ସିଡ୍ନୀ,୧୦।୧(ଏଏଫ୍ପି)- କିମ୍ବଦନ୍ତୀ ଅଷ୍ଟ୍ରେଲିଆନ ଲେଗ୍ ସ୍ପିନର ଶେନ୍ ଓ୍ବର୍ନଙ୍କ ପଦାର୍ପଣ ଗ୍ରୀନ କ୍ୟାପ ୧ ନିୟୁତ ଅଷ୍ଟ୍ରେଲିଆନ ଡଲାରରେ ବିକ୍ରି ହୋଇଛି। ଭାରତୀୟ ମୁଦ୍ରାରେ ଏହାର ମୂଲ୍ୟ ୪.୯୭ କୋଟି ଟଙ୍କା। ଏହି ସମସ୍ତ ଅର୍ଥ ଦେଶର ଜଙ୍ଗଲରେ ଲାଗିଥିବା ନିଆଁ ଦ୍ୱାରା ହୋଇଥିବା କ୍ଷୟକ୍ଷତି ପୂରଣ କରିବା ପାଇଁ ରେଡ୍କ୍ରସ ପାଣ୍ଠିକୁ ପ୍ରଦାନ କରାଯିବ। ୧୪୫ ଟେଷ୍ଟ ଖେଳି ୭୦୮ ଉଇକେଟ ନେଇଥିବା ସ୍ପିନର ତାଙ୍କ ପୂରା କ୍ୟାରିୟରରେ ଏହି କ୍ୟାପ ପରିଧାନ କରିଥିଲେ। ତାଙ୍କ ପୂର୍ବରୁ କିମ୍ବଦନ୍ତୀ ବ୍ୟାଟ୍ସମ୍ୟାନ ଡୋନାଲ୍ଡ ବ୍ରାଡମ୍ୟାନଙ୍କ କ୍ୟାପ ମଧ୍ୟ ବିକ୍ରି ହୋଇଥିଲା। ଚ୍ୟାରିଟି ପାଇଁ ଉକ୍ତ କ୍ୟାପ ୨୦୦୩ରେ ୪୨୫ ଅଷ୍ଟ୍ରେଲିଆନ ଡଲାର ନିଲାମ ହୋଇଥିଲା। ଓ୍ବର୍ନ ତାଙ୍କ କ୍ୟାପର ଫଟୋକୁ ଟୁଇଟ୍ କରି ଲେଖିଛନ୍ତି, ନିଲାମରେ ଭାଗ ନେଇଥିବା ପ୍ରତ୍ୟେକଙ୍କୁ ଧନ୍ୟବାଦ। ସଫଳ ବିଡରଙ୍କୁ ଶୁଭେଚ୍ଛା। ଏତେ ମୂଲ୍ୟ ପାଇବି ବୋଲି ଆଶା କରି ନ ଥିଲି। ଆଦାୟ ହୋଇଥିବା ଅର୍ଥ ସିଧାସଳଖ ରେଡ୍କ୍ରସ ପାଣ୍ଠିକୁ ଦାନ କରାଯିବ। ଧନ୍ୟବାଦ। କ୍ୟାପ ସହ ଓ୍ବର୍ନଙ୍କ ହସ୍ତାକ୍ଷର ସାର୍ଟିଫିକେଟ ମଧ୍ୟ ରହିଥିଲା। ତେବେ କ୍ୟାପ କିଣିଥିବା ବିଡରଙ୍କ ପରିଚୟ ଏପର୍ଯ୍ୟନ୍ତ ଜଣାପଡ଼ି ନାହିଁ। ବାଗି ଗ୍ରୀନ କ୍ୟାପ ଅଷ୍ଟ୍ରେଲିଆ ଖେଳାଳିଙ୍କ ଟେଷ୍ଟ ପଦାର୍ପଣ ବେଳେ ପ୍ରଦାନ କରାଯାଏ। ଗତ ସୋମବାର ଏହି କ୍ୟାପ ନିଲାମ କରିବା ପାଇଁ ଓ୍ବର୍ନ ନିଷ୍ପତ୍ତି ନେଇଥିଲେ। ଉଲ୍ଲେଖଯୋଗ୍ୟ, ଗତ ୪ ମାସ ହେଲା ଜଙ୍ଗଲରେ ଲାଗିଥିବା ନିଆଁ ଯୋଗୁ କୋଟି କୋଟି ଜନ୍ତୁ ଜୀବନ ହରାଇଥିବାବେଳେ ୨ ହଜାର ଜନସାଧାରଣ ବାସହରା ହୋଇଛନ୍ତି। କେବଳ ଓ୍ବର୍ନ ନୁହନ୍ତି ଏବେକାର କ୍ରିକେଟରମାନେ ମଧ୍ୟ ସହାୟତା ପାଇଁ ଆଗେଇ ଆସିଛନ୍ତି। ତାଲିକାରେ କ୍ରିସ ଲିନ, ଗ୍ଲେନ ମ୍ୟାକ୍ସଓ୍ବେଲ, ଡାର୍ସି ଶଟ୍ ଟେନିସ ଖେଳାଳି ଆଶଲେ ବାର୍ଟି, ନିକି କିର୍ଗିଅସଙ୍କ ଭଳି ଆହୁରି ଅନେକ ରହିଛନ୍ତି।
