ସିଡନୀ, ୨୧।୩(ପି.ଟି.): ଅକ୍ଟୋବରରେ ଆୟୋଜନ ହେବାକୁ ଥିବା ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ପୁରୁଷ ଟି୨୦ ବିଶ୍ୱକପ୍ରେ ସେମିଫାଇନାଲ ମ୍ୟାଚ୍ ଲାଗି ରିଜର୍ଭ ଡେ ରଖିବାକୁ କ୍ରିକେଟ ଅଷ୍ଟ୍ରେଲିଆ ପ୍ରସ୍ତାବ ଦେଇପାରେ। ଚଳିତ ବର୍ଷ ଶେଷ ଆଡକୁ ଆୟୋଜନ ହେବାକୁ ଥିବା ଆଇସିସି କ୍ରିକେଟ କମିଟି ବୈଠକରେ କ୍ରିକେଟ ଅଷ୍ଟ୍ରେଲିଆ ଏ ନେଇ ପ୍ରସ୍ତାବ ରଖିବ। ଚଳିତ ମାସ ପ୍ରାରମ୍ଭରେ ଅନୁଷ୍ଠିତ ମହିଳା ଟି୨୦ ବିଶ୍ୱକପ୍ ନକ୍ଆଉଟ ପର୍ଯ୍ୟାୟରେ ରିଜର୍ଭ ଡେ ରଖି ନ ଥିବାରୁ ଆଇସିସି ବେଶ୍ ସମାଲୋଚିତ ହୋଇଥିଲା। ଯାହାଫଳରେ ଇଂଲଣ୍ଡକୁ ସେମିଫାଇନାଲ ନ ଖେଳି ବିଶ୍ୱକପରୁ ବାଦ୍ ହେବାକୁ ପଡିଥିଲା। ଭାରତ- ଇଂଲଣ୍ଡ ସେମିଫାଇନାଲ ମ୍ୟାଚ୍ ବର୍ଷା ଯୋଗୁ ବାତିଲ ହୋଇଥିଲା। ଗ୍ରୁପ୍ରେ ଭାରତ ଶୀର୍ଷ ସ୍ଥାନରେ ଅଧିକାର କରିଥିବାରୁ ସିଧାସଳଖ ଫାଇନାଲକୁ ଉଠିଥିଲା। ତେବେ ଇଂଲଣ୍ଡ ନିରାଶ ହୋଇଥିଲା। ଫଳରେ ବିଶ୍ୱବ୍ୟାପୀ କ୍ରିକେଟ ପ୍ରଶଂସକ ଆସନ୍ତୋଷ ଜାହିର କରିଥିଲେ।
କିନ୍ତୁ ଆଇସିସିର ଏବେକାର ନିୟମ ଅନୁସାରେ ଅକ୍ଟୋବର ୧୮ ତାରିଖରେ ଆରମ୍ଭ ହେବାକୁ ଯାଉଥିବା ପୁରୁଷ ଟି୨୦ ବିଶ୍ୱକପ୍ ଫାଇନାଲ ପୂର୍ବରୁ କୌଣସି ମ୍ୟାଚ୍ ପାଇଁ ରିଜର୍ଭ ଡେ’ର ବ୍ୟବସ୍ଥା ନାହିଁ। ଫାଇାନାଲ ମ୍ୟାଚ୍ ନଭେମ୍ବର ୧୫ ତାରିଖରେ ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି)ରେ ଖେଳାଯିବ। ପୁରୁଷ ୨୦ ବିଶ୍ୱକପ୍ର ପ୍ଲେଇଙ୍ଗ କଣ୍ଡିସନ ଉପରେ କ୍ରିକେଟ କମିଟିରେ ସବିଶେଷ ଆଲୋଚନା କରାଯିବ ବୋଲି ଆଇସିସିର ଜଣେ ମୁଖପାତ୍ର କହିଛନ୍ତି। ତେବେ ଏହାପୂର୍ବରୁ ମୁଖ୍ୟ କାର୍ଯ୍ୟନିର୍ବାହୀ କମିଟି (ସିଇସି) ବୈଠକରେ ଔପଚାରିକ ଭାବେ ଆଲୋଚନା ହେବା ସହ ସ୍ବାକ୍ଷର ହେବ। କ୍ରିକେଟ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କେଭିନ ରବଟର୍ସ ମଧ୍ୟ ସିଇସି ବୈଠକରେ ଯୋଗ ଦେବେ। ବିଶ୍ୱକପ୍ ନକ୍ଆଉଟ୍ ମ୍ୟାଚ୍ଗୁଡିକରେ ରଜର୍ଭ ଡେ ସାମିଲ କରିବାକୁ ପ୍ରୟାସ କରାଯିବ ବୋଲି ରବଟର୍ସ କହିଛନ୍ତି। ଉଲ୍ଲେଖଥାଉ କି, ଗତବର୍ଷ ଅନୁଷ୍ଠିତ ପ୍ଲେଇଙ୍ଗ କଣ୍ଡିସନକୁ ଦୃଷ୍ଟିରେ ରଖି ଦିନିକିଆ ବିଶ୍ୱକପ୍ରେ ନକ୍ଆଉଟ୍ ମୁକାବିଲା ପାଇଁ ରଜର୍ଭ ଡେ’ର ବ୍ୟବସ୍ଥା କରାଯାଇଥିଲା।
