ନୂଆଦିଲ୍ଲୀ: IPL ୨୦୨୭ ପୂର୍ବରୁ ଚେନ୍ନାଇ ସୁପର କିଙ୍ଗ୍ସ (CSK) ନିଜ କୋଚିଂ ସେଟଅପ୍ରେ ବଡ଼ ପରିବର୍ତ୍ତନ କରିଛି । ଦୀର୍ଘ ସମୟ ଧରି ଦଳର ହେଡ୍ କୋଚ୍ ଥିବା ଷ୍ଟିଫେନ୍ ଫ୍ଲେମିଂଙ୍କ ସ୍ଥାନରେ ଭାରତର ପୂର୍ବତନ ଦ୍ରୁତ ବୋଲର ଜହିର ଖାନଙ୍କୁ ନୂଆ ହେଡ୍ କୋଚ୍ କରାଯାଇଛି ।
ବର୍ତ୍ତମାନର ସଙ୍କେତ ଅନୁସାରେ, CSK ଋତୁରାଜ ଗାଏକ୍ବାଡଙ୍କ ସହ ଆଗକୁ ବଢ଼ିବାର ସମ୍ଭାବନା ରହିଛି। ତେବେ ଦଳରେ ସଞ୍ଜୁ ସାମସନ୍ ଥିବା ସହ ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ ଟ୍ରେଡ୍ ଚର୍ଚ୍ଚା ମଧ୍ୟ ହୋଇଛି। ତେଣୁ IPL ମିନି ଅକ୍ସନ୍ ପୂର୍ବରୁ CSKର କ୍ୟାପ୍ଟେନ୍ସିପ ଉପରେ ନଜର ରହିବ। ମହେନ୍ଦ୍ର ସିଂ ଧୋନିଙ୍କ ପରେ ୨୦୨୪ରେ ଋତୁରାଜ ଗାଏକ୍ବାଡଙ୍କୁ CSKର ଅଧିନାୟକ ଦାୟିତ୍ୱ ଦିଆଯାଇଥିଲା। ପ୍ରଥମ ସିଜନ୍ରେ ଦଳ ପ୍ଲେଅଫ୍ରେ ପହଞ୍ଚିପାରିନଥିଲା ଏବଂ ପଞ୍ଚମ ସ୍ଥାନରେ ରହିଥିଲା।
୨୦୨୫ ସିଜନ୍ରେ ଋତୁରାଜ ମଝି ସିଜନ୍ରେ ଆହତ ହେବା ପରେ ଧୋନି ପୁଣି ଅଧିନାୟକ ଦାୟିତ୍ୱ ନେଇଥିଲେ। ତଥାପି CSKର ପ୍ରଦର୍ଶନରେ ବଡ଼ ପରିବର୍ତ୍ତନ ଆସିନଥିଲା ଏବଂ ଦଳ ଶେଷ ସ୍ଥାନରେ ସିଜନ୍ ଶେଷ କରିଥିଲା। ୨୦୨୬ରେ ମଧ୍ୟ ଋତୁରାଜଙ୍କୁ ଅଧିନାୟକ ରଖାଯାଇଥିଲା। କିନ୍ତୁ ଦଳ ପୁଣି ପ୍ଲେଅଫ୍ରେ ପହଞ୍ଚିପାରିନଥିଲା ଏବଂ ଅଷ୍ଟମ ସ୍ଥାନରେ ରହିଥିଲା। ଫଳରେ ଋତୁରାଜଙ୍କ ଅଧିନାୟକତ୍ୱରେ ଲଗାତାର ତିନି ସିଜନ୍ CSK ପ୍ଲେଅଫ୍ରୁ ବାଦ୍ ପଡ଼ିଛି।
୨୦୨୬ ସିଜନ୍ ପୂର୍ବରୁ CSK ଏକ ବଡ଼ ଟ୍ରେଡ୍ କରି ରବୀନ୍ଦ୍ର ଜାଡେଜାଙ୍କ ବଦଳରେ ରାଜସ୍ଥାନ ରୟାଲ୍ସରୁ ସଞ୍ଜୁ ସାମସନ୍ଙ୍କୁ ଦଳରେ ସାମିଲ କରିଥିଲା। ସଞ୍ଜୁ ଦୀର୍ଘ ସମୟ ଧରି ରାଜସ୍ଥାନର ଅଧିନାୟକ ଥିବାରୁ ତାଙ୍କ ଆଗମନ ପରେ CSKର କ୍ୟାପ୍ଟେନ୍ସି ବଦଳିବା ନେଇ ଚର୍ଚ୍ଚା ହୋଇଥିଲା। ତେବେ ଟିମ୍ ମ୍ୟାନେଜମେଣ୍ଟ ଋତୁରାଜଙ୍କ ଉପରେ ଭରସା ଜାରି ରଖିଥିଲା। ୨୦୨୬ରେ ସଞ୍ଜୁ ମଧ୍ୟ ଋତୁରାଜଙ୍କ ଅଧିନାୟକତ୍ୱରେ ଖେଳିଥିଲେ।
ଖବର ଅନୁସାରେ, ବର୍ତ୍ତମାନ ଋତୁରାଜଙ୍କୁ କ୍ୟାପ୍ଟେନ୍ ପଦରୁ ହଟାଇବାର ସମ୍ଭାବନା କମ୍ ରହିଛି । ଏହାର ଏକ ପ୍ରମୁଖ କାରଣ ହେଉଛି CSKର ଟିମ୍ କଲ୍ଚର୍। ଋତୁରାଜ ଦୀର୍ଘ ସମୟ ଧରି ଦଳର ଅଂଶ ରହିଥିବାରୁ ଫ୍ରାଞ୍ଚାଇଜିର କାର୍ଯ୍ୟପ୍ରଣାଳୀକୁ ଭଲ ଭାବେ ବୁଝନ୍ତି।ମଇଦାନରେ ଶାନ୍ତ ଓ ସଂଯମୀ ଭାବ ପାଇଁ ମଧ୍ୟ ଋତୁରାଜ ପରିଚିତ। ଗତ ତିନି ସିଜନ୍ରେ ଆଶାନୁରୂପ ଫଳ ମିଳିନଥିଲେ ମଧ୍ୟ ଫ୍ରାଞ୍ଚାଇଜି ତାଙ୍କୁ ଭବିଷ୍ୟତର ଅଧିନାୟକ ଭାବେ ପ୍ରସ୍ତୁତ କରୁଥିବାରୁ ଆଉ ଏକ ସୁଯୋଗ ଦେଇପାରେ।