ଜି.ଉଦୟଗିରି,୨୮।୭(ଶିଶିର ପଟ୍ଟନାୟକ /ଚିନ୍ମୟ କୁମାର ସେଠି): କନ୍ଧମାଳ ଜିଲାରୁ ସୁଦୂର କେରଳରେ ଦାଦନ ଖଟିବାକୁ ଯାଇ ଯୁବକଙ୍କ ମୃତ୍ୟୁ ଘଟଣା ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।ସୂଚନା ଅନୁସାରେ ଜି.ଉଦୟଗିରି ବ୍ଲକ ରଟିଙ୍ଗିଆ ପଞ୍ଚାୟତ ଅନ୍ତର୍ଗତ କଲିନାଯୁ ଗ୍ରାମର ସାଗର ପ୍ରଧାନ(୩୪) ପରିବାର ପ୍ରତିପୋଷଣ ପାଇଁ କେରଳ ରାଜ୍ୟ ଏର୍ଣ୍ଣାକୁଲମ ଜିଲା କଞ୍ଚସ୍ବରୀଠାରେ ଥିବା ମାମୁଟି ନାମକ ନିର୍ମାଣ କାମ୍ପାନୀରେ କାମ କରୁଥିଲେ। ଗତ ୨୭ ତାରିଖ ସୋମବାର କାମ କରୁଥିବା ସମୟରେ ହଠାତ୍ ଅସୁସ୍ଥତା ଅନୁଭବ କରିବାରୁ ସହକର୍ମୀମାନେ ତାଙ୍କୁ ନିକଟସ୍ଥ ଡାକ୍ତରଖାନାକୁ ନେଇ ଯାଉଥିବା ବେଳେ ରାସ୍ତାରେ ମୃତ୍ୟୁବରଣ କରିଥିଲେ । ତାଙ୍କୁ ଡାକ୍ତରଖାନାରେ ନେଇ ଦେଖାଇବା ପରେ ସେ ମୃତ୍ୟୁବରଣ କରିଥିବା କହିଥିଲେ କାର୍ଯ୍ୟରତ ଡାକ୍ତର। ମୃତ ସାଗରଙ୍କ ମରଶରୀରକୁ ନିଜ ଗ୍ରାମ କଲିନାଯୁକୁ ଆଣିବା ପାଇଁ ୬୮ ବର୍ଷୀୟା ବିଧବା ମା ପୂର୍ଣ୍ଣିମା ପ୍ରଧାନ ଓ ପତ୍ନୀ ନୀଳିମା କହଁର ସ୍ବାକ ସଂଗଠନ ସଭାପତି ଆମନ ଚନ୍ଦ୍ର ନାୟକ,ସମ୍ପାଦକ ହୃଷିକେଶ ପ୍ରଧାନ, ରଟିଙ୍ଗିଆ ସରପଞ୍ଚ ବିଷ୍ଣୁଦେବ ପ୍ରଧାନ ଓ ସମ୍ପର୍କୀୟ ଫିରୋଜ କୁମାର ପ୍ରଧାନଙ୍କ ସହାୟତାରେ କନ୍ଧମାଳ ଜିଲାପାଳ ଏବଂ ଜିଲାଶ୍ରମ ଅଧିକାରୀଙ୍କୁ ଭେଟି ମୃତ ସାଗରଙ୍କ ମରଶରୀରକୁ ନିଜ ଗ୍ରାମକୁ ଆଣିବା ସହ ସହାୟତା ନିମନ୍ତେ ଏକ ଲିଖିତ ଅନୁରୋଧପତ୍ର ପ୍ରଦାନ କରିଥିବା ସୂଚନା ମିଳିଛି। ଜିଲାପାଳ ତୁରନ୍ତ ପଦକ୍ଷେପ ନେଇ ଜିଲା ରେଡକ୍ରସର ଜରୁରୀକାଳୀନ ପାଣ୍ଠିରୁ ୨୦ ହଜାର ଟଙ୍କା ଆର୍ଥିକ ସହାୟତା ମଞ୍ଜୁର କରିଥିବା ଜଣାପଡ଼ିଛି। କେରଳରେ ଶବ ବ୍ୟବଚ୍ଛେଦ ପରେ ବିମାନ ଯୋଗେ ଭୁବନେଶର ଆଣିବା ପରେ ନିଜ ଗାଁକୁ ଅଣାଯାଇ ସତ୍କାର କରାଯିବ। ଏହି ଘଟଣା ପୁଣିଥରେ କନ୍ଧମାଳ ଜିଲାରୁ ଜୀବିକା ଅନେୱଷଣରେ ବାହାର ରାଜ୍ୟକୁ ଯାଉଥିବା ଦାଦନ ଶ୍ରମିକଙ୍କ ଦାରୁଣ ଦୁଃଖ ସାମ୍ନାକୁ ଆଣିଛି। ଜିଲାରେ ଅଧିକ ରୋଜଗାର ସୁଯୋଗ ସୃଷ୍ଟି କରି ଦାଦନ ମୃତ୍ୟୁ ରୋକିବା ପାଇଁ ଦୀର୍ଘମିଆଦି ପଦକ୍ଷେପ ନେବାକୁ ବିଭିନ୍ନ ମହଲରୁ ଦାବି ହେଉଛି।