ମୁମ୍ବାଇ, ୨୧।୬- ରବିବାର ଗୋଟିଏ ଦିନରେ ଅନ୍ତର୍ଜାତୀୟ ଯୋଗ ଦିବସ ସାଙ୍ଗକୁ ବିଶ୍ୱ ପିତୃ ଦିବସ ପଡ଼ିଥିଲା। ଏହି ଅବସରରେ କ୍ରିକେଟ୍ କିମ୍ବଦନ୍ତୀ ସଚିନ ତେନ୍ଦୁଲକର ପୁଅ ଅର୍ଜୁନ ଓ ଝିଅ ସାରାଙ୍କ ସହ ଏକାଠି ପ୍ରାଣାୟମ କରି ଉଭୟ ପିତୃ ଓ ଯୋଗ ଦିବସ ପାଳନ କରିଥିବାର ଜଣାପଡ଼ିଛି। ସଚିନ ନିଜ ଟୁଇଟର୍ ଆକାଉଣ୍ଟରେ ଏହାର ଏକ ଫଟୋ ପୋଷ୍ଟ କରିଛନ୍ତି। ଯେଉଁଥିରେ ବାନ୍ଦ୍ରସ୍ଥିତ ବାସଭବନରେ ଅର୍ଜୁନ ଓ ସାରାଙ୍କ ସହ ସଚିନ ପ୍ରାଣାୟମ ମୁଦ୍ରାରେ ରହିଛନ୍ତି। ଏହି ଫଟୋ ତଳେ ସଚିନ ଏକ କ୍ୟାପସନ ଲେଖି ଉଲ୍ଲେଖ କରିଛନ୍ତି, ଏକାଠି କିଛି ଯୋଗ କରି ପିତୃ ଦିବସ ପାଳନ କରିଛୁ। ସେହିଭଳି ଅନ୍ୟ ଭାରତୀୟ କ୍ରିକେଟର୍ମାନଙ୍କ ମଧ୍ୟରେ ରୋହିତ୍ ଶର୍ମା, ଯୁବରାଜ ସିଂ, ବୀରେନ୍ଦ୍ର ସେହ୍ବାଗ, ଇଶାନ୍ତ ଶର୍ମା, ଉମେଶ ଯାଦବ, ହାର୍ଦ୍ଦିକ ପାଣ୍ଡ୍ୟା ପ୍ରମୁଖ ବିଶ୍ୱ ପିତୃ ଦିବସ ଓ ଯୋଗ ଦିବସ ପାଳନ କରିଛନ୍ତି।
ସୀମିତ ଓଭର ଦଳର ଉପଅଧିନାୟକ ରୋହିତ୍ ଶର୍ମା ନିଜ ସ୍ବର୍ଗୀୟ ବାପା ଗୁରୁନାଥ ଶର୍ମାଙ୍କ ଏକ ଫଟୋ ସୋସିଆଲ ମିଡିଆରେ ଶେୟାର କରି ଶ୍ରଦ୍ଧାଞ୍ଜଳି ଜଣାଇଛନ୍ତି। ସେ ଏହି ଫଟୋ ତଳେ ଲେଖିଛନ୍ତି, ବାପା ସର୍ବଦା ପଛରେ ଠିଆ ହୁଅନ୍ତି। ପିଲାମାନଙ୍କର ଏବଂ ଘରର ସେ ମେରୁଦଣ୍ଡ ହୋଇଥାନ୍ତି। ମୋ ବାପା ମଧ୍ୟ ସେହିପରି ଥିଲେ ଏବଂ ମୋର ସମସ୍ତ ସ୍ବପ୍ନ ପୂରଣ କରିବାରେ ସେ ସହାୟତା କରିଥିଲେ।
