ଧାମନଗର,୧୭।୮(ଦେବେନ୍ଦ୍ର ଆନ୍ଦିଆ): ଧାମନଗର ବ୍ଲକ ଦିହୁଡ଼ି-ଆନନ୍ଦପୁର ପଞ୍ଚାୟତ ପାହଡ଼ପୁର ଯେନାସାହି ଗ୍ରାମର ଗଣେଶ ଜେନା (୫୨)ଙ୍କ ମୃତଦେହ ଉଦ୍ଧାର କରାଯାଇଛି । ନିଖୋଜର ୪ଦିନ ପରେ ଜଙ୍ଗଲରୁ ମିଳିଲା ମୃତଦେହ ।
ସୂଚନା ଅନୁସାରେ, ଗତ ଶୁକ୍ରବାର ବିଲରୁ ଫେରୁଥିବା ବେଳେ ଗେଙ୍ଗୁଟି ନଦୀର ପ୍ରବଳ ବନ୍ୟା ସ୍ରୋତରେ ଭାସିଯାଇ ନିଖୋଜ ହୋଇଯାଇଥିଲେ । ନିଖୋଜର ୪ ଦିନ ପରେ ସୋମବାର ତାଙ୍କର ମୃତଦେହ ଉଦ୍ଧାର ହୋଇଛି । ୪ ଦିନ ଧରି ଓଡ୍ରାଫ ଟିମ୍ ଓ ସ୍ଥାନୀୟ ଲୋକ ନଦୀରେ ଖୋଜାଖୋଜି କରୁଥିଲେ । ସୋମବାର ଗେଙ୍ଗୁଟି ନଦୀରେ ଜଳସ୍ତର ହ୍ରାସ ପାଇବା ପରେ ଗଣେଶଙ୍କ ମୃତଦେହ ଘଟଣାସ୍ଥଳରୁ ପ୍ରାୟ ଦେଢ କିଲୋମିଟର ଦୂର କାଞ୍ଜିଆପାଳ ଗାଈଛନ୍ଧା ଚଟାଣ ଠାରୁ ଅନତି ଦୂରରେ ଏକ ଜଙ୍ଗଲିଆ ସ୍ଥାନରେ ପଡିଥିବା ସ୍ଥାନୀୟ ଲୋକେ ଦେଖିଥିଲେ । ଖବରପାଇ ସେଠାରେ ଗ୍ରାମବାସୀ ଓ ପରିବାର ଲୋକ ପହଞ୍ଚି ମୃତଦେହ ଗଣେଶର ବୋଲି ଚିହ୍ନଟ କରିଥିଲେ । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।