ନୂଆଦିଲ୍ଲୀ,୧୭।୬: ଭାରତର ମୁଖ୍ୟ ବିଚାରପତି (CJI) ଜଷ୍ଟିସ ସୂର୍ଯ୍ୟକାନ୍ତଙ୍କ ଦ୍ୱାରା କିଛି ସମୟ ପୂର୍ୱରୁ ଦିଆଯାଇଥିବା ‘ଅସରପା’ (କକ୍ରୋଚ) ବୟାନକୁ ନେଇ ସାରା ଦେଶରେ ପ୍ରବଳ ହଙ୍ଗାମା ହୋଇଥିଲା। ଏବେ ପୁଣିଥରେ ସିଜେଆଇ ବୁଧବାର ଦିନ ଏକ ମାମଲାର ଶୁଣାଣି ବେଳେ ସଦୃଶ ଟିପ୍ପଣୀ ଦେଇଛନ୍ତି। ଜଣେ ଅଭିଯୁକ୍ତର ଜାମିନ ଆବେଦନକୁ ଖାରଜ କରି ସିଜେଆଇ କହିଛନ୍ତି ଯେ, “ତୁମେମାନେ ହେଉଛ ପରଜୀବୀ, ତୁମମାନଙ୍କର ଜେଲରେ ରହିବା ହିଁ ସମାଜ ପାଇଁ ମଙ୍ଗଳକର।”
ସୁପ୍ରିମକୋର୍ଟରେ ମୁଖ୍ୟ ବିଚାରପତି ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସାଇବର ଅପରାଧ ସହ ଜଡ଼ିତ ଏକ ମାମଲାରେ ଅଭିଯୁକ୍ତର ଜାମିନ ଆବେଦନ ଉପରେ ଶୁଣାଣି କରୁଥିଲେ। ଏହି ସମୟରେ ସିଜେଆଇ ଅଭିଯୁକ୍ତକୁ ଜାମିନ ଦେବାକୁ ମନା କରିବା ସହ କଡ଼ା ସମାଲୋଚନା କରିଥିଲେ। ସେ କହିଥିଲେ ଯେ ସାଇବର ଅପରାଧୀମାନେ ହେଉଛନ୍ତି ପରଜୀବୀ, ଯେଉଁମାନେ ଲୋକଙ୍କଠାରୁ କୋଟି କୋଟି ଟଙ୍କା ଲୁଟ କରନ୍ତି, ସେମାନଙ୍କୁ ପ୍ରତାରଣା କରନ୍ତି ଏବଂ ସେମାନଙ୍କୁ ଧରିବା ମଧ୍ୟ କଷ୍ଟକର ହୋଇଥାଏ। ଏଭଳି ଅପରାଧୀମାନେ ଜେଲ ରେ ରହିବା ହିଁ ସମାଜର ସୱାର୍ଥ ରକ୍ଷା କରିବ।
ଦେଶର ମୁଖ୍ୟ ବିଚାରପତି ଜଷ୍ଟିସ ସୂର୍ଯ୍ୟକାନ୍ତ ମାମଲାର ଶୁଣାଣି ସମୟରେ ସାଇବର ଅପରାଧ ମାମଲାକୁ ନେଇ ଚିନ୍ତା ପ୍ରକଟ କରିବା ସହ ଅଭିଯୁକ୍ତକୁ କଡ଼ା ଭାଷାରେ ଗାଳି କରିଥିଲେ। ସେ କହିଥିଲେ, “ତୁମେମାନେ ପରଜୀବୀ, ଯେଉଁମାନେ ନିବେଶକମାନଙ୍କଠାରୁ କୋଟି କୋଟି ଟଙ୍କା ଠକେଇ କରୁଛ। ସାଇବର ଅପରାଧୀଙ୍କ ପ୍ରତି ଆମକୁ ଅତ୍ୟନ୍ତ କଠୋର ହେବାକୁ ପଡ଼ିବ। ତୁମେମାନେ କୌଣସି ଗୋଟିଏ ରାଜ୍ୟରେ ସୀମିତ ରହୁନାହଁ। ତାମିଲନାଡୁରେ କାହା ସହିତ ଠକେଇ କରୁଛ ଏବଂ ପୁଣି ସେଠାରୁ ଜମ୍ମୁ ଚାଲିଯାଉଛ। ସମାଜର ଭଲ ଏଥିରେ ଅଛି ଯେ ତୁମ ଭଳି ଲୋକ ଜେଲ କୋଠରୀ ଭିତରେ ହିଁ ବନ୍ଦ ରୁହନ୍ତୁ।”
ଏହାପୂର୍ୱରୁ ମଧ୍ୟ ସିଜେଆଇ ସୂର୍ଯ୍ୟକାନ୍ତ ଏକ ମାମଲାର ଶୁଣାଣି ସମୟରେ ସମାନ ଧରଣର ଟିପ୍ପଣୀ କରିଥିଲେ, ଯେଉଁଠାରେ ସେ କଥିତ ଭାବେ ବେକାର ଯୁବକମାନଙ୍କୁ ଅସରପା ସହ ତୁଳନା କରିଥିଲେ। ଏହାପରେ ତାଙ୍କ ବୟାନକୁ ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଏପରିକି ତାଙ୍କ ବୟାନକୁ ଆଧାର କରି ସୋସିଆଲ ମିଡିଆରେ ‘କକ୍ରୋଚ ଜନତା ପାର୍ଟି’ (CJP) ନାମରେ ଏକ ନୂତନ ଅନଲାଇନ ରାଜନୈତିକ ଦଳ ମଧ୍ୟ ଆତ୍ମପ୍ରକାଶ କରିଥିଲା।
ସେତେବେଳେ ସେ କହିଥିଲେ ଯେ ବେକାର ଯୁବକମାନେ ପରବର୍ତ୍ତୀ ସମୟରେ ମିଡିଆ, ସୋସିଆଲ ମିଡିଆ ଏବଂ ଆରଟିଆଇ (RTI) ଆକ୍ଟିଭିଷ୍ଟ ବନିଯାଉଛନ୍ତି ଏବଂ ତା’ପରେ ସିଷ୍ଟମ ଉପରେ ହିଁ ଆକ୍ରମଣ ଆରମ୍ଭ କରିଦେଉଛନ୍ତି। ତେବେ ବିବାଦ ଅଧିକ ବଢ଼ିବା ପରେ ସିଜେଆଇ ନିଜ ଟିପ୍ପଣୀ ଉପରେ ସ୍ପଷ୍ଟୀକରଣ ଦେଇ କହିଥିଲେ, “ମୋର ମନ୍ତବ୍ୟକୁ ଭୁଲ ଭାବେ ଉପସ୍ଥାପନ କରାଯାଇଛି। ମୋର ବୟାନ ସେହିମାନଙ୍କ ପାଇଁ ଥିଲା, ଯେଉଁମାନେ ଜାଲ ଏବଂ ନକଲି ଡିଗ୍ରୀ ନେଇ ଆଇନ ବ୍ୟବସାୟରେ ପ୍ରବେଶ କରୁଛନ୍ତି।”
