ଭୁବନେଶ୍ୱର, ୧୬।୫ (କ୍ରୀଡ଼ା ପ୍ରତିନିଧି):ସର୍ବପ୍ରଥମ ଅନ୍ଲାଇନ୍ ଜାତୀୟ ଉଷୁ ଚାମ୍ପିୟନଶିପ୍ ଶୁକ୍ରବାର ଆରମ୍ଭ ହୋଇଛି। ୧୮ ତାରିଖ ପର୍ଯ୍ୟନ୍ତ ହେବାକୁଥିବା ଏହି ପ୍ରତିଯୋଗିତା ସବ୍ଜୁନିୟର, ଜୁନିୟର ଓ ସିନିୟର କାଟେଗୋରିରେ ଅନୁଷ୍ଠିତ ହେଉଛି। କେନ୍ଦ୍ର କ୍ରୀଡ଼ା ମନ୍ତ୍ରୀ କିରେନ ରିଜିଜୁ ମୁଖ୍ୟଅତିଥି ଏବଂ ଭାରତୀୟ ଅଲିମ୍ପିକ୍ ଆସୋସିଏଶନ ସଭାପତି ନରିନ୍ଦର ଧ୍ରୁବ ବାତ୍ରା ସମ୍ମାନିତ ଅତିଥିଭାବେ ଯୋଗଦେଇ ପ୍ରତିଯୋଗିତାର ଶୁଭାରମ୍ଭ କରିଛନ୍ତି। ଉଷୁ ଆସୋସିଏଶନ ଅଫ୍ ଇଣ୍ଡିଆର ସଭାପତି ଭୁପିନ୍ଦର ସିଂ ବାଜୱା, ସାଧାରଣ ସମ୍ପାଦକ ଜିତେନ୍ଦର ସିଂ ବାଜୱା, କେନ୍ଦ୍ର କ୍ରୀଡ଼ା ସଚିବ ରବି ମିତ୍ତଲ, ଅନ୍ତର୍ଜାତୀୟ ଉଷୁ ଫେଡେରେଶନ ମହାସଚିବ ଝାଙ୍ଗ କ୍ବିପିଙ୍ଗ୍ ପ୍ରମୁଖ ଅନ୍ୟତମ ଅତିଥିଭାବେ ଯୋଗଦେଇ ନିଜ ନିଜର ମତ ରଖିଛନ୍ତି। କରୋନାଭାଇରସ୍ ସଂକ୍ରମଣଜନିତ ପ୍ରଭାବ ଯୋଗୁ ସ୍ବାଭାବିକଭାବେ ପ୍ରତିଯୋଗିତା ସମ୍ଭବ ହେଉ ନ ଥିବାରୁ ଏଥିରେ ଫାଇଟିଂ ଇଭେଣ୍ଟ ରହିନାହିଁି। ଅନ୍ଲାଇନ୍ରେ ଜୁମ୍ ଆପ୍ ମାଧ୍ୟମରେ କେବଳ ତାଓଲୁ(ପ୍ରଦର୍ଶନ ଇଭେଣ୍ଟ) ଅନୁଷ୍ଠିତ ହେଉଛି। ଦୀର୍ଘଦିନଧରି ଉଷୁରେ କୌଣସି ପ୍ରତିଯୋଗିତା ହୋଇ ନ ଥିବାବେଳେ ଏଥିରେ ୩୧ ରାଜ୍ୟ ଓ ଅନୁବନ୍ଧିତ ଅନୁଷ୍ଠାନର ୭୫୦ରୁ ଊର୍ଦ୍ଧ୍ୱ ପ୍ରତିଯୋଗୀ ଭାଗ ନେଇଛନ୍ତି। ପ୍ରତିଯୋଗିତା ପାଇଁ ଓଡ଼ିଶାର ୧୯ ଖେଳାଳି ନାମ ପଞ୍ଜୀକୃତ କରିଛନ୍ତି। ଷ୍ଟ୍ରିମ୍ ଇଣ୍ଡିଆରେ ଚାମ୍ପିୟନଶିପ୍ର ଲାଇଭ୍ ଷ୍ଟ୍ରିମିଂ ଉପଲବ୍ଧ ହେଉଛି। ଉଷୁ ଆସୋସିଏଶନ ଅଫ୍ ଓଡ଼ିଶାର ସାଧାରଣ ସମ୍ପାଦକ ପ୍ରଦ୍ୟୁମ୍ନ ବେହେରା ଚାମ୍ପିୟନଶିପ୍ର ଜଜ୍ ନିଯୁକ୍ତ ହୋଇଛନ୍ତି।
ଓଡ଼ିଶା ପ୍ରତିଯୋଗୀ: ଅଂଶୁପ୍ରିୟା ସଂଗ୍ରାମ ସିଂ, ଆଦିତ୍ୟ ଜେନା, ଆକାଂକ୍ଷିତା ଜେନା, ଅନିମେଷ ଧଳ ସାମନ୍ତ, ଅନୁଷ୍କା ପଟେଲ, ଆଶୁତୋଷ ମହାରଣା, ଚିରସ୍ମିତା ମହାନ୍ତି, ଗଣେଶ ସିଂ, ନୀତୀଶା ବାରିକ, ପ୍ରଦ୍ୟୁମ୍ନ କୁମାର ବେହେରା, ପ୍ରିୟମ୍ବଦା ପ୍ରଧାନ, ସାୟନ କୁମାର, ଶାଶ୍ୱତ ବେଉରା, ଶ୍ରେୟାସ କଳସ, ସ୍ନେହ ସାମନ୍ତରାୟ, ସୃଷ୍ଟି କଳସ, ସ୍ବାତୀ ଶ’, ସ୍ବୟଂଶୁ ପଣ୍ଡା, ଯଶସ୍ବିନୀ ମଲିକ ।
