ନୂଆଦିଲ୍ଲୀ, ୧୮।୬- ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଠିକ୍ ସମୟରେ ଆୟୋଜନ ହେବାରେ ପ୍ରଥମେ କରୋନା ଭାଇରସ ପ୍ରତିବନ୍ଧକ ସାଜିଥିଲା। ଏହି କାରଣରୁ ଆଇପିଏଲ୍ ସିଜନ-୧୩କୁ ଅନିର୍ଦ୍ଦିଷ୍ଟ ସମୟ ଲାଗି ସ୍ଥଗିତ ରଖିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ନିଷ୍ପତ୍ତି ନେଇଥିଲା। ତେବେ ବର୍ତ୍ତମାନ ଭାରତ ଓ ଚାଇନା ମଧ୍ୟରେ ଚାଲିଥିବା ସୀମା ବିବାଦ ଉଗ୍ର ରୂପ ଧାରଣ କରିଛି। ଏହି ବିବାଦ ଯୋଗୁ ପୁନର୍ବାର ଆଇପିଏଲ୍ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି। ଚାଇନାର ମୋବାଇଲ ଉତ୍ପାଦନକାରୀ ବ୍ରାଣ୍ଡ୍ ‘ଭିଭୋ’ ଆଇପିଏଲ୍ର ମୁଖ୍ୟ ପ୍ରାୟୋଜକ ରହିଛି। ସୀମାରେ ୨୦ ଭାରତୀୟ ଯବାନ ଶହୀଦ ହେବାପରେ ଚାଇନା ପ୍ରସ୍ତୁତ ସାମଗ୍ରୀ ବିକ୍ରିକୁ ଭାରତରେ ଜୋର୍ଦାର ବିରୋଧ କରାଯାଉଛି। ଏହାକୁ ନଜରରେ ରଖି ବିସିସିଆଇ ଆଇପିଏଲ୍ର ପ୍ରମୁଖ ପ୍ରାୟୋଜକ ରହିଥିବା ଭିଭୋକୁ ପରିବର୍ତ୍ତନ କରିବାକୁ ଚିନ୍ତା କରୁଥିବା ଜଣାପଡ଼ିଛି। ୨୦୧୮ରେ ଭିଭୋ ୨୧ ଶହ ୯୯ କୋଟି ଟଙ୍କା ବିନିମୟରେ ୫ ବର୍ଷ ଲାଗି ଆଇପିଏଲ୍ର ପ୍ରାୟୋଜକ ଅଧିକାର ହାସଲ କରିଥିଲା। ଯଦି ଆଗକୁ ଭାରତରେ ଲୋକମାନେ ଚାଇନା ସାମଗ୍ରୀକୁ ବିରୋଧ କରିବା ଜାରି ରଖନ୍ତି ତେବେ ବିସିସିଆଇ ଭିଭୋକୁ ହଟାଇବା ଲାଗି ବାଧ୍ୟ ହେବ। ଜାତୀୟ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ ବିସିସିଆଇର ଜଣେ ଅଧିକାରୀ କହିଛନ୍ତି, ‘ଦୁଇ ଦେଶ ମଧ୍ୟରେ ଯଦି ଏଭଳି ବିବାଦ ଲାଗି ରହେ ତେବେ କ’ଣ କରାଯାଇପାରିବ। ଆମର ପ୍ରଥମ ଲକ୍ଷ୍ୟ ହେଉଛି ଖାଲି ଷ୍ଟାଡିୟମରେ ହେଉ ପଛେ ଚଳିତ ବର୍ଷ ଆଇପିଏଲ୍ ଆୟୋଜନ କରିବା। ଆଇପିଏଲ୍ ଅନୁଷ୍ଠିତ ନ ହେଲେ ଆର୍ଥିକସ୍ତରରେ ଏହା ଆମକୁ ବଡ଼ କ୍ଷତି ପହଞ୍ଚାଇବ’। ଏହି ଅଧିକାରୀଜଣଙ୍କ ଆହୁରି ମଧ୍ୟ କହିଛନ୍ତି, ଯଦି ସରକାର ଆଦେଶ ଦିଅନ୍ତି ତେବେ ଭିଭୋ ସହ ମୁଖ୍ୟ ପ୍ରାୟୋଜକ ନେଇ ହୋଇଥିବା ଚୁକ୍ତି ବାତିଲ କରାଯିବ। ସେହିଭଳି ଭିଭୋକୁ ଭାରତରେ ବିଜନେସ କରିବା ଲାଗି ଯଦି ସରକାର ଅନୁମତି ଦିଅନ୍ତି ତେବେ କୌଣସି ଅସୁବିଧା ହେବନାହିଁ। ଏଠାରେ ଉଲ୍ଲେଖଯୋଗ୍ୟ, ଭାରତୀୟ ବଜାରରେ ସର୍ବାଧିକ ଆଧିପତ୍ୟ ବିସ୍ତାର କରିଥିବା ମୋବାଇଲ କମ୍ପାନୀ ତାଲିକାରେ ୨ୟ ସ୍ଥାନରେ ରହିଥିବା ଭିଭୋ ଆଇପିଏଲ୍ ପ୍ରାୟୋଜକ ବାବଦକୁ ବର୍ଷକୁ ବିସିସିଆଇକୁ ୪୪୦ କୋଟି ଟଙ୍କା ପ୍ରଦାନ କରୁଛି। ଏହାସହିତ ମାର୍କେଟିଂ ଓ ପ୍ରମୋଶନ ଲାଗି ଅତିରିକ୍ତ ୧୦୦ରୁ ୧୫୦ କୋଟି ଟଙ୍କା ଖର୍ଚ୍ଚ କରିଥାଏ।
