ଓ୍ବାଶିଂଟନ୍: ନିଶା ମଣିଷର ସବୁଠାରୁ ବଡ଼ ଶତ୍ରୁ। ଯେତେବେଳେ ସେ ନିଶାରେ ଥା’ନ୍ତି, ସେତେବେଳେ କିଛି ଅଜବ କାମ କରିଥା’ନ୍ତି। ତାହା ମଜାଳିଆ ଏବଂ ଆଶ୍ଚର୍ଯ୍ୟ ମଧ୍ୟ ହୋଇପାରେ। ଆମେରିକାର ଜଣେ ବ୍ୟକ୍ତି ନିଶାରେ ଏକ ଦୁର୍ଲଭ କଇଁଛକୁ ଆକ୍ରମଣ କରି ଏବେ ଜେଲ ଯାଇଥିବା ଜଣାପଡିଛି। ରିପୋର୍ଟ ମୁତାବକ, ୨୦୨୧ରେ ଆମେରିକାର ଇଷ୍ଟ ସାନ ଜୋସ୍ରେ ଥିବା ଏକ ପ୍ଲେ ସ୍କୁଲରେ ଜିଓର୍ଜି ରୋବଲେସ୍ ନାମକ ବ୍ୟକ୍ତି ନିଶାସକ୍ତ ଅବସ୍ଥାରେ ଏକ କଇଁଛକୁ ଆକ୍ରମଣ କରିଥିଲେ। ଆଫ୍ରିକାନ୍ ସୁଲକାଟା ପ୍ରଜାତିର ଉକ୍ତ ଦୁର୍ଲଭ କଇଁଛର ବୟସ ୭୦ ବର୍ଷ। ରିପୋର୍ଟ ଅନୁସାରେ, ଉକ୍ତ ବ୍ୟକ୍ତି ଚୋରି କରିବା ଉଦ୍ଦେଶ୍ୟରେ ଆସିଥିଲେ। ହେଲେ ସେଠାରେ କଇଁଛକୁ ଦେଖି ଶତ୍ରୁ ଭାବି ତାକୁ ଉଠାଇ ଫୋପାଡି ଦେଇଥିଲେ। ଏ ସବୁକୁ ତାଙ୍କ ପଡୋଶୀ ଦେଖି ପାଟି କରିବାକୁ ଲାଗିଥିଲେ। ଉକ୍ତ ବ୍ୟକ୍ତି ଏକ ମୁନିଆ ଅସ୍ତ୍ରରେ କଇଁଛର ମୁଣ୍ଡ ଏବଂ ପିଠିକୁ ଆକ୍ରମଣ କରିଥିଲେ। ସେଥିପାଇଁ ଉକ୍ତ ବ୍ୟକ୍ତିଙ୍କୁ ୨ ବର୍ଷ ଜେଲଦଣ୍ଡ ହୋଇଛି। ଏଥିସହ ୧୦ ବର୍ଷ ପର୍ଯ୍ୟନ୍ତ ତାଙ୍କୁ ପ୍ରାଣୀ ପାଳିବାକୁ ବାରଣ ହୋଇଛି। ତେବେ ଉକ୍ତ ବ୍ୟକ୍ତି ଜଣକ ସେଦିନ ପ୍ଲେ ସ୍କୁଲରୁ କିଛି ବିଦ୍ୟୁତ୍ ସରଞ୍ଜାମ ଚୋରି କରିଥିବା ଜଣାପଡିଛି।
