ଇନ୍ଦୋର: ଦେଶରେ କରୋନା ବିପକ୍ଷରେ ଟିକାକରଣ ଅଭିଯାନ ଜାରି ରହିଛି। ୬୬ ଲକ୍ଷରୁ ଅଧିକ ଲୋକଙ୍କୁ କୋଭିଡ୍ ଟିକା ଦିଆଯାଇସାରିଛି। ହେଲେ କିଛି ଲୋକ ଏହାକୁ ନେବାକୁ ଭୟ କରୁଥିବା ଦେଖିବାକୁ ମିଳୁଛି। ଲୋକମାନଙ୍କୁ ସଚେତନ କରିବା ପାଇଁ ସରକାରଙ୍କ ପକ୍ଷରୁ ସମସ୍ତ ପ୍ରୟାସ କରାଯାଉଛି। ଏଭଳି ସ୍ଥିତିରେ ଟିକାକରଣର ଦ୍ୱିତୀୟ ପର୍ଯ୍ୟାୟରେ ଇନ୍ଦୋରରେ ଏକ ନିଆରା ଘଟଣା ଦେଖିବାକୁ ମିଳିଛି। ଏଠାର ଏକ ଟିକାକରଣ କାର୍ଯ୍ୟକ୍ରମରେ ନିଜେ ‘ଯମରାଜା’ ଟିକା ନେବାକୁ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିଥିଲେ। ତାଙ୍କୁ ଦେଖି ସେଠାରେ ଉପସ୍ଥିତ ହୋଇଥିବା ଲୋକେ ଚକିତ ହୋଇଥିଲେ। ନିଜ ପାଳିର ଅପେକ୍ଷା କରିବା ପରେ ଯମରାଜା ଟିକା ଲଗାଇଥିଲେ।
ତେବେ ଇନ୍ଦୋର ପୋଲିସର କନେଷ୍ଟବଳ ଥିବା ଜବାହ ସିଂହ ଜୌଦାନ ଯମରାଜା ବେଶରେ ସଜ୍ଜିତ ହୋଇ ଟିକାକରଣ କେନ୍ଦ୍ରରେ ପହଞ୍ଚିଥିଲେ। ଟିକା ସମ୍ପୂର୍ଣ୍ଣ ଭାବେ ସୁରକ୍ଷିତ। ଡରିବାର ଆବଶ୍ୟକତା ନାହିଁ। ଯଦି ଡରିବାର ଅଛି ତେବେ କରୋନାକୁ ଡରନ୍ତୁ। ସେଥିରୁ ବର୍ତ୍ତିବା ପାଇଁ ଟିକା ନିଶ୍ଚିତ ଲଗାନ୍ତୁ। ମୋତେ ବି କରୋନାକୁ ଡର ବୋଲି ସେ କହିବା ସହ ସୁରକ୍ଷା ନିୟମ ପାଳନ କରନ୍ତୁ ବୋଲି ସେ ପରାମର୍ଶ ଦେଇଥିଲେ।
