ଜାମଟିକ୍ରା, ୨୬।୮ (ଡି.ଏନ୍.ଏ.): ଅତାବିରା ବ୍ଲକ ବୁଗବୁଗା ପଁଚେତ୍ ଖଲିଆପାଲି-ପ୍ରଧାନଟିକ୍ରା ରାସ୍ତାର ଅବସ୍ତା ବହୁତ ଖରାପ ଅଛେ। ସୁଆଧିନତାର ୭୩ ବଛର ଉତାରୁ ବି ଇ ରାସ୍ତାର ଅବସ୍ତା ସୁଧ୍ରି ନାଇଁପାରି। ଖଲିଆପାଲିରୁ ପ୍ରଧାନଟିକ୍ରା ତକ୍ ଅଧ୍ କି.ମି. ରାସ୍ତା ଆଏଜ୍ ବି ମାଟି ରାସ୍ତା ହେଇ ପଡ଼ି ରହିଛେ। ଯେନ୍ଥିରଲାଗି ଏହେଦେ ବରଷା ଦିନେ ଇ ରାସ୍ତାଟା ଲୁକ୍କର ଲାଗି ମରନ୍ ଯଁତା ପାଲଟିଛେ। ପାଏନ୍ କାଦୋ ଭିତରେ ଥାନୀୟ ପ୍ରଧାନଟିକ୍ରାବାସୀ ବଡ଼ା ଗୁଲ୍ଗୁଲା ହେଇ ଯାଆସ କରୁଛନ୍। ରାସ୍ତାଟା ମରାମତି ଅଭାବୁ ଶତାଧିକ୍ ଗାଡ଼ଖାଲରେ ପୁରିକରି ଅଛେ। ବରଷା ଦିନେ ଇ ଖାଲମାନ୍କେ ପାଏନ୍ ଟୁଡ଼ି ସାଧା ଆଏଁଖ୍କେ ରାସ୍ତାଟା ସମାନ ଦିଶୁଛେ। ହେଲେ ଗାଡ଼ିମଟର, ସାଇକେଲରେ ଗଲାଆଏଲା ଲୋକ୍ ଇ ଗାଡ଼ଖାଲମାନକେ ରଝୋ କରି ପଡ଼ୁଛନ୍, ଅନେକ ଖଁଡ଼ିଆଡଁଡ଼ିଆ ବି ହେଉଛନ୍। ଯେନ୍ଥିରଲାଗି ଥାନୀୟ ଅଂଚଲବାସୀକର ଭିତରେ ଗୁଯେ ଅସନ୍ତୋଷର ଭାବ୍ ଦେଖ୍ବାକେ ମିଲୁଛେ। ସତେ ଯେନ୍ତା ଏହେଦେ ଇ ରାସ୍ତାଟା ଲୁକ୍କର ଲାଗି ମରନ୍ ଯଁତା ପାଲ୍ଟିଛେ, ଫିଦିନ୍ ଛୋଟବଡ଼ ଦୁରଘଟନାମାନ ଘଟୁଛେ। ଏହେଦେ ରାସ୍ତାର ଅବସ୍ତା ଏନ୍ତା ଯେ ଚାଏରଚକିଆ ଗାଡ଼ିମଟର ଯିବାର ଆଏବାର ବଁଦ୍ ହେଇଯାଇଛେ। ଇଆଡ଼େ ସ୍କୁଲ, କଲେଜରେ ପଢ଼ୁଥିବାର ଅଂଚଲର ଛାତ୍ରୀଛାତ୍ର ଇ ରାସ୍ତାରେ ଗଲାଆଏଲା ବେଲେ ନାନା ସମସିଆର ସାମ୍ନା କରୁଛନ୍। ଥାନୀୟ ପରଶାସନ ଇ ଦିଗେ ଦୁରୁଷ୍ଟି ଦେଇ ରାସ୍ତାଟା କଂକ୍ରିଟ କରବାକେ ଗାଁବାସୀ ଦାବି କରିଛନ୍।
