ଛତ୍ରପୁର,୧ା୧୨(ଡି.ଏନ.ଏ)-ଗଞ୍ଜାମ ଜିଲାରେ ରବିବାରରୁ ଟ୍ରାଫିକ୍ ନିୟମ କଡାକଡି ପାଳନ କରାଯିବ। ନିୟମ ଉଲ୍ଲଂଘନକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପରିବହନ କମିଶନରଙ୍କଠାରୁ ଏକ ଚିଠି ଗଞ୍ଜାମ ଜିଲାପାଳଙ୍କ ପାଖକୁ ଆସିଛି। ଏହିପରିପ୍ରେକ୍ଷୀରେ ସ୍ପିଡ୍ ଗାଡି ଚଳାଇବା, ରେଡ୍ ଲାଇଟ୍ ଜମ୍ପିଂ, ମଦ୍ୟ ପାନ, ମୋବାଇଲ ଫୋନରେ କଥା ହୋଇ ଗାଡି ଚଳାଇବା, ହେଲମେଟ ପିନ୍ଧି ନ ଥିବା ଓ ସିଟ୍ ବେଲ୍ଟ ବାନ୍ଧି ନ ଥିବା ଏବଂ ଓଭରଲୋଡ୍ ଯାତ୍ରୀ ଥିବା ଗାଡିରେ ସମ୍ପୃକ୍ତଙ୍କ ବ୍ୟକ୍ତିଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚିଠିରେ ଉଲ୍ଲେଖ ରହିଛି। ଶନିବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଅନୁଷ୍ଠିତ ଜିଲା ସଡକ ସୁରକ୍ଷା କମିଟି ବୈଠକରେ ଜିଲାପାଳ ଉପରୋକ୍ତ ସୂଚନା ଦେବା ସହ ଏହାକୁ କଡାକଡି ପାଳନ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ବ୍ରହ୍ମପୁର ସହରରେ ବେଆଇନ୍ ଷ୍ଟପେଜ୍ରେ ଗାଡି ଅଟଳିଲେ କାର୍ଯ୍ୟାନୁଷ୍ଠାନ ରବିବାରରୁ ଆରମ୍ଭ ହେବ। ବ୍ରହ୍ମପୁର ସହରର ବିଭିନ୍ନ ଛକ ଗୁଡିକରେ ସିସି କ୍ୟାମେରା ଲାଗିଛି। ଏହାର ଫୁଟେଜ୍କୁ ଆଧାର କରି ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୈଠକରେ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଛତ୍ରପୁରର ଡିଆରଡିଏ ଛକରେ ସିସି କ୍ୟାମେରା ଲଗାଯିବ। ଏଥିସହ ଜାତୀୟ ରାଜପଥରେ ସିସି କ୍ୟାମେରା ଲଗାଯିବାକୁ ପୂର୍ବରୁ ନିଷ୍ପତ୍ତି ହୋଇଛି। ଏହାଉପରେ ପଦକ୍ଷେପ ନିଆଯାଉଥିବା ଏନଏଚଏଆଇ କର୍ତ୍ତୃପକ୍ଷ କହିଥିଲେ। ଜାତୀୟ ରାଜପଥରେ ବେଆଇନ୍ ଭାବେ ଡିଭାଇଡର ଭାଙ୍ଗିଥିବା ସ୍ଥାନକୁ ଚିହ୍ନଟ କରି ପଦକ୍ଷେପ ନେବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଜାତୀୟ ରାଜପଥ ଉପରେ ବୁଲୁଥିବା ଗୋରୁଙ୍କୁ ଧରି ଗୋପାଳକମାନଙ୍କୁ ଦାନ କରିବାକୁ ଏନଏଚ୍ଏଆଇ କର୍ତ୍ତୃପକ୍ଷଙ୍କୁ କୁହାଯାଇଛି। ଗାଡି ଗୁଡିକରେ ଅଗ୍ନି ନିର୍ବାପକ ଓ ଫାଷ୍ଟଏଡ୍ ବ୍ୟବସ୍ଥା ଅଛି କି ନାହିଁ ତାର ଯାଞ୍ଚ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତିି। ଏହି ବୈଠକରେ ଗଞ୍ଜାମ ଏସ୍ପି ବ୍ରିଜେଶ କୁମାର ରଏ, ବ୍ରହ୍ମପୁର ଏସ୍ପି ପିନାକ ମିଶ୍ର, ଛତ୍ରପୁର ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟି, ବ୍ରହ୍ମପୁର ଉପଜିଲାପାଳ ସିନ୍ଧେ ଦତାତ୍ରୟ ଭାଉସାହେବ, ଭଞ୍ଜନଗର ଉପଜିଲାପାଳ ରାଜେନ୍ଦ୍ର ମିଞ୍ଜ, ଆରଟିଓ ସଞ୍ଜୟ ବିଶ୍ୱାଳ, ଏମ୍ଭିଆଇ ସମୀର ଦଳେଇ, ଡିଏସ୍ପି ଉତ୍କଳ କେଶରୀ ଦାସ ପ୍ରମୁଖ ଉପସ୍ଥିତ ଥିଲେ।
