ନୂଆଦିଲ୍ଲୀ,୨୪-୭: ରିଲାଏନ୍ସ ଗ୍ରୁପ୍ ଅଧ୍ୟକ୍ଷ ଅନିଲ ଅମ୍ବାନୀ ଏବଂ ଅନ୍ୟମାନଙ୍କ ବିରୋଧରେ ଆଗତ ଅଦାଲତ ଅବମାନନା ମାମଲାକୁ ରାଷ୍ଟ୍ରୀୟ କମ୍ପାନୀ ବିଧି ଅପିଲୀୟ ନ୍ୟାୟାଧିକରଣ(ଏନ୍ସିଏଲ୍ଏଟି) ମଙ୍ଗଳବାର ଖାରଜ କରିଦେଇଛନ୍ତି। ଅଧ୍ୟକ୍ଷ ଜଷ୍ଟିସ୍ ଏସ୍.ଜେ.ମୁଖୋପାଧ୍ୟାୟଙ୍କ ଅଧ୍ୟକ୍ଷତାରେ ଗଠିତ ଦୁଇ ସଦସ୍ୟ ବିଶିଷ୍ଟ ଖଣ୍ଡପୀଠ ଆବେଦନକୁ ପ୍ରତ୍ୟାଖ୍ୟାନ କରିଦେଇଛନ୍ତି। ଏହି ମାମଲାର ଶୁଣାଣି ହେବା ପରେ ଖଣ୍ଡପୀଠ ଜୁଲାଇ ୩ରେ ରାୟ ସଂରକ୍ଷିତ ରଖିଥିଲେ। ସ୍ବଳ୍ପ ଶେୟାରଧାରୀ ଏଚ୍ଏସ୍ବିସି ଡେଜି ଇନ୍ଭେଷ୍ଟମେଣ୍ଟ(ମରିସସ୍) ଏବଂ ଅନ୍ୟମାନେ ରିଲାଏନ୍ସ ଇନ୍ଫ୍ରାଟେଲ ଦ୍ୱାରା ବକେୟା ପ୍ରଦାନ କରାଯାଇ ନ ଥିବା ଅଭିଯୋଗ କରି କମ୍ପାନୀ, ଏହାର ମାଲିକ ତଥା ଅନ୍ୟମାନଙ୍କ ବିରୋଧରେ ଅଦାଲତ ଅବମାନନା ମାମଲା ଦାଏର କରାଯାଇଥିଲା। କୌଣସି ପ୍ରକାର ଅଦାଲତ ଅବମାନନା ହୋଇ ନ ଥିବା ରାୟ ପ୍ରକାଶ କରି ଖଣ୍ଡପୀଠ କହିଛନ୍ତି।
