ଓ୍ବାଶିଂଟନ: ଆମେରିକା ଲସ୍ ଏଞ୍ଜେଲସ୍ର ମାଇକ୍ରୋସଫ୍ଟ ଥିଏଟରରେ ଅନୁଷ୍ଠିତ ହୋଇଯାଇଛି ୭୪ତମ ପ୍ରାଇମ୍ଟାଇମ୍ ଏମି ଆଓ୍ବାର୍ଡ ସମାରୋହ। ଟେଲିଭିଜନ୍ କଳାକାର ଓ ଟେକ୍ନିକାଲ ଷ୍ଟାଫ୍ମାନଙ୍କ ପାଇଁ ଏହି ଆଓ୍ବାର୍ଡ ବିଶେଷ ଗୁରୁତ୍ୱ ବହନ କରିଥାଏ। ଚଳିତ ବର୍ଷ ଜେଣ୍ଡାୟାଙ୍କୁ ଶ୍ରେଷ୍ଠ ଅଭିନେତ୍ରୀ ସମ୍ମାନରେ ସମ୍ମାନିତ କରାଯାଇଛି। ଆମେରିକାନ୍ ଟେଲିଭିଜନ୍ ସିରିଜ୍ ‘ୟୁଫୋରିଆ’ ପାଇଁ ଜେଣ୍ଡାୟାଙ୍କୁ ଏମି ଆଓ୍ବାର୍ଡ ନିମନ୍ତେ ଶ୍ରେଷ୍ଠ ଅଭିନେତ୍ରୀ ଶ୍ରେଣୀରେ ମନୋନୀତ କରାଯାଇଥିଲା। ଏମି ଆଓ୍ବାର୍ଡରେ ପୁରସ୍କୃତ ହେବା ପରେ ଜାଣ୍ଡେୟା ସିରିଜ୍ର ସମସ୍ତ ମେମ୍ବରକୁ ଧନ୍ୟବାଦ ଜଣାଇବା ସହ ଆଓ୍ବାର୍ଡ ପାଇ ଖୁବ୍ ଖୁସିଥିବା କହିଛନ୍ତି।
୨୦୦୯ରୁ ଜେଣ୍ଡାୟା ଚାଇଲ୍ଡ ଆର୍ଟିଷ୍ଟ ଭାବେ ହଲିଉଡ୍ ଫିଲ୍ମରେ କାମ କରିବା ଆରମ୍ଭ କରିଥିଲେ। ‘ରକି ବ୍ଲୁ’ ଥିଲା ଜେଣ୍ଡାୟାଙ୍କ ଟେଲିଭିଜନ୍ ଡେବ୍ୟୁ। ୨୦୧୭ରେ ସ୍ପାଇଡରମ୍ୟାନ୍-ହୋମ୍କମିଙ୍ଗ୍ ଜରିଆରେ ସେ ହଲିଉଡ୍ରେ ଜଗତରେ ପାଦ ଥାପିଥିଲେ। ଦୁଇଟି ପ୍ରାଇମ୍ ଟାଇମ୍ ଏମି ଆଓ୍ବାର୍ଡ ସେ ଜିତିଛନ୍ତି। ଚଳିତ ବର୍ଷ ଟାଇମ୍ ମାଗାଜିନ୍ରେ ପ୍ରକାଶ ପାଇଥିବା ବିଶ୍ୱର ୧୦୦ ପ୍ରଭାବଶାଳୀ ବ୍ୟକ୍ତି ବିଶେଷଙ୍କ ସୂଚୀରେ ଜେଣ୍ଡାୟାଙ୍କ ନାମ ସ୍ଥାନ ପାଇଛି।
ଆମେରିକାର ଶ୍ରେଷ୍ଠ ଟେଲିଭିଜନ୍ ଡ୍ରାମା ସିଜିଜ୍ ଶ୍ରେଣୀରେ ‘ସସେସନ୍’କୁ ପୁରସ୍କୃତ କରାଯାଇଥିବାବେଳେ ‘ଟେଡ୍ ଲାସୋ’ ଶ୍ରେଷ୍ଠ କମେଡି ସିରିଜ୍ ହୋଇପାରିଛି। ସେହିପରି ଜାସୋନ ସୁଡେଇକିସ୍ଙ୍କୁ ଶ୍ରେଷ୍ଠ ଅଭିନେତା ପୁରସ୍କାରରେ ପୁରସ୍କୃତ କରାଯାଇଛି। ହ୍ବାଇଟ୍ ଲୋଟସ୍ ସିରିଜ୍ ପାଇଁ ଶ୍ରେଷ୍ଠ ନିର୍ଦ୍ଦେଶକ ଶ୍ରେଣୀରେ ମାଇକ୍ ହ୍ବାଇଟ୍ଙ୍କୁ ଏମି ଆଓ୍ବାର୍ଡ ପ୍ରଦାନ କରାଯାଇଛି। ନେଟ୍ଫ୍ଲିକ୍ସ, ହୋମ୍ ବକ୍ସ ଅଫିସ୍ ମାକ୍ସ ଏବଂ ଆପଲ୍ ଟିଭି ପ୍ଲସ୍ରେ ପ୍ରସାରିତ ଅନେକ ସିରିଜ୍ ଓ କଳାକାର ଚଳିତ ବର୍ଷ ଏମି ଆଓ୍ବାର୍ଡ ରେସ୍ରେ ସାମିଲ ହୋଇଥିଲେ। ଆମେରିକାବ୍ୟାପୀ ଏନ୍ବିସି ଚ୍ୟାନେଲ୍ ଜରିଆରେ ଏହି ସମାରୋହର ସିଧା ପ୍ରସାରଣ କରାଯାଇଥିଲା।
