ରେଢାଖୋଲ,୨୩ା୧୧(ଡି.ଏନ.ଏ.): ସମ୍ବଲପୁର ଜିଲା ରେଢ଼ାଖୋଲ ଉପଖଣ୍ଡ ନାକ୍ଟିଦେଉଳ ବ୍ଲକ ଅଧୀନ ବଲାସିଙ୍ଗା ଗ୍ରାମର ଯୁବ ବୈଜ୍ଞାନିକ ଡ. ଶେଷ କିଷାନ ଖୁବ୍ଶୀଘ୍ର ଏକ ଫାର୍ମା କମ୍ପାନୀ ଖୋଲିବାକୁ ଯାଉଛନ୍ତି। ମଙ୍ଗଳବାର ତାଙ୍କ ବିବାହ ରିସେପ୍ସନ ଅବସରରେ ରେଢ଼ାଖୋଲ ବିଜୁ ପଟ୍ଟନାୟକ କଲ୍ୟାଣ ମଣ୍ଡପଠାରେ ଖବରଦାତା ସମ୍ମିଳନୀରେ ସେ ଏହା ଘୋଷଣା କରିଛନ୍ତି। ଡ. ଶେଷ କିଷାନ ଫାର୍ମା କମ୍ପାନୀ ପ୍ରାଇଭେଟ ଲିମିଟେଡ ନାମରେ ଭୁବନେଶ୍ବରଠାରେ ଏହା ପ୍ରତିଷ୍ଠା କରାଯିବ। ପ୍ରାଥମିକ ପର୍ଯ୍ୟାୟରେ ଆସନ୍ତା ୪ମାସ ଭିତରେ ଡାଇବେଟିସ, ବ୍ଲଡପ୍ରେସର, ଗ୍ୟାସ୍ଟିକ, ଆଣ୍ଟିବାଓଟିକ ଓ ମଲଟିଭିଟାମିନ ଜେନେରିକ ଔଷଧ ବଜାରରେ ଉପଲବ୍ଧ ହେବ। ତେବେ ଜେନେରିକ ହେଲେ ମଧ୍ୟ ମାନରେ କୌଣସି ସାଲିସ କରାଯିବ ନାହିଁ। ପରବର୍ତ୍ତି ପର୍ଯ୍ୟାୟରେ କ୍ୟାନ୍ସର ଭଳି ମାରାତ୍ମକ ରୋଗର ଔଷଧ ପ୍ରସ୍ତୁତ କରାଯିବ ବୋଲି ସେ ସୂଚନା ଦେଇଥିଲେ।
ସୂଚନାଯୋଗ୍ୟ, ଯୁବ ବୈଜ୍ଞାନିକ ଡ. କିଷାନ ଜର୍ମାନୀର ଗଟିନଜେନର ଜର୍ଜ ଅଗଷ୍ଟ ୟୁନିଭର୍ସିଟିରୁ ଅର୍ଗାନିକ କେମେଷ୍ଟ୍ରି ଉପରେ ପିଏଚ୍ଡି କରିଛନ୍ତି। ଶୈଶବରୁ ପିତା ବିପିନ କିଷାନ ଓ ମାତା ଦୁଃଖି କିଷାନଙ୍କୁ ହରାଇ ବହୁ ସଂଘର୍ଷ କରି ଶେଷରେ ସେ ନିଜ ଲକ୍ଷ୍ୟସ୍ଥଳରେ ପହଞ୍ଚତ୍ଛନ୍ତି। ଗରିବ ମେଧାବୀ ଛାତ୍ରୀଛାତ୍ରଙ୍କ ଶିକ୍ଷା କ୍ଷେତ୍ରରେ ଉନ୍ନତି ଆଣିବା ପାଇଁ ତାଙ୍କ ଫାର୍ମା କମ୍ପାନୀର ଲାଭାଂଶକୁ ଖର୍ଚ୍ଚ କରିବେ ବୋଲି ସେ କହିଛନ୍ତି। ତାଙ୍କ ଗ୍ରାମର ୧୮୦ ଛାତ୍ରୀଛାତ୍ରଙ୍କ ପାଠପଢା ଦାୟିତ୍ୱ ନେଇଥିବା ବେଳେ ସେମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ଲକ୍ଷ୍ୟ ରଖିଛନ୍ତି। ତାଙ୍କ ଫାର୍ମା କମ୍ପାନୀରୁ ପ୍ରସ୍ତୁତ ଔଷଧ ଓଡ଼ିଶାର ଗରିବ ଲୋକ ଯେଭଳି ଅଳ୍ପ ମୂଲ୍ୟରେ ପାଇ ଉପକୃତ ହେବେ ସେଥିପାଇଁ ସେ ଉଦ୍ୟମରତ ବୋଲି ପ୍ରକାଶ କରିଛନ୍ତି। ପ୍ରକାଶଥାଉ କି ଡ. କିଷାନ ସୋମବାର ରାତିରେ ବାଲେଶ୍ବର ଜିଲା ବାଳିଆପାଳ ବ୍ଲକ ଖଗଡାପାଳ ଗ୍ରାମର ଗୋପାଳକୃଷ୍ଣ ଜେନା ଓ ସୁଚିତ୍ରା ଜେନାଙ୍କ କନ୍ୟା ଜୟଶ୍ରୀଙ୍କ ସହ ବିବାହ ବନ୍ଧନରେ ବାନ୍ଧି ହୋଇଛନ୍ତି।
