ଧର୍ମଶାଳା,୮।୩: ଧର୍ମଶାଳାରେ ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ପଞ୍ଚମ ଟେଷ୍ଟରେ ଯଶସ୍ବୀ ଜୟସ୍ବାଲ ପୁଣି ଥରେ ଚମତ୍କାର ବ୍ୟାଟିଂ କରିଥିଲେ। ସେ ୫ ଚୌକା ଓ ୩ ଛକା ସହାୟତାରେ ୫୮ ବଲରେ ୫୭ ରନ ସଂଗ୍ରହ କରିଥିଲେ। ଏହି ୫୭ ରନ ସହାୟତାରେ ଜୟସ୍ବାଲ ବିରାଟ କୋହଲିଙ୍କ ରେକର୍ଡକୁ ଭାଙ୍ଗି ଦେଇଛନ୍ତି। ବର୍ତ୍ତମାନ ତାଙ୍କ ଆଖି ପୂର୍ବତନ କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କରଙ୍କ ମହାରେକର୍ଡ ଉପରେ ରହିଛି, ଯାହା ଦ୍ୱିତୀୟ ଇନିଂସରେ ବ୍ୟାଟିଂ କରି ସେ ସହଜରେ ଭାଙ୍ଗି ପାରିବେ।
ବିରାଟ କୋହଲି ୨୦୧୬ରେ ଇଂଲଣ୍ଡ ବିପକ୍ଷରେ ଖେଳାଯାଇଥିବା ଟେଷ୍ଟ ସିରିଜରେ ୬୫୫ ରନ ସଂଗ୍ରହ କରିଥିଲେ। ଏହା ଜୟସ୍ବାଲଙ୍କ ଦ୍ୱାରା ଭଙ୍ଗା ଯାଇଥିଲା। ବର୍ତ୍ତମାନ ତାଙ୍କ ନଜର ଭାରତ ପାଇଁ ଏକ ଟେଷ୍ଟ ସିରିଜରେ ସର୍ବାଧିକ ରନ ସଂଗ୍ରହ କରିଥିବା ସୁନୀଲ ଗାଭାସ୍କରଙ୍କ ରେକର୍ଡ ଉପରେ ରହିଛି। ଜୟସ୍ବାଲ ଏପର୍ଯ୍ୟନ୍ତ ଇଂଲଣ୍ଡ ବିପକ୍ଷରେ ୭୧୨ ରନ ସଂଗ୍ରହ କରିଛନ୍ତି।
ଗାଭାସ୍କର ଗୋଟିଏ ସିରିଜ୍ରେ ଭାରତ ପାଇଁ ସର୍ବାଧିକ ୭୭୪ ରନ ସ୍କୋର କରିଛନ୍ତି। ଏହି ରେକର୍ଡ ଭାଙ୍ଗିବା ପାଇଁ ଜୟସ୍ବାଲଙ୍କୁ ମାତ୍ର ୬୩ ରନ ଆବଶ୍ୟକ। କ୍ୟାରିୟରର ୯ମ ଟେଷ୍ଟର ୧୬ତମ ଇନିଂସରେ ବ୍ୟାଟିଂ କରୁଥିବାବେଳେ ଜୟସ୍ବାଲ ୧୦୦୦ ରନ ମାର୍କ ଅତିକ୍ରମ କରିଛନ୍ତି। ଭାରତୀୟ ଓପନର୍ ହାରାହାରି ୬୮.୫୩ରେ ୧୦୨୮ରନ ସ୍କୋର କରିଛନ୍ତି। ଏହି ଅବଧିରେ ସେ ଦୁଇଟି ଡବଲ୍ସ ସହିତ ତିନି ଶତକ ଏବଂ ଚାରି ଅର୍ଦ୍ଧଶତକ ହାସଲ କରିଛନ୍ତି। ଏହି ସମୟରେ ଜୟସ୍ବାଲଙ୍କ ବ୍ୟାଟରୁ ୨୯ ଛକା ଓ ୧୦୮ ଚୌକା ଆସିଥିଲା। ଦ୍ରୁତତମ ୧୦୦୦ ଟେଷ୍ଟ ରନ ସ୍କୋର କରିବାରେ ଜୟସ୍ବାଲ ଦ୍ୱିତୀୟ ଭାରତୀୟ ବ୍ୟାଟ୍ସମ୍ୟାନ ହୋଇଥିଲେ।