ମୁମ୍ବାଇ,୬।୧୧(ପି.ଟି.)- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଗଭର୍ନିଂ କାଉନସିଲ୍ରେ ସୋମବାର କୋତୋଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଆଇପିଏଲ୍ରେ ନୋ ବଲ ନେଇ ଠିକ ନିଷ୍ପତ୍ତି ପାଇଁ ଏଥର ସ୍ବତନ୍ତ୍ର ଅମ୍ପାୟର ନିଯୁକ୍ତ ହେବ। ଗତ କେତୋଟି ସଂସ୍କରଣରେ ନୋ ବଲ୍ ନେଇ ଫିଲ୍ଡ ଅମ୍ପାୟରଙ୍କ ନିଷ୍ପତ୍ତିରେ ଏକାଧିକ ତ୍ରୁଟି ଦେଖା ଦେଇଥିଲା ଓ ଏ ନେଇ ଯଥେଷ୍ଟ ବିବାଦ ଦେଖାଦେଇଥିଲା। ଏହା ଭାରତୀୟ ଅମ୍ପାୟରଙ୍କ ଦୋଷ ଦୁର୍ବଳତାକୁ ପଦାରେ ପକାଇଥିଲା। ଫଳରେ ଗଭର୍ନିଂ କାଉନସିଲ ନୋ ବଲର ଠିକ୍ ନିରୂପଣ ପାଇଁ ଏହି ନିଷ୍ପତ୍ତି ନେଇଛି।
ଏଥିସହିତ ଖେଳାଳି ବଦଳ ନେଇ ବହୁଚର୍ଚ୍ଚିତ ‘ପାଓ୍ବାରା ପ୍ଲେୟାର’ କନ୍ସେପ୍ଟ ଏଥର ଲାଗୁ କରା ନ ଯିବାକୁ ନିଷ୍ପତ୍ତି ନିଆଯାଇଛି। କାରଣ ଏହି ସପ୍ତାହ ଶେଷଆଡକୁ ଖେଳାଯିବାକୁ ଥିବା ସୟଦ ମୁସ୍ତାକ ଅଲ୍ଲୀ ଟ୍ରଫି (ଜାତୀୟ ଟି୨୦ ଟୁର୍ନାମେଣ୍ଟ)ରେ ଏହାର ପ୍ରୟୋଗ କରାଯିବନାହିଁ। ପୂର୍ବତନ ଟେଷ୍ଟ ବ୍ୟାଟ୍ସମ୍ୟାନ ବ୍ରଜେଶ ପଟେଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଫ୍ୟୁଚର ଟୁର ପ୍ରୋଗ୍ରାମ (ଏଫ୍ଟିପି) ଓ୍ବିଣ୍ଡୋ, ବିଦେଶୀ ଖେଳାଳିଙ୍କ ଉପଲବ୍ଧତା, ଭାରତୀୟ ଦଳର ଏଫ୍ଟିପି ଓ ବିଦେଶରେ ବନ୍ଧୁତ୍ୱପୂର୍ଣ୍ଣ ମ୍ୟାଚ୍ ଖେଳିବାର ସମ୍ଭାବନା ଉପରେ ଆଲୋଚନା ହୋଇଥିଲା।
ତେବେ ବୈଠକରେ ଫ୍ରଣ୍ଟ ଫୁଟ୍ ଓ ହାଇଟ୍ ନୋ ବଲ ନେଇ ସ୍ବତନ୍ତ୍ର ଅମ୍ପାୟର ନିଯୁକ୍ତ ନେଇ ଅଧିକ ଚର୍ଚ୍ଚା ହୋଇଥିଲା। ଯଦି ସବୁକିଛି ଠିକ୍ଠାକ ଚାଲେ ତାହାଲେ ଆଗାମୀ ଆଇପିଏଲ୍ରେ ନିୟମିତ ଅମ୍ପାୟରଙ୍କ ବ୍ୟତୀତ ନୋ ବଲ୍ ପାଇଁ ଅଲଗା ଅମ୍ପାୟରଙ୍କୁ ଦାୟିତ୍ୱ ଦିଆଯାଇପାରେ ବୋଲି ଗଭର୍ନିଂ କାଉନସିଲର ଜଣେ ସଦସ୍ୟ କହିଛନ୍ତି।
