ଚେନ୍ନାଇ,୨ା୯: ଭାରତର ସ୍ଥଳଭାଗ ପରେ ଜଳପଥରେ ଅନୁପ୍ରବେଶ କରୁଛି ଚାଇନା। ଭାରତୀୟ ମହାସାଗର କ୍ଷେତ୍ର (ଆଇଓଆର୍)ରେ ଚାଇନାର ଆଡ୍ଭାନ୍ସ ସର୍ଭିଲାନ୍ସ ଜାହାଜ ପ୍ରବେଶ କରି ନୌସେନାର ଅତ୍ୟନ୍ତ ସମ୍ବେଦନଶୀଳ ତଥା ଗୋପନୀୟ ତଥ୍ୟ ସଂଗ୍ରହ କରୁଛି। ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ନିୟମିତ ଭାବେ ଏହାର ଗୁପ୍ତଚର ଜାହାଜକୁ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ ଉପକୂଳକୁ ପଠାଉଥିବା ଜଣାପଡ଼ିବା ପରେ ଭାରତର ପ୍ରତିରକ୍ଷା ବ୍ୟବସ୍ଥା ପ୍ରତି ବିପଦ ସୃଷ୍ଟି ହୋଇଛି।
କେନ୍ଦ୍ରୀୟ ଗୋଇନ୍ଦା ସଂସ୍ଥାଗୁଡ଼ିକର ରିପୋର୍ଟ ଅନୁସାରେ ନିକଟରେ ଚାଇନା ଏକ ଗୁପ୍ତଚର ଜାହାଜକୁ ଭାରତର ଏକ୍ସକ୍ଲୁସିଭ୍ ଇକୋନୋମିକ୍ ଜୋନ୍ (ଇଇଜେଡ୍)କୁ ପଠାଇଥିଲା। ‘ତାଇଆନ୍ଓ୍ବାଙ୍ଗ୍ଜିଙ୍ଗ୍’ ନାମକ ଡୋଙ୍ଗ୍ଡିଆଓ ଶ୍ରେଣୀର ଏହି ଜାହାଜ ସେଠାରେ କିଛିଦିନ ରହି ଭାରତୀୟ ନୌସେନା ଶିବିରଗୁଡ଼ିକର ଗୋପନୀୟ ତଥ୍ୟ ସଂଗ୍ରହ କରିଥିଲା। ଆଣ୍ଡାମାନ ନିକୋବର ଦ୍ୱୀପପୁଞ୍ଜର ପୂର୍ବାଞ୍ଚଳ ସମୁଦ୍ର ସୀମାରେ ଏହାକୁ ଠାବ କରାଯାଇଥିଲା। କେବଳ ଥରେ ନୁହେଁ, ବରଂ ନିୟମିତ ଭାବେ ପିଏଲ୍ଏର ଜାହାଜ ଆଇଓଆର୍କୁ ଆସି ଏପରି ତଥ୍ୟ ଯୋଗାଡ଼ କରୁଛି। ସେଠାକାର କେଉଁ କେଉଁ ସ୍ଥାନରେ ଭାରତୀୟ ନୌସେନା ଘାଟି ରହିଛି ଓ ଯୁଦ୍ଧଜାହାଜ ମୁତୟନ କରାଯାଇଛି ସେନେଇ ଉଚ୍ଚକ୍ଷମତାସମ୍ପନ୍ନ ସର୍ଭିଲାନ୍ସ ଜରିଆରେ ଗୁପ୍ତଚରଗିରି କରିବା ପରେ ଚାଇନାକୁ ତଥ୍ୟ ପ୍ରେରଣ କରୁଛି। ଏହି ଜାହାଜରେ ତିନୋଟି ସାଟେଲାଇଟ୍ କମ୍ୟୁନିକେଶନ ରହିଛି। ଏହାର ବୃହତ୍ ଆଣ୍ଟିନା ବୈଦ୍ୟୁତିକ ଗୋଇନ୍ଦା ସଙ୍କେତକୁ ଅନୁଧ୍ୟାନ ଓ ବାଲିଷ୍ଟିକ୍ ମିଶାଇଲ୍ର ଅବସ୍ଥିତିକୁ ଠାବ କରିବାରେ ସକ୍ଷମ।
ଆଣ୍ଡାମାନ ନିକୋବର ଦ୍ୱୀପପୁଞ୍ଜ ହେଉଛି ନୌସେନାର ଏକ ଗୁରୁତ୍ୱପୂର୍ଣ୍ଣ ତଥା ସମ୍ବେଦନଶୀଳ ଘାଟି। ପୋର୍ଟ ବ୍ଲେୟାରରେ ଭାରତୀୟ ସଶସ୍ତ୍ର ବଳର ପ୍ରଥମ ଓ ଏକମାତ୍ର ଟ୍ରାଇ-ସର୍ଭିସ୍ ଥିଏଟର କମାଣ୍ଡ ରହିଛି। ଉକ୍ତ କ୍ଷେତ୍ରରେ ଟାଇପ୍ ୮୧୫ଜି ଶ୍ରେଣୀର ଅତ୍ୟାଧୁନିକ ଇଲେକ୍ଟ୍ରୋନିକ ସର୍ଭିଲାନ୍ସ ଜାହାଜ ତାଇଆନ୍ଓ୍ବାଙ୍ଗ୍ଜିଙ୍ଗ୍ର ଉପସ୍ଥିତି ଭାରତୀୟ ନିରାପତ୍ତା ପ୍ରତିଷ୍ଠାନଗୁଡ଼ିକ ପାଇଁ ବିପଦ ସୃଷ୍ଟି କରିଛି। ଗତ ଡିସେମ୍ବରରେ ମଧ୍ୟ ଏହି ଜାହାଜ ଆଇଓଆର୍ରେ ଦୁଇ ସପ୍ତାହ ଧରି ଘୂରି ବୁଲୁଥିଲା ବୋଲି ଜଣେ ପ୍ରତିରକ୍ଷା ଅଧିକାରୀ ସୂଚନା ଦେଇଛନ୍ତି। ଅନ୍ୟପକ୍ଷରେ ଚାଇନା ଏହାର ସହଯୋଗୀ ପାକିସ୍ତାନର ଗ୍ବାଦର ଓ କରାଚୀ ନୌସେନା ଘାଟିର ଆଧୁନିକୀକରଣ କରୁଛି। ଭାରତ ଉପରେ ଗୁପ୍ତଚରଗିରି କରିବା ପାଇଁ ଚାଇନା ଏହି ଘାଟିଗୁଡ଼ିକୁ ବ୍ୟବହାର କରୁଛି। ଅଗଷ୍ଟ ୫ରେ ଜମ୍ମୁ-କଶ୍ମୀର ସମ୍ପର୍କିତ କେନ୍ଦ୍ର ସରକାରଙ୍କ ନିଷ୍ପତ୍ତି ପରେ ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ଲାଗିରହିଥିବାବେଳେ କେନ୍ଦ୍ରଶାସିତ ଅଞ୍ଚଳ ଲଦାଖକୁ ନେଇ ଚାଇନା କ୍ଷୁବ୍ଧ ହୋଇଛି। ଏଭଳି ସ୍ଥିତିରେ ସଂଗୃହୀତ ଗୋପନୀୟ ତଥ୍ୟକୁ ଭାରତ ବିରୋଧରେ ଚାଇନା ଓ ପାକିସ୍ତାନ ବ୍ୟବହାର କରିପାରନ୍ତି ବୋଲି ଆଶଙ୍କା କରାଯାଉଛି। ତେଣୁ ଭାରତୀୟ ଜଳସୀମାରେ ରହଣି କାଳରେ ଏହି ଜାହାଜ ବେଜିଂକୁ କେଉଁସବୁ ଗୋପନୀୟ ତଥ୍ୟ ପଠାଇଛି ଏବଂ ଏହା ପଛରେ କି ଉଦ୍ଦେଶ୍ୟ ରହିଛି ତାହା ଜାଣିବା ପାଇଁ ତଦନ୍ତକାରୀ ସଂସ୍ଥାଗୁଡ଼ିକ ଖୋଳତାଡ଼ କରୁଛନ୍ତି।
