ବୋରିଗୁମ୍ମା,୩ା୧(ଡି.ଏନ.ଏ.): କୋରାପୁଟ ଜିଲା ବୋରିଗୁମ୍ମା ଥାନା ଅନ୍ତର୍ଗତ ଚାଲାଣଗୁଡା କାଜୁମିଲ୍ ପଛପଟେ ଥିବା ନୀଳଗିରି ଜଙ୍ଗଲରୁ ଜଣେ ଯୁବତୀଙ୍କ ମୃତଦେହ ପୋଲିସ ଜବତ କରିଛି। ତାଙ୍କ ନାମ ସୁଭଦ୍ରା ଅମାନତ୍ୟ(୧୯)। ଘର ଚିଲିଗୁଡା ଗ୍ରାମରେ। ଗତ ୩୦ ତାରିଖ ସନ୍ଧ୍ୟାରୁ ସେ ନିଖୋଜ ଥିଲେ।
ସୁଭଦ୍ରା ଘରୁ କେଉଁଆଡେ ଚାଲିଯାଇଥିବା ଜାଣିବା ପରେ ପରିବାର ଲୋକେ ବହୁ ଖୋଜାଖୋଜି କରି ତାଙ୍କ ସନ୍ଧାନ ପାଇ ନ ଥିଲେ। ରବିବାର ଗ୍ରାମର କେତେ ଜଣ ମହିଳା ଜାଳେଣି କାଠ ସଂଗ୍ରହ କରିବାକୁ ନୀଳଗିରି ଜଙ୍ଗଲକୁ ଯାଇଥିଲେ। ସେଠାରେ ମହିଳାମାନେ ଏକ ମୋବାଇଲ ଫୋନ ପଡିଥିବା ଦେଖିବାକୁ ପାଇଥିଲେ। ପରେ ଲଟାବୁଦାରୁ ମୃତଦେହ ପଡିଥିବା ଦେଖି ଏହା ସୁଭଦ୍ରାଙ୍କର ବୋଲି ଜାଣିପାରି ପରିବାର ଲୋକଙ୍କୁ ଜଣାଇଥିଲେ। ତାଙ୍କ ସମ୍ପର୍କୀୟ ମାମୁ ଭୁବନ ଅମାନତ୍ୟ ବୋରିଗୁମ୍ମା ପୋଲିସକୁ ଖବର ଦେଇଥିଲେ। ଆଇଆଇସି ଖୁରେଶ୍ୱର ସାହୁ ଏକ ଟିମ ସହ ଘଟଣାସ୍ଥଳରେ ପହଞ୍ଚତ୍ଥିଲେ। ପରେ ଅନୁସନ୍ଧାନୀ କୁକୁର ଓ ଫୋରେନସିକ ଟିମ୍ ପହଞ୍ଚତ୍ ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତରୁ ଏହା ଏକ ହତ୍ୟାକାଣ୍ଡ ବୋଲି ପୋଲିସ ସନ୍ଦେହ କରୁଛି। ସୁଭଦ୍ରାଙ୍କ ମୁଣ୍ଡରେ ଆଘାତ ଲାଗିବା ସହ କେଶକୁ ଦୁର୍ବୃତ୍ତମାନେ ପୋଡି ଦେଇଥିବା ଜଣାପଡିଛି। ତଦନ୍ତ ପରେ ହତ୍ୟାର କାରଣ ସ୍ପଷ୍ଟ ହେବ ବୋଲି ଏସ୍ଡିପିଓ ହରେକୃଷ୍ଣ ମାଝୀ କହିଛନ୍ତି। ଏନେଇ ପୋଲିସ ଦଫା ୩୦୨, ୨୦୧ରେ ଏକ ମାମଲା (ନଂ. ୨/୨୨) ରୁଜୁ କରି ତଦନ୍ତ ଚଳାଇଛି।
ସୂଚନାଯୋଗ୍ୟ, ସୁଭଦ୍ରାଙ୍କ ବାପା ଧବୁଲୁ ଅମାନତ୍ୟ ଓ ମା’ ଧନେଇ ମାସ ହେବ ଦାମନଯୋଡିର ଏକ ଇଟାଭାଟିରେ କାମ କରୁଛନ୍ତି। ଘରେ ଦୁଇ ଭଉଣୀ, ଗୋଟିଏ ଭାଇ ଆଈମା’ ପାଖରେ ରହୁଥିଲେ। ସୁଭଦ୍ରା ନିକଟସ୍ଥ କାଜୁ ମିଲରେ କାମ କରୁଥିଲେ।
