ଲକ୍ଷ୍ନୌ,୨୩।୧୦: ଜମ୍ମୁ-କଶ୍ମୀରରେ ଆତଙ୍କବାଦୀ ଆକ୍ରମଣ ଘଟଣାର ବୃଦ୍ଧିକୁ ରୋକିବା ପାଇଁ କାର୍ଯ୍ୟ ଆରମ୍ଭ ହୋଇଛି। ଏଥିପାଇଁ ଜମ୍ମୁ-କଶ୍ମୀରର ଜେଲରେ ବନ୍ଦୀ ଥିବା ‘ଏ’ ଏବଂ ‘ବି’ ବର୍ଗର ହାର୍ଡକୋର ଆତଙ୍କବାଦୀଙ୍କୁ ଅନ୍ୟ ରାଜ୍ୟର ଜେଲକୁ ସ୍ଥାନାନ୍ତର କରାଯାଉଛି। କଶ୍ମୀର ଉପତ୍ୟକାର ବିଭିନ୍ନ କେନ୍ଦ୍ରୀୟ ଜେଲରେ ବନ୍ଦୀ ହୋଇଥିବା ୨୬ ଆତଙ୍କବାଦୀଙ୍କ ପ୍ରଥମ ଗୋଷ୍ଠୀକୁ ୨୨ ଅକ୍ଟୋବରରେ ଉତ୍ତରପ୍ରଦେଶର ଆଗ୍ରା ସେଣ୍ଟ୍ରାଲ ଜେଲକୁ ପଠାଯାଇଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ଆତଙ୍କବାଦୀଙ୍କୁ ସ୍ଥାନାନ୍ତର କରିବା ପାଇଁ ଜମ୍ମୁ-କଶ୍ମୀର ଜନ ନିରାପତ୍ତା ଆଇନ, ୧୯୭୮ର ଧାରା ୧୦ (ଖ) ଅନୁଯାୟୀ ପ୍ରଶାସନ ପକ୍ଷରୁ ନିର୍ଦ୍ଦେଶ ଜାରି ହୋଇଛି।
କୁହାଯାଉଛି ଯେ, ଜମ୍ମୁ-କଶ୍ମୀରର ଜେଲରେ ବନ୍ଦୀ ଥିବା ୧୦୦ ଜଣ ଆତଙ୍କବାଦୀଙ୍କ ତାଲିକା ସୁରକ୍ଷା ବାହିନୀ ଦ୍ୱାରା ପ୍ରସ୍ତୁତ କରାଯାଇଛି। ଏହି ଆତଙ୍କବାଦୀମାନେ ଜେଲରେ ଥିବାବେଳେ ବାହାରେ ସେମାନଙ୍କ ସହଯୋଗୀଙ୍କ ସହିତ ଯୋଗାଯୋଗରେ ଥିବା ଅଭିଯୋଗ ହୋଇଛି। ଜେଲରେ ବନ୍ଦୀ ହୋଇଥିବା ଆତଙ୍କବାଦୀମାନେ ସମ୍ପ୍ରତି ଆତଙ୍କବାଦୀ ଆକ୍ରମଣକୁ ପରୋକ୍ଷରେ ପରିଚାଳନା କରୁଛନ୍ତି। ୩୦ ଆତଙ୍କବାଦୀଙ୍କୁ ‘ଏ’ ବର୍ଗରେ ରଖାଯାଇଥିବାବେଳେ ୭୦ଙ୍କୁ ‘ବି’ ବର୍ଗରେ ରଖାଯାଇଛି।
ସେମାନେ ଜେଲରୁ ଖସିଯିବାର ଆଶଙ୍କା ରହିଥିବାର କୁହାଯାଉଛି। ଏହି ୧୦୦ ଆତଙ୍କବାଦୀଙ୍କ ତାଲିକାରୁ ୨୬ ଜଣ ଆତଙ୍କବାଦୀଙ୍କୁ ଉତ୍ତରପ୍ରଦେଶର ଜେଲକୁ ପଠାଯାଇଛି। ଏଠାରେ ଆତଙ୍କବାଦୀଙ୍କ ଉପରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଆଇନ ଚାଲିବ ବୋଲି ଆତଙ୍କବାଦୀଙ୍କ ମଧ୍ୟରେ ଭୟ ପ୍ରକାଶ ପାଇଥିବା ଚର୍ଚ୍ଚା ହେଉଛି। ସେମାନଙ୍କୁ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଶ୍ରୀନଗର ବିମାନ ବନ୍ଦରକୁ ସ୍ଥାନାନ୍ତର କରାଯାଇଥିଲା। ପରେ ସେଠାରୁ ଏହି ଆତଙ୍କବାଦୀଙ୍କୁ ଚାଟାର୍ଡ ବିମାନରେ ଆଗ୍ରା ପଠାଯାଇଛି।
