ଭଦ୍ରକ ଅଫିସ,୧୬।୭ ଭଦ୍ରକ ଜିଲା ବନ୍ତ ବ୍ଲକର ଆଡ଼ିଆ ପଞ୍ଚାୟତ ଅଧୀନ ଜିରିଣା-ଆଡ଼ିଆ ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଛି। ଖରାଦିନେ ଅଣଓସାରିଆ ମାଟି ରାସ୍ତା ଆଉ ବର୍ଷା ଦିନେ କାଦୁଅ ପଚପଚ ଯାତାୟାତରେ ସମସ୍ୟା ସୃଷ୍ଟି କରୁଛି। ଏହି ରାସ୍ତା ଉପରେ ନିର୍ଭର କରୁଥିବା ୫ ଗ୍ରାମର ଲୋକେ ଅସୁବିଧାର ସମ୍ମୁଖୀନ ହେଉଥିବା ବେଳେ ରାସ୍ତା ଅବସ୍ଥା ସୁଧୁରୁନି।
ପଞ୍ଚାୟତ ସଦର ମହକୁମାକୁ ଯିବା ପାଇଁ ସବୁଦିନିଆ ରାସ୍ତାଟିଏ ଏପର୍ଯ୍ୟନ୍ତ ନିର୍ମାଣ ହୋଇପାରି ନାହିଁ। ଜିରିଣା, ନିମଗଢ଼ିଆ, ବରଗଢ଼ିଆ, ବାହାଦଲପୁର ଓ ନଳିତାଗଢ଼ିଆ ଗ୍ରାମର ଆନୁମାନିକ ୪ଶହରୁ ଊର୍ଦ୍ଧ୍ୱ ପରିବାରର ୨ହଜାର ଲୋକ ଏହି ରାସ୍ତା ଉପରେ ନିର୍ଭରଶୀଳ। ଛାତ୍ରୀଛାତ୍ର ଆଡ଼ିଆସ୍ଥିତ ଉଚ୍ଚ ବିଦ୍ୟାଳୟକୁ ପାଠ ପଢ଼ିବା ଏହି ରାସ୍ତା ଦେଇ ଆସିଥାନ୍ତି। ରାଶନ ସାମଗ୍ରୀ ପାଇଁ ହିତାଧିକାରୀଙ୍କୁ ପଞ୍ଚାୟତ କାର୍ଯ୍ୟାଳୟକୁ ଯିବାକୁ ପଡ଼ିଥାଏ। ବର୍ଷାଦିନେ କାଦୁଅ ରାସ୍ତାରେ ଯାଇ ନ ପାରି ୨ କି.ମି. ବଦଳରେ ଅଧିକ ୮ କି.ମି. ରାସ୍ତା ବୁଲି ସେମାନଙ୍କୁ ଯିବାକୁ ପଡୁଛି। ୧୯୯୩-୯୪ ମସିହାରେ ଅଣଓସାରିଆ ମାଟି ରାସ୍ତା ନିର୍ମାଣ ହୋଇଥିଲା। ନିର୍ମାଣର ୨୬ ବର୍ଷ ପରେ ୨୦୨୦-୨୧ରେ ମୁଠାଏ ମୋରମ ପଡ଼ିଥିବା ବେଳେ ବର୍ଷା ପାଣିରେ ଧୋଇଯାଇ ପୁଣି ପୂର୍ବ ଭଳି ଅବସ୍ଥା। ୫ ଗ୍ରାମର ଲୋକେ ଯିବାଆସିବା କରିବାରେ ହଇରାଣ ହେଉଛନ୍ତି। ଏନେଇ ସେମାନେ ବାରମ୍ବାର ପ୍ରଶାସନ ଓ ଲୋକପ୍ରତିନିଧିମାନଙ୍କୁ ଗୁହାରି ଜଣାଇଥିଲେ ମଧ୍ୟ ଆଜି ପର୍ଯ୍ୟନ୍ତ କୌଣସି ସୁଫଳ ମିଳିପାରି ନ ଥିବା କହିଛନ୍ତି। ଏହାକୁ ପ୍ରଧାନମନ୍ତ୍ରୀ ସଡ଼କ କିମ୍ବା ମୁଖ୍ୟମନ୍ତ୍ରୀ ସଡ଼କ ଯୋଜନାରେ ଅନ୍ତର୍ଭୁକ୍ତ କରି ରାସ୍ତା ନିର୍ମାଣ ପାଇଁ ସ୍ଥାନୀୟ ଲୋକପ୍ରତିନିଧିମାନେ ଦାବି କରିଛନ୍ତି।
