ଜଗତ୍ସିଂହପୁର, ୫ା୧୧ (ପ୍ରମୋଦ କୁମାର ନାୟକ)ଜଗତ୍ସିଂହପୁର ଜିଲାରେ ବ୍ରାଉନସୁଗାର ର଼୍ୟାକେଟ୍ ସକ୍ରିୟ ରହିଛି। ଏଥିଯୋଗୁ ବିଶେଷକରି ଯୁବଗୋଷ୍ଠୀ ପ୍ରଭାବିତ ହେଉଛନ୍ତି। ଏହାର ଉଦାହରଣ ଶନିବାର କୁଜଙ୍ଗ ଥାନା ଅଞ୍ଚଳରେ ଦେଖିବାକୁ ମିଳିଛି। ଏହି ଥାନା ଅନ୍ତର୍ଗତ ହସିନା ପ୍ରାଥମିକ ବିଦ୍ୟାଳୟ ନିକଟରୁ ୩୧୨ ଗ୍ରାମ ବ୍ରାଉନ୍ସୁଗାର ଜବତ ହୋଇଛି। ଏହାର ଆନୁମାନିକ ମୂଲ୍ୟ ୩୨ ଲକ୍ଷ ୨୦ ହଜାର ଟଙ୍କା ହେବ ବୋଲି ଆକଳନ କରାଯାଇଛି । ଜଗତ୍ସିଂହପୁର ଜିଲା ମୋବାଇଲ ୟୁନିଟ କର୍ମଚାରୀମାନେ ବହୁ ଚତୁରତାର ସହ ଚଢାଉ କରି ଅପରେଶନକୁ ସଫଳ କରିଛନ୍ତି। ଏନେଇ ବିଭାଗ ପକ୍ଷରୁ ପିଆର୍ ନଂ. ୫୩/୨୩-୨୪ ରୁଜୁ କରାଯାଇ ଉକ୍ତ ଗ୍ରାମର ସନ୍ତୋଷ ମହାନ୍ତି (୪୪)ଙ୍କୁ ଗିରଫ କରାଯାଇଛି । ସନ୍ତୋଷଙ୍କ ପାଖରେ ଏତେ ପରିମାଣର ବ୍ରାଉନ୍ସୁଗାର କିପରି ଏବଂ କେଉଁଠୁ ଆସିଲା ସେନେଇ ଅବକାରୀ ବିଭାଗ ଖୋଳତାଡ ଆରମ୍ଭ କରିଛି।
ସମ୍ପର୍କରେ ଅବକାରୀ ସୁପରିଣ୍ଟେଣ୍ଡେଣ୍ଟ ବୈଜୟନ୍ତୀ ପଣ୍ଡା କହିଛନ୍ତି, ବହୁ କଷ୍ଟରେ ଏହି ବ୍ରାଉନସୁଗାର ଜବତ କରାଯାଇଛି । ସେ କହିଛନ୍ତି, ସନ୍ତୋଷଙ୍କୁ କାବୁକରିବା ପାଇଁ କିଛି ଦିନ ପୂର୍ବରୁ ଜାଲ ବିଛାଯାଇଥିଲା । ତାଙ୍କଠାରୁ ୧୦୦ ଗ୍ରାମ ବ୍ରାଉନସୁଗାର କିଣିବା ପାଇଁ ଯୋଜନା କରାଯାଇଥିଲା । କିନ୍ତୁ ସେ ରାଜି ହେଉ ନ ଥିଲେ। ବିଭିନ୍ନ କୌଶଳ ଆପଣାଯାଇ ସାଧାରଣ ଲୋକ ହିସାବରେ ଅନୁରୋଧ କରାଯିବାରୁ ରାଜି ହୋଇଥିଲେ। ଏଥିସହ ସେ କେଉଁଠୁ ଏହା ଆଣୁଛନ୍ତି ସେନେଇ ତଥ୍ୟ ସଂଗ୍ରହ କରାଯାଇଥିଲା । ସନ୍ତୋଷ ବାଲେଶ୍ୱର ଜିଲାର ଜଳେଶ୍ୱରସ୍ଥିତ ଜଣେ ବଡ଼ ବ୍ରାଉନସୁଗାର ଚୋରା ଚାଲାଣକାରୀଙ୍କଠାରୁ ଏହା ନିୟମିତ ଆଣୁଥିବା ଜଣାପଡ଼ିଥିଲା। ଗତ ୩ ତାରିଖରେ ଜଳେଶ୍ୱରରୁ ସନ୍ତୋଷ ୨୫୦ ଗ୍ରାମ ବ୍ରାଉନ୍ସୁଗାର କିଣିଥିବା ବିଶେଷ ସୂତ୍ରରୁ ସୂଚନା ମିଳିଥିଲା । ଏହି ଆଧାରରେ ତାଙ୍କ ସହ ଯୋଗାଯୋଗ କରିବାରୁ ପୂର୍ବ କଥା ଅନୁଯାୟୀ ସେ ୧୦୦ ଗ୍ରାମ ଦେବେ ବୋଲି ରାଜି ହୋଇଥିଲେ । କିନ୍ତୁ ଅବକାରୀ ବିଭାଗର କର୍ମଚାରୀମାନେ ଚଢ଼ାଉ କରି ସନ୍ତୋଷଙ୍କୁ ଗିରଫ କରିବା ପରେ ମାତ୍ର ୬୦ ଗ୍ରାମ ମିଳିଥିଲା । ଏହି ସମୟରେ ତାଙ୍କ ସ୍ତ୍ରୀ ଫେରାର ହୋଇଯାଇଛନ୍ତି। ଅବଶିଷ୍ଟ ବ୍ରାଉନ୍ସୁଗାର ସେ କେଉଁଠି ରଖିଛନ୍ତି ତାହା ଜାଣିବା ପାଇଁ କୌଶଳ ଆପଣା ଯାଇଥିଲା। ଶନିବାର ସକାଳେ ସନ୍ତୋଷ ଉକ୍ତ ସ୍ଥାନ ଦେଖାଇଥିଲେ।
ଗୋଟିଏ ପୁଡ଼ିିଆ ଗ୍ଲାସ ଆଦି ପଡ଼ିଥିବା ଏକ ପରିତ୍ୟକ୍ତ ସ୍ଥାନରୁ ଏବଂ ଅନ୍ୟ ପୁଡ଼ିିଆଟି ଏକ ଗଛ କୋରଡ଼ରେ ଲୁଚାଇ ରଖିଥିବା ଦେଖାଇଥିଲେ । ପାଖରୁ ଜବତ ୬୦ ଗ୍ରାମ ସହ ଅନ୍ୟ ୨ ପୁଡିଆରେ ଥିବା ବ୍ରାଉନସୁଗାର ପରିମାଣ ଓଜନ କଲା ପରେ ଏହା ୩୧୨ ଗ୍ରାମ ହୋଇଥିଲା। ତେବେ ସନ୍ତୋଷଙ୍କ ବିଷୟରେ ଖୋଳତାଡ କଲେ ଅଧିକ କିଛି ତଥ୍ୟ ମିଳିବ ବୋଲି ଅବକାରୀ ବିଭାଗ ଖୋଳତାଡ ଆରମ୍ଭ କରିଛି । ପ୍ରାଥମିକ ତଦନ୍ତରୁ ଜଣାଯାଇଛି ସେ ପୂର୍ବରୁ ମଧ୍ୟ ଏହି ଅସାଧୁ କାରବାର କରି ପୋଲିସ ଓ ଅବକାରୀ ବିଭାଗ ହାତରେ ଧରାପଡି ଜେଲ ଯାଇଥିଲେ । ତାଙ୍କର ଅନ୍ୟ କିଛି ଆପରାଧିକ ରେକର୍ଡ ଅଛି କି ନାହିଁ ତଦନ୍ତ ଚାଲିଛି । ଏଥିରେ ଅନ୍ୟ କାହାର ସହଯୋଗ ରହିଛି ତା ଉପରେ ମଧ୍ୟ ଅନୁଧ୍ୟାନ ହେବ ବୋଲି ବିଭାଗ ପକ୍ଷରୁ କୁହାଯାଇଛି। କେବଳ ଜଳେଶ୍ୱର ନୁହେଁ, କୋଲକାତା ଓ ଅନ୍ୟ ରାଜ୍ୟରୁ ମଧ୍ୟ ଧଳା ଜହର ଚୋରା ଚାଲାଣ ହେଉଥିବା ସନ୍ଦେହ କରାଯାଉଛି। ଆଗକୁ ଦେଖିବାର ଅଛି ଅବକାରୀ ବିଭାଗ ଓ ପୋଲିସ କି ପଦକ୍ଷେପ ନେଉଛନ୍ତି।
