ନୂଆଦିଲ୍ଲୀ,୨୦ା୨: ବର୍ଡର-ଗାଭାସ୍କର ଟ୍ରଫିର ଦ୍ୱିତୀୟ ଟେଷ୍ଟ ଜିତିବା ସହିତ ବିଶ୍ୱ ଟେଷ୍ଟ ଚାମ୍ପିୟନଶିପ୍(ଡବ୍ଲ୍ୟୁଟିସି)ଫାଇନାଲ ସମ୍ଭାବନାକୁ ଦୃଢ଼ୀଭୂତ କରିଛି ଭାରତ। ଜୁନ୍ ୭ରେ ଓଭାଲରେ ଖେଳାଯିବାକୁ ଥିବା ଏହି ମ୍ୟାଚ୍ ପାଇଁ ଅଷ୍ଟ୍ରେଲିଆ ଆଗୁଆ ଯୋଗ୍ୟତା ଅର୍ଜନ କରିଥିବା ବେଳେ ବର୍ଡର-ଗାଭାସ୍କର ଟ୍ରଫିର ପ୍ରଦର୍ଶନ ଉପରେ ଭାରତର ଭାଗ୍ୟ ନିର୍ଭର କରିଥିଲା।
ଭାରତ ଏହି ସିରିଜ୍କୁ ୩-୦ କିମ୍ବା ୩-୧ରେ ଜିତିଲେ ଫାଇନାଲରେ ପ୍ରବେଶ କରିବ। ଦିଲ୍ଲୀରେ ଅନୁଷ୍ଠିତ ଦ୍ୱିତୀୟ ଟେଷ୍ଟକୁ ଭାରତ ୩ ଦିନ ମଧ୍ୟରେ ଜିତିବା ସହିତ ୪ ମ୍ୟାଚ୍ବିଶିଷ୍ଟ ଟେଷ୍ଟ ସିରିଜରେ ୨-୦ରେ ଆଗୁଆ ରହିଛି। ଏହି ମ୍ୟାଚ୍ ଜିତିବା ପରେ ଭାରତର ବିଜୟ ପ୍ରତିଶତ ୬୪.୦୬% ରହିଥିବା ବେଳେ ଅଷ୍ଟ୍ରେଲିଆ ୬୬.୬୭% ସହ ପ୍ରଥମ ସ୍ଥାନରେ ରହିଛି। ଶ୍ରୀଲଙ୍କା ୫୩.୩୩ ପ୍ରତିଶତର ବିଜୟ ପ୍ରତିଶତ ସହିତ ତୃତୀୟ ସ୍ଥାନରେ ରହିଥିବା ବେଳେ ଫାଇନାଲ ଦୌଡ଼ରୁ ଦକ୍ଷିଣ ଆଫ୍ରିକା ବାଦ୍ ପଡ଼ିଛି। ଶ୍ରୀଲଙ୍କା ଆସନ୍ତା ମାସରେ ନ୍ୟୁଜିଲାଣ୍ଡ ବିପକ୍ଷ ଦୁଇ ମ୍ୟାଚ୍ବିଶିଷ୍ଟ ସିରିଜ ଖେଳିବ। ପରବର୍ତ୍ତୀ ଦୁଇ ଟେଷ୍ଟରେ ଭାରତର ପ୍ରଦର୍ଶନ ଉପରେ ଶ୍ରୀଲଙ୍କାର ଭାଗ୍ୟ ନିଦ୍ଧାରଣ ହେବ। ପରବର୍ତ୍ତୀ ଦୁଇଟି ଟେଷ୍ଟ ଇନ୍ଦୋର ଓ ଅହମ୍ମଦାବାଦରେ ଖେଳାଯିବ। ଏହା ମଧ୍ୟରୁ ଗୋଟିଏ ଟେଷ୍ଟ ଜିତିଲେ ଭାରତ ଫାଇନାଲରେ ପ୍ରବେଶ କରିବ।
