ବାଲେଶ୍ୱର ଅଫିସ, ୬।୭-ବାଲେଶ୍ୱର ମ୍ୟୁନିସିପାଲିଟି ଅନ୍ତର୍ଗତ ସୁନହଟ ଲାଲମହନ ଛକ ଓ କନକଦୁର୍ଗା ଛକ ସଂଲଗ୍ନ ରାସ୍ତାର କନକଦୁର୍ଗା ମନ୍ଦିର ନିକଟରେ ନିର୍ମାଣାଧୀନ ଥିବା କଲର୍ଭଟକୁ ଅଧାପନ୍ତରିଆ ଅବସ୍ଥାରେ ଛାଡି ଦିଆଯାଇଥିବାରୁ ଲୋକେ ଯାତାୟତରେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରତ୍ୟହ ୧୫ରୁ ଉର୍ଦ୍ଧ୍ୱ ପଞ୍ଚାୟତର ଲୋକେ ଏହି ରାସ୍ତା ଦେଇ ଯାତାୟତ କରିଥାନ୍ତି। ପର୍ବରୁ ରାସ୍ତାର ଅବସ୍ଥା ଖରାପ ହୋଇ ପଡ଼ିଥିବାରୁ ଗ୍ରାମବାସୀ ଏହାର ମରାମତି କରିବାକୁ ପୌରପାଳଙ୍କ ନିକଟରେ ଦାବି କରିଥିଲେ। ତଦନୁଯାୟୀ ରାସ୍ତା ନିର୍ମାଣ ସକାଶେ ୫୪ଲକ୍ଷ ଟଙ୍କା ମଞ୍ଜୁର ହୋଇଥିଲା। ମଞ୍ଜୁର ଅର୍ଥରେ ରାସ୍ତା, ନାଳ ଓ କଲଭର୍ଟ କାର୍ଯ୍ୟ ଲାଗି ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଥିଲା। ବର୍ଷେ ପୂର୍ବରୁ ରାସ୍ତାର କାମ ଆରମ୍ଭ ହୋଇ ଉଣା ଅଧିକେ ଶେଷ ହୋଇଥିଲେ ମଧ୍ୟ ନିର୍ମାଣାଧୀନ କଲଭର୍ଟ କାମ ଅଧାପନ୍ତରିଆ ହୋଇପଡିରହିଛି।
ଏ ସମ୍ପର୍କରେ ଅଞ୍ଚଳବାସୀ ଗତ ମାସ ୧୩ତାରିଖରେ ଜିଲାପାଳଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଜିଲାପାଳ ଅଭିଯୋଗ ଶୁଣି ମ୍ୟୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀଙ୍କୁ ତୁରନ୍ତ କାର୍ଯ୍ୟ ସାରିବାକୁ ନିର୍ଦ୍ଦେଶ ଦେଇଥିଲେ। କାର୍ଯ୍ୟନିର୍ବାହୀ ଅଧିକାରୀ ୱାର୍କ ସେକସନକୁ ଗତ ୨୪ତାରିଖରେ ଅବଗତ କରାଇଥିଲେ ମଧ୍ୟ ଏଯାଏ କାମ ହୋଇପାରି ନାହଁି। ସମ୍ପୃକ୍ତ ଠିକାଦାର ନିର୍ମାଣ କାର୍ଯ୍ୟ ବାବଦ ସମସ୍ତ ଉଠାଇ ନେଇଥିବା ଏବଂ ଏଭଳି ଅନିୟମିତତାରେ କେତେକ କର୍ମଚାରୀଙ୍କ ହାତ ରହିଥିବା ଅଞ୍ଚଳବାସୀଙ୍କ ପକ୍ଷରୁ ଭବାନୀ ଶଙ୍କର ନାୟକ ଓ ଦୀନବନ୍ଧୁ ଆଚାର୍ଯ୍ୟ ଅଭିଯୋଗ କରିଛନ୍ତି। ଆଗାମୀ ୧୫ଦିନ ଭିତରେ କାମ ଶେଷ କରା ନ ଗଲେ ରାସ୍ତାରୋକୋ ଆନ୍ଦୋଳନ କରାଯିବ ବୋଲି ସେମାନେ ଜିଲା ପ୍ରଶାସନଙ୍କୁ ଚେତାବନୀ ଦେଇଛନ୍ତି। ଏ ସମ୍ପର୍କରେ ସହକାରୀ ଯନ୍ତ୍ରୀ ପ୍ରଦୀପ କୁମାର ନାୟକଙ୍କୁ ପଚାରିବାରୁ ସେ କନିଷ୍ଠଯନ୍ତ୍ରୀଙ୍କୁ ଅବଗତ କରାଇଥିବା କହିଛନ୍ତି। ଯଥାଶୀଘ୍ର କାମ ନହେଲେ ବିହୀତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି।
