ନୂଆଦିଲ୍ଲୀ,୨୮।୫(ପି.ଟି.): ଚଳିତ ବର୍ଷ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ନେଇ ଭାରତୀୟ ପୂର୍ବତନ ଅଧିନାୟକ ତଥା କିଙ୍ଗ୍ସ ଏକାଦଶ ପଞ୍ଜାବ ହେଡ କୋଚ୍ ଅନିଲ କୁମ୍ବଲେ ବେଶ୍ ଆଶାଦାବୀ ଅଛନ୍ତି। ବିନା ଦର୍ଶକଙ୍କ ଉପସ୍ଥିତିରେ ଫାଙ୍କା ଷ୍ଟାଡିୟମରେ ଆଇପିଏଲ୍ ଆୟୋଜନକୁ ସେ ମଧ୍ୟ ବିରୋଧ କରିନାହାନ୍ତି। ଅବଶ୍ୟ ଆଇପିଏଲ୍ ଆୟୋଜନ ନେଇ ଏପର୍ଯ୍ୟନ୍ତ କିଛି ସ୍ପଷ୍ଟ କରାଯାଇନାହିଁ। କିନ୍ତୁ ଏନେଇ ଆକଳନ ଜାରି ରହିଛି। ଅକ୍ଟୋବରରେ ଆଇପିଏଲ ଆୟୋଜନ କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଚାହୁଛି। କୋଭିଡ୍- ୧୯ ମହାମାରୀ ପାଇଁ ଆଇପିଏଲକୁ ପୂର୍ବରୁ ଅନିର୍ଦ୍ଧିଷ୍ଟ କାଳ ପାଇଁ ଘୁଞ୍ଚାଇ ଦିଆଯାଥିଲା।
ଆଇପିଏଲ୍ ନେଇ ଆଶାବାଦୀ ଅଛି ଓ ଏ ନେଇ ସମ୍ଭାବନା ରହିଛି ବୋଲି କୁମ୍ବଲେ ଷ୍ଟାର ସ୍ପୋଟର୍ସ ଶୋ ‘କ୍ରିକେଟ କନେକ୍ଟେଡ’କୁ ସାକ୍ଷାତକାର ଦେବା ଅବସରରେ କହିଛନ୍ତି। ଯଦି ଫାଙ୍କା ଷ୍ଟାଡିୟମରେ ଏହା ଆୟୋଜନ ହୁଏ ତେବେ ୩ କିମ୍ବା ୪ଟି ଆଇପିଏଲ୍ ସୀମିତ ରହିବ। ତେଣୁ ଆଇପିଏଲ୍କୁ ନେଇ ଆମେ ବେଶ୍ ଆଶାବାଦୀ ଅଛୁ ବୋଲି ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) କ୍ରିକେଟ କମିଟିର ଅଧ୍ୟକ୍ଷ କୁମ୍ବଲେ କହିଛନ୍ତି।
ସେହିପରି ପୂର୍ବତନ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ ମଧ୍ୟ ସମାନ ମତ ପୋଷଣ କରିଛନ୍ତି। ଯାତ୍ରା ଜନିତ ସମସ୍ୟାକୁ କମାଇବା ପାଇଁ ଏକାଧିକ ଷ୍ଟାଡିୟମ ଥିବା ସହରଗୁଡିକରେ ଆଇପିଏଲ୍ ଆୟୋଜନ ହୋଇପାରେ ବୋଲି ସେ ମତ ଦେଇଛନ୍ତି। ଯେଉଁ ୩ କିମ୍ବା ୪ଟି ଷ୍ଟାଡିୟମ ଥିବା ଭେନ୍ୟୁକୁ ଚିହ୍ନଟ କରିବାର ଆବଶ୍ୟକତା ରହିଛି। ବିସିସିଆଇ ଓ ଫ୍ରାଞ୍ଚାଇଜ୍ମାନେ ଏ ନେଇ ବ୍ୟବସ୍ଥା କରିବେ ନେଇ ନିଶ୍ଚିତ ଅଛି ବୋଲି ଲକ୍ଷ୍ମଣ କହିଛନ୍ତି।
