‘ଆପଣଙ୍କ ପଗଡିର ଅର୍ଥ ଆତଙ୍କବାଦ ନୁହେଁ’, ଶିଖଙ୍କୁ ଏମିତି କହିଲେ ନ୍ୟୁୟର୍କ ମେୟର

ଓ୍ବାଶିଂଟନ,୩୦।୧୦: ଆମେରିକାର ନ୍ୟୁୟର୍କ ସିଟି ମେୟର ଏରିକ ଆଡମ୍ସ ଶିଖ ସମ୍ପ୍ରଦାୟ ବିରୁଦ୍ଧରେ ହୋଇଥିବା ଆକ୍ରମଣ ତଥା ଘୃଣ୍ୟ ଅପରାଧକୁ ଦେଶ ଉପରେ ଏକ ଦାଗ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଶିଖ ପଗଡି ଆତଙ୍କବାଦର ଅର୍ଥ ନୁହେଁ ବରଂ ଏହା ବିଶ୍ୱାସର ପ୍ରତୀକ ଅଟେ। ଶିଖ ସମ୍ପ୍ରଦାୟର ସୁରକ୍ଷା ତଥା ଲୋକଙ୍କୁ ଶିଖ ଧର୍ମ ବିଷୟରେ ସଚେତନ କରାଇବାକୁ ସେ ଆହ୍ବାନ ଦେଇଛନ୍ତି।

ଦକ୍ଷିଣ ରିଚମଣ୍ଡ ହିଲର କୁଇନ୍ସ ପଡ଼ିଆରେ ଥିବା ବାବା ମାଖାନ ଶାହା ଲୁବାନା ଶିଖ କେନ୍ଦ୍ରରେ ଆଦର୍ଶ ଶିଖ ସମ୍ପ୍ରଦାୟର ସଦସ୍ୟମାନଙ୍କୁ ସମ୍ବୋଧିତ କରୁଥିଲେ। ଏହି ସମୟରେ ସେ କହିଥିଲେ, ‘ତୁମେ ଆତଙ୍କବାଦୀ ନୁହଁ, ବରଂ ଜଣେ ରକ୍ଷକ। ସମଗ୍ର ସହରକୁ ଏହା କହିବା ଆବଶ୍ୟକ। ଆମର ଯୁବକ, ଆମର ବୟସ୍କମାନେ ଏହା ଜାଣିବା ଆବଶ୍ୟକ କରନ୍ତି।
ସେ କହିଥିଲେ, ‘ତୁମର ପଗଡି ଆତଙ୍କବାଦ ନୁହେଁ। ଏହାର ଅର୍ଥ ହେଉଛି ପ୍ରତିରକ୍ଷା, ଏହାର ଅର୍ଥ ସମ୍ପ୍ରଦାୟ, ପରିବାର, ବିଶ୍ୱାସ, ଆମ ପାଇଁ ଏହାର ଅର୍ଥ ହେଉଛି ଏକତ୍ରିତ ହେବା। ତୁମ ସହିତ ମିଶି, ଆମେ ଏହି ଧାରଣାକୁ ପରିବର୍ତ୍ତନ କରିବୁ। ଆମେ ଏକାଠି ଏହା କରିପାରିବା।
ନିକଟରେ ଘୃଣ୍ୟ ଅପରାଧ ଏବଂ ଶିଖମାନଙ୍କ ବିରୁଦ୍ଧରେ ହୋଇଥିବା ଆକ୍ରମଣ ଘଟଣା ପରେ ଆଡମ୍ସ ଏବଂ ନ୍ୟୁୟର୍କ ରାଜ୍ୟ ସଭା ସଦସ୍ୟ ଜେନିଫର୍‌ ରାଜକୁମାର ରବିବାର ଏଠାରେ ଶିଖ ସମ୍ପ୍ରଦାୟର ସଦସ୍ୟଙ୍କୁ ଭେଟିଥିଲେ।