କେନ୍ଦୁଝର,୨୯।୭(ନରେଶ ଚନ୍ଦ୍ର ପଟ୍ଟନାୟକ) : କେନ୍ଦୁଝର ଜିଲା ହରିଚନ୍ଦନପୁରରେ ଏକ ଅଭାବନୀୟ ଦେଖିବାକୁ ମିଳିଛି । ଜଣେ ୨୧ ବର୍ଷୀୟ ଯୁବକଙ୍କ ହାଇଡ୍ରାମା ବର୍ତ୍ତମାନ ଚର୍ଚ୍ଚାର ବିଷୟ ସାଜିଛି । ପ୍ରେମିକାକୁ ପାଇବା ପାଇଁ ଯୁବକ ଜଣକ ଏକ ନିର୍ମାଣଧୀନ ଜଗନ୍ନାଥ ମନ୍ଦିର ଉପରକୁ ଚଢିଯାଇଥିଲେ ।
ସେଠାରେ ପ୍ରେମିକାକୁ ପାଇବା ପାଇଁ ଏକ ସର୍ତ୍ତ ରଖିଥିଲେ । ଯୁବତୀଙ୍କୁ ଏଠାକୁ ଆଣ, ବିବାହ କରିବା ପରେ ତଳକୁ ଓହ୍ଲାଇବି ବୋଲି କହିଥିଲେ । ପରିବାର ଲୋକେ ବୁଝାସୁଝା କରିଥିଲେ ହେଁ ତଳକୁ ଓହ୍ଲାଇନଥିଲେ । ଯୁବତୀ ନଆସିଲେ ତଳକୁ ଡେଇଁ ପଡିବି ବୋଲି ଧମକ ଦେଇଥିଲେ । ଖବରପାଇ ପୋଲିସ ଓ ଅଗ୍ନିଶମ ବିଭାଗ ପହଞ୍ଚି ତାଙ୍କୁ ଓହ୍ଲାଇବାକୁ ଚେଷ୍ଟା କରିଥିଲେ ହେଁ ନାକେଦମ ହୋଇଯାଇଥିଲେ । ଯୁବକଙ୍କ ଘର ସ୍ଥାନୀୟ କାଳିଆଦୁମା ଗ୍ରାମରେ ବୋଲି ଜଣାପଡିଛି ।
ଖବର ଅନୁସାରେ, ସେ ତାଙ୍କ ଗ୍ରାମ ନିକଟ କାଣ୍ଡବାରିସି ଗ୍ରାମର ଜଣେ ଯୁବତୀଙ୍କୁ ଭଲ ପାଉଥିଲେ । ନିକଟରେ ସେମାନେ କୁଆଡେ ଫେରାର ହୋଇଯାଇଥିଲେ । ତେବେ ଉଭୟ ପରିବାର ଲୋକ ସେମାନଙ୍କୁ ବୁଝାସୁଝା କରି ଘରକୁ ଆଣିଥିଲେ । ପରେ ଯୁବତୀଙ୍କୁ ପରିବାର ଲୋକ ଅଲଗା ସ୍ଥାନରେ ରଖିଥିଲେ ଏବଂ ଭେଟ ହେବାକୁ ଦେଇନଥିଲେ । ଏଣୁ ଯୁବକ କ୍ଷୁବ୍ଧ ହୋଇ ଏଭଳି ନିଷ୍ପତ୍ତି ନେଇଥିଲଲେ । ବୁଧବାର ଅପରାହ୍ନ ପ୍ରାୟ ୨ ଟାରେ ଯୁବକ ଜଣଙ୍କ ଉକ୍ତ ମନ୍ଦିର ଉପରେ ଚଢିଯାଇଥିଲେ । ଏହା ଦେଖି ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ ।
ପାଖାପାଖି ୪.୩୦ ରେପୋଲିସ ଓ ଅଗ୍ନିଶମ ବାହିନୀ ଉପରକୁ ଯାଇ ବୁଝାସୁଝା କରି ତଳକୁ ଓହ୍ଲାଇଥିଲେ । ଏନେଇ ହରିଚନ୍ଦନପୁର ଥାନା ଅଧିକାରିଣୀ ମିତାଲି ବିଶ୍ୱାଳ କହିଛନ୍ତି ଯେ ଉପରକୁ ଚଢିଯାଇଥିବା ଯୁବକଙ୍କୁ ଉଦ୍ଧାର କରାଯାଇଛି ।
