ରସୁଲପୁର,୯ା୪(ରଞ୍ଜିତ ରାଉତ):ଯାଜପୁର ଜିଲାର କୋରେଇ ନିର୍ବାଚନମଣ୍ଡଳୀ ପାଇଁ ବିଜେଡି ପ୍ରାର୍ଥୀ ଘୋଷଣା କରି ନ ଥିବାବେଳେ ପ୍ରତିଦିନ ନୂଆ ନଁା ଚର୍ଚ୍ଚାକୁ ଆସୁଛି। ଏହାସହ ଆଶାୟୀଙ୍କ ତାଲିକା ମଧ୍ୟ ଲମ୍ବିଚାଲିଛି, ଯାହାଙ୍କ ବିଷୟରେ ସାମାଜିକ ଗଣମାଧ୍ୟମରେ ବିଭିନ୍ନ ଆଲୋଚନା ହେଉଛି।
ଯାଜପୁର ଜିଲା ରାଜନୀତିରେ ବିଶେଷ ପ୍ରଭାବ ରଖୁଥିବା ପ୍ରଫୁଲ୍ଲ ଘଡ଼େଇ ଏବଂ ସ୍ବର୍ଗତ ଅଶୋକ ଦାସଙ୍କ ପରିବାରର କାହାକୁ ବି କୋରେଇ ଆସନରେ ପ୍ରାର୍ଥୀ କରାଯିବ ସେନେଇ ଲବି ଚାଲିଛି। ଘଡେଇ ପରିବାରରୁ କୋରେଇର ପୂର୍ବତନ ବିଧାୟକ ପ୍ରୀତିରଞ୍ଜନ ଘଡ଼େଇଙ୍କ ସ୍ତ୍ରୀ ବଙ୍ଗୀୟ ଅଭିନେତ୍ରୀ ଝିଲ୍ଲିକ୍ ଭଟ୍ଟାଚାର୍ଯ୍ୟଙ୍କ ନାମ ଶୁଣାଯାଉଥିବାବେଳେ ଦାସ ପରିବାରରୁ ଯାଜପୁର ବିଧାୟକ ପ୍ରଣବ ପ୍ରକାଶ ଦାସଙ୍କ ଭାଇ ଭବ ପ୍ରକାଶ ଦାସଙ୍କୁ ଦଳ ପ୍ରାର୍ଥୀ କରିବ ବୋଲି ଆଲୋଚନା ହେଉଥିଲା। ତେବେ ଏହା ହେଲେ ଗୋଟିଏ ପରିବାରକୁ ଦୁଇଟି ଟିକେଟ ହୋଇଯିବ, ଯାହା ଦଳୀୟ ନୀତି ଆଦର୍ଶ ବିରୋଧୀ ହେବ। ତେଣୁ ଉଭୟ ପରିବାରକୁ ବାଦ୍ ଦେଇ ତୃତୀୟ ବ୍ୟକ୍ତିଙ୍କୁୁ ପ୍ରାର୍ଥୀ କରିବାକୁ ଦଳ ଚିନ୍ତା କରୁଥିବା ଚର୍ଚ୍ଚା ହେଉଛି। ଏଭଳିସ୍ଥଳେ ଦଳ ପୁରୁଣାଙ୍କୁ ଦୋହରାଉଛି କି ନୂଆ ଚେହେରାକୁ ସୁଯୋଗ ଦେଉଛି, ତାହାକୁ ନେଇ ଆଲୋଚନା ଜାରି ରହିଛି। ଏହି ଅଙ୍କ ଛିଣ୍ଡୁ ନ ଥିବାରୁ ଦଳୀୟ ପ୍ରାର୍ଥୀ ଘୋଷଣା ବିଳମ୍ବ ହେଉଥିବା କୁହାଯାଉଛି। ଏହାରି ଭିତରେ ଅନେକ ନୂଆ ମୁହଁ ଚର୍ଚ୍ଚାକୁ ଆସିଛି। ସେମାନଙ୍କ ମଧ୍ୟରେ କଂଗ୍ରେସର ଜଣେ ପ୍ରଭାବୀ ନାରୀନେତ୍ରୀ ବିଜେଡିରେ ସାମିଲ ହୋଇ ଟିକେଟ୍ ହାତେଇବାକୁ ଉଦ୍ୟମ କରୁଥିବା ଚର୍ଚ୍ଚା ହେଉଛି। ସେହିପରି ପାଣିକୋଇଲି ଅଞ୍ଚଳର ଜଣେ ଯୁବ ବ୍ୟବସାୟୀ ଏବଂ କୋରେଇ ବିଜେଡିର ଜଣେ ଯୁବନେତା ମଧ୍ୟ ଟିକେଟ୍ ପାଇବା ଦୌଡ଼ରେ ରହିଛନ୍ତି। ଏଭଳି ସ୍ଥିତିରୁ ଫାଇଦା ଉଠାଇବାକୁ ବିଧାୟକ ଅଶୋକ ବଳ ଚାହିଁ ରହିଥିବା ମଧ୍ୟ ଆଲୋଚନା ହେଉଛି। କାରଣ ଅଧିକ ଦ୍ୱନ୍ଦ୍ୱ ଉପୁଜିଲେ ଦଳ ପୁଣିଥରେ ପୁରୁଣାଙ୍କ ଉପରେ ଭରସା କରିପାରେ ବୋଲି କୁହାଯାଇଛି। ତେବେ ଏଠି ଦଳ ଏମିତି ଜଣଙ୍କୁ ପ୍ରାର୍ଥୀ କରିବାକୁ ଚାହୁଁଛି, ଯାହାଙ୍କୁ ଉଭୟ ଘଡ଼େଇ ଓ ଦାସ ପରିବାର ଗ୍ରହଣ କରିପାରୁଥିବେ ବୋଲି ଆଲୋଚନା ହେଉଛି।
ବିଜେଡି ଟିକେଟ ଅଙ୍କ କଷା ଛିଣ୍ଡୁୁ ନ ଥିବା ବେଳେ ଭାଜପା ପ୍ରାର୍ଥୀ ଆକାଶ ଦାସନାୟକ ତାଙ୍କ ପ୍ରଚାରକୁ ଜୋରଦାର କଲେଣି। ଆକାଶଙ୍କ ଲୋକପ୍ରିୟତାକୁ ଦୃଷ୍ଟିରେ ରଖି ତାଙ୍କୁ ଟକ୍କର ଦେବା ଭଳି ବ୍ୟକ୍ତିଙ୍କୁ ବିଜେଡି ପ୍ରାର୍ଥୀ କରିବ ବୋଲି ସବୁଠି ଚର୍ଚ୍ଚା। ୨୦୦୯ରୁ ଦଳ ଏଠାରେ ପ୍ରାର୍ଥୀ ବଦଳ କରିଆସୁଛି। ଏହାରି ଭିତରେ ଗତ ୩ଟି ସାଧାରଣ ନିର୍ବାଚନରେ ଦଳ ପ୍ରାର୍ଥୀ ବଦଳାଇ ସଫଳ ହୋଇଆସୁଛି। ଏଥର ବିଜେଡି ସେହି ଧାରା ବଜାୟ ରଖୁଛି କି ପୁରୁଣାକୁ ଦୋହରାଉଛି ତା’ ଉପରେ ସମସ୍ତଙ୍କ ନଜର ରହିଛି।
