ବେଙ୍ଗାଲୁରୁ,୨ ।୯: କର୍ନାଟକର ପ୍ରସିଦ୍ଧ ଲିଙ୍ଗାୟତ ମଠ ମହନ୍ତଙ୍କ ଉପରେ ଏକ ବଡ ଧରଣର ଅଭିଯୋଗ ଆସିଛି । ଅଭିଯୁକ୍ତ ମହନ୍ତ ସନ୍ଥ ଶିବମୂର୍ତ୍ତି ମୁରୁଗା ଶରଣାରୁ ୨ ନାବାଳିକା ଛାତ୍ରୀଙ୍କୁ ବଳାତ୍କାର କରିଥିବା ଅଭିଯୋଗ ଆସିବା ପରେ ଗୁରୁବାର ତାଙ୍କୁ ଗିରଫ କରାଯାଇଛି । ପୋଲିସ ସମ୍ପୂର୍ଣ୍ଣ ଘଟଣାର ଯାଞ୍ଚ ଆରମ୍ଭ କରି ଦେଇଛି । ହେଲେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଏତେବଡ ଘଟଣାକୁ ନେଇ ବିରୋଧୀ ସମ୍ପୂର୍ଣ୍ଣ ଭାବେ ଚୁପ ବସିଛି । ଏହାସହ ଯେଉଁ କେତେଜଣ ନେତା ଏହି ଘଟଣାକୁ ନେଇ ମୁହଁ ଖୋଲିଛନ୍ତି ସେମାନେ ସମସ୍ତେ ମହନ୍ତଙ୍କୁ ସମର୍ଥନ କରୁଛନ୍ତି ।
ଏ ସମସ୍ତ ଖେଳ ଭୋଟ ବ୍ୟାଙ୍କ ଓ ରାଜନୀତିର ବୋଲି କୁହାଯାଉଛି । କର୍ନାଟକରେ ଲିଙ୍ଗାୟତ ସମ୍ପ୍ରଦାୟ ରାଜନୀତିରେ ଓଲଟ ପାଲଟ କରିବାରେ ବଡ ଭୂମିକା ନେଇଥାଏ । ସେଥିପାଇଁ ଏହାର ଧର୍ମଗୁରୁଙ୍କୁ ବିଶେଷ ସମ୍ମାନ ମିଳିଥାଏ । ଏହି ସମ୍ପ୍ରଦାୟର ପ୍ରାୟ ୧୮ ପ୍ରତିଶତ ଭାଗ ରହିଛି । ଯଦି ବିଧାନସଭା କଥା କହିବା ତେବେ ଏହି ସମ୍ପ୍ରଦାୟ ସିଧାସଳଖ ୧୧୮ ଆସନରେ ପ୍ରଭାବ ପକାଇଥାଆନ୍ତି । ରାଜ୍ୟରେ ହୋଇଥିବା ୨୦ ମୁଖ୍ୟମନ୍ତ୍ରୀଙ୍କ ମଧ୍ୟରୁ ୮ ମୁଖ୍ୟମନ୍ତ୍ରୀ ଲିଙ୍ଗାୟତ ସମ୍ପ୍ର୍ରଦାୟର । ଏଥିରୁ ଏବେ ସ୍ପଷ୍ଟ ହୋଇଯାଉଛି କି ସମସ୍ତ ନେତା କାହିଁକି ବଳାତ୍କାରୀ ମହନ୍ତଙ୍କୁ ସମର୍ଥନ କରୁଛନ୍ତି ।
ଅଭିଯୁକ୍ତ ଲିଙ୍ଗାୟତ ସନ୍ଥ ଶିବମୂର୍ତ୍ତି ମୁରୁଗା ଶରଣାରୁଙ୍କୁ ଗିରଫ କରାଯିବା ପରେ ଭାରତୀୟ ଜନତା ପାର୍ଟି(ଭାଜପା) ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପାଙ୍କ ବୟାନ ସାମ୍ନାକୁ ଆସିଛି । ଆଉ ୟେଦୁରପ୍ପା ଯାଞ୍ଚ ପୂର୍ବରୁ ସ୍ପଷ୍ଟ କରିଛନ୍ତି ଯେ ଶିବମୂର୍ତ୍ତି ନିର୍ଦ୍ଦୋଷ । ୟେସ୍ପୁରପ୍ପ୍ା କହିଛନ୍ତି ଶିବମୂର୍ତ୍ତି ନିର୍ଦ୍ଦୋଷ, ତାଙ୍କ ବିରୋଧରେ ଏହା ଏକ ଷଡଯନ୍ତ୍ର । ତାଙ୍କ ବିରୋଧରେ ହୋଇଥିବା ଅଭିଯୋଗରେ କୌଣସି ସତ୍ୟତା ନାହିଁ, ଯାଞ୍ଚ ପରେ ଏହା ସ୍ପଷ୍ଟ ହୋଇଯିବ ।
ଏହାସହ ରାଜ୍ୟର ମୁଖ୍ୟମନ୍ତ୍ରୀ ବସବରାଜ ବୋମ୍ମଇଙ୍କ ବୟାନ ବି ସାମ୍ନାକୁ ଆସିଛି । ସେ ନାବାଳିକାଙ୍କୁ ନ୍ୟାୟ ଦେବା କଥା କହି ନାହାନ୍ତି, ବରଂ କହିଛନ୍ତି ଯାଞ୍ଚ ପରେ ସମସ୍ତ ସତ୍ୟ ପଦାକୁ ଆସିବ । ପରୋକ୍ଷରେ ସେ ସନ୍ଥ ଶିବମୂର୍ତ୍ତିଙ୍କୁ ସମର୍ଥନ କରିଛନ୍ତି ବୋଲି କୁହାଯାଉଛି ।
