ବଡ଼ବିଲ/ଯୋଡ଼ା,୨୭।୧୧(ସ୍ବ.ପ୍ର./ଡି.ଏନ୍.ଏ): କେନ୍ଦୁଝର ଜିଲା ବଡ଼ବିଲ ଥାନା ଅଧୀନ ୧୦ ନମ୍ବର ରାଜ୍ୟ ରାଜପଥ ସେରେଣ୍ଡାଠାରେ ହାଇଓ୍ବା ପଛକୁ ବୋଲେରୋ ଧକ୍କା ଦେବା ଫଳରେ ଜଣଙ୍କର ମୃତ୍ୟୁ ଘଟିଛି। ଅନ୍ୟ ୨ଜଣ ଗୁରୁତର ହୋଇଛନ୍ତି। ମୃତକ ଜଣକ ହେଲେ ଯୋଡ଼ା ଥାନା ଏଫଏପି କଲୋନୀ ଅଞ୍ଚଳରେ ରହୁଥିବା ସକ୍ଷମ ସଦାନନ୍ଦ(୨୪)। ସକ୍ଷମ ଯୋଡା ଖଣ୍ଡବନ୍ଧରେ ଏକ ଠିକା ସଂସ୍ଥାରେ ମାଇନିଂ ଇଞ୍ଜିନିୟର ଭାବେ କାର୍ଯ୍ୟ କରୁଥିଲେ। ତାଙ୍କ ବାପା ଯୋଡ଼ା ସେଣ୍ଟ ଟେରେସା ବିଦ୍ୟାଳୟର ଶିକ୍ଷକ ଅଛନ୍ତି।
ମିଳିଥିବା ସୂଚନା ମୁତାବକ, ସକ୍ଷମଙ୍କ ସହ ତାଙ୍କ ଦୁଇ ସାଙ୍ଗ ହର୍ଷ ଶଙ୍କର ଓ ଲୋକେଶ ପାୱାରଙ୍କ ଯୋଡ଼ାରୁ ଏକ ବୋଲେରୋ ଗାଡିରେ(ନଂ. ଓଡି ୦୯ପି-୩୪୮୯) ବଡ଼ବିଲ ଆସୁଥିଲେ। ହେଲେ ବୋଲେରୋଟି ସେରେଣ୍ଡାଠାରେ ଭାରସାମ୍ୟ ହରାଇ ଏକ ହାଇଓ୍ବା ପଛପଟେ ପିଟି ହୋଇ ପଶି ଯାଇଥିଲା। ଏପରି କି ବୋଲେରର ଏୟାର ବ୍ୟାଗ୍ ଖୋଲିଥିଲେ ହେଁ ତାହା ଫାଟି ଯାଇଥିଲା। ଫଳରେ ୩ ଜଣ ସାଙ୍ଗ ଗୁରୁତର ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ବଡ଼ବିଲସ୍ଥିତ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ସକ୍ଷମଙ୍କୁ ମୃତ୍ୟୁ ଘୋଷଣା କରିଥିଲେ। ଲୋକେଶ ଏବଂ ହର୍ଷଙ୍କ ଅବସ୍ଥା ସଙ୍କଟାପନ୍ନ ରହିଛି। ଉଭୟଙ୍କୁ କଟକ ସ୍ଥାନାନ୍ତରିତ କରାଯାଇଥିବା ଜଣାପଡ଼ିଛି। ଏନେଇ ପୋଲିସ ଏକ ମାମଲା(ନଂ. ୩୬/୨୨) ରୁଜୁ କରି ତଦନ୍ତ ଆରମ୍ଭ କରିଛି।
