ଯୋଡ଼ା, ୨୦ା୭(ମାନସ ମହାନ୍ତି): କେନ୍ଦୁଝର ଜିଲା ବାମେବାରୀ ଥାନା ଅଧୀନ ସିଲଯୋଡ଼ା ନିକଟସ୍ଥ କୁଦୁର ସାହିରେ ଏକ ଅଭାବନୀୟ ଘଟଣା ଘଟିଛି। ଚୋରି ଘଟଣାକୁ ନେଇ ଗ୍ରାମର କିଛି ଲୋକ ସଂଘବଦ୍ଧ ଭାବେ ଜଣଙ୍କୁ ପିଟି ହତ୍ୟା କରିଛନ୍ତି। ମୃତକ ହେଲେ ଗ୍ରାମର ଟେଳେ ଓରଫ ମକୁରୁ ହେସା(୩୫)। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇଥିବା ବେଳେ ପୋଲିସ କେତେଜଣ ଲୋକଙ୍କୁ ଅଟକ ରଖି ପଚରାଉଚରା କରୁଛି।
ପୋଲିସ ସୂଚନା ମୁତାବକ, ଗ୍ରାମରେ ପୂର୍ବରୁ ଘଟିଥିବା ଏକ ଚୋରି ଘଟଣାରେ ସମ୍ପୃକ୍ତ ଥିବା ନେଇ ମକୁରୁ ଗ୍ରାମର କେତେଜଣ ଲୋକଙ୍କ ନାମ ପ୍ରକାଶ କରିଥିଲେ। ଏ ନେଇ ଉକ୍ତ ଲୋକଙ୍କ ସହ ତାଙ୍କ ବଚସା ଓ ମାରପିଟ୍ ହୋଇଥିଲା। ନିର୍ଦ୍ଦିଷ୍ଟ ଲୋକେ ଆକ୍ରୋଶ ମୂଳକ ଭାବେ ମକୁରୁଙ୍କୁ ବୁଧବାର ରାତିରେ ଗ୍ରାମର କ୍ଲବ ଘରେ ବାନ୍ଧି ରାତିସାରା ମାଡ଼ ମାରିଥିଲେ। ଗୁରୁବାର ସକାଳେ ମଧ୍ୟ ତାଙ୍କୁ ପିଟିଥିଲେ। ଅସହ୍ୟ ଯନ୍ତ୍ରଣାରେ ମକୁରୁଙ୍କ ମୃତ୍ୟୁ ଘଟିଥିଲା। ଖବରପାଇ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବଡ଼ବିଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲା। ଏ ନେଇ ବାମେବାରୀ ଥାନାରେ ଏକ ମାମଲା (ନଂ ୧୨୨/୨୩) ରୁଜୁ ହୋଇଛି। ଆକ୍ରୋଶମୂଳକ ଭାବେ କିଛି ଲୋକ ଏହି ଘଟଣା ଭିଆଇଛନ୍ତି। ଘଟଣାରେ ସମ୍ପୃକ୍ତ ଏକାଧିକ ଲୋକଙ୍କୁ ଅଟକ ରଖି ପଚରାଉଚରା ଚାଲିଥିବା ପୋଲିସ ପକ୍ଷରୁ ସୂଚନା ମିଳିଛି।
