତ୍ର ସହାୟତା ନେଉଛନ୍ତି। ସେ କହିଛନ୍ତି ଯେ, ବିଶ୍ୱର ଧନୀ ରାଷ୍ଟ୍ରଗୁଡ଼ିକ ନିଜକୁ ବିକାଶଶୀଳ ଦେଶ ଭାବେ ଉଲ୍ଲେଖ କରୁଥିବାରୁ ଏବେ ଡବ୍ଲ୍ୟୁଟିଓ ଭାଙ୍ଗିଯାଇଛି। କାରଣ ସେମାନେ ଏହି ସ୍ବତନ୍ତ୍ର ବ୍ୟବସ୍ଥା ଆଳରେ ନିଜ ପାଇଁ ଛାଡ଼ ଗୋଟାଇବାରେ ଲାଗିଛନ୍ତି। ଏଣିକି ଆଉ ତାହା ହେବ ନାହିଁ। ବ୍ୟବସ୍ଥାର ଫାଇଦା ଉଠାଇ ଏଣିକି ଏହି ଦେଶଗୁଡ଼ିକ ଆଉ ଆମେରିକାକୁ ଠକି ପାରିବେ ନାହିଁ। ସେଥିଲାଗି ସେ ଆମେରିକାର ବାଣିଜ୍ୟ ପ୍ରତିନିଧିଙ୍କ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି ବୋଲି ଟ୍ରମ୍ପ ପ୍ରକାଶ କରିଛନ୍ତି। ସମସ୍ତ ପ୍ରକାର ନିୟମ ପ୍ରୟୋଗ କରି ଡବ୍ଲୁଟିଓରେ ପରିବର୍ତ୍ତନ କରିବାକୁ ସେ ତାଙ୍କର ବାଣିଜ୍ୟ ପ୍ରତିନିଧିଙ୍କୁ ନିର୍ଦ୍ଦେଶ ଦେଇଛନ୍ତି ବୋଲି ରାଷ୍ଟ୍ରପତି ଟ୍ରମ୍ପ କହିଛନ୍ତି। ଏହାଦ୍ୱାରା ସେହି ତଥାକଥିତ ବିକାଶଶୀଳ ଦେଶଗୁଡ଼ିକ ଆଉ ଆମେରିକାଠାରୁ ଫାଇଦା ନେଇପାରିବେ ନାହିଁ ବୋଲି ସେ ପ୍ରକାଶ କରିଛନ୍ତି। ବିଶେଷଜ୍ଞଙ୍କ କହିବାନୁଯାୟୀ, ଡବ୍ଲ୍ୟୁଟିଓରେ ପ୍ରସ୍ତାବ ଦେବା ବଦଳରେ ଆମେରିକା ଏକତରଫା ଭାବେ ବିକାଶଶୀଳ ଦେଶର ସଜ୍ଞା ନିରୂପଣ କରିବା ବିପଦପୂର୍ଣ୍ଣ ଓ ଅଦ୍ଭୁତପୂର୍ବ।
