ନୂଆ ଦିଲ୍ଲୀ, ୨୫।୭: କରୋନା ବିିଷୟରେ ସୂଚନା ଦେବ ହାତ ବ୍ୟାଣ୍ଡ। ଆଇଆଇଟି ମାଡ୍ରାସ କରୋନା ଜୀବାଣୁ ସଂକ୍ରମଣ ଚିହ୍ନଟ ପାଇଁ ଏପରି ଏକ ବ୍ୟାଣ୍ଡ ତିଆରି କରିଛି। ଏହା ସଂକ୍ରମଣ ଆରମ୍ଭ ହେବାମାତ୍ରେ ସୂଚନା ଦେବ। ଆଗାମୀ ମାସ ସୁଦ୍ଧା ଏହା ବଜାରକୁ ଆସିବ। ଯାହାର ମୂଲ୍ୟ ମାତ୍ର ୩ହଜାର ୫ଶହ ଟଙ୍କା ରହିଛି।
ଆଇଆଇଟି ମାଡ୍ରାସର ପୂର୍ବ ଛାତ୍ରଙ୍କ ଏକ ଟିମ୍ ଏନ୍ଆଇଟି ବାରଙ୍ଗଲର ପୂର୍ବ ଛାତ୍ରଙ୍କ ସହ ମିଶି ଏହି ବ୍ୟାଣ୍ଡ ତିଆରି କରିଛନ୍ତି। ୭୦ଟି ଦେଶରେ ଏହାକୁ ଲଞ୍ଚ କରିବାକୁ ଯୋଜନା ରହିଛି। ହ୍ୟାଣ୍ଡ ଟ୍ରାକରରେ ଶରୀରର ତାପମାତ୍ରା, ହୃଦସ୍ପନ୍ଦନ ଏବଂ ଏସ୍ପିଓ ୨ ମାପିବା ପାଇଁ ସେନ୍ସର ଲାଗିଛି। ଏହା ବ୍ୟବହାରକାରୀଙ୍କ ଉପରେ ନିରନ୍ତର ନଜର ରଖିବ। ଫଳରେ ସଂକ୍ରମଣର ପ୍ରଥମ ସ୍ତରରେ ଚିହ୍ନଟ କରିବାରେ ସାହାଯ୍ୟ କରିବ। ଏହି ଟ୍ରାକର୍ ବ୍ଲୁଟୁଥ୍ ମାଧ୍ୟମରେ ଚାଲିବ। ମ୍ୟୁଜ୍ ହେଲ୍ଥ ଆପ୍ ମାଧ୍ୟମରେ ମଧ୍ୟ ମୋବାଇଲ ସହିତ ସଂଯୋଗ ହୋଇପାରିବ। ବ୍ୟବହାରକାରୀଙ୍କ ଶରୀର ଏବଂ ଅନ୍ୟାନ୍ୟ କାର୍ଯ୍ୟକଳାପ ସମ୍ବନ୍ଧୀୟ ସୂଚନା ଫୋନ୍ ଏବଂ ରିମୋଟ୍ ସର୍ଭେରେ ସଂଗୃହୀତ ହେବ। ବ୍ୟବହାରକାରୀ ଯଦି କୌଣସି ନିଷିଦ୍ଧାଞ୍ଚନ ସ୍ଥାନକୁ ଯାଆନ୍ତି ତେବେ ଆରୋଗ୍ୟ ସେତୁ ମାଧ୍ୟମରେ ସେମାନେ ସୂଚନା ପାଇପାରିବେ। ଆଇଆଇଟି ମାଡ୍ରାସର ପୂର୍ବତନ ଛାତ୍ର କେ ଏଲ୍ ଏନ୍ ସାଇ ପ୍ରଶାନ୍ତ କୁହନ୍ତି, ଚଳିତ ବର୍ଷ ୨ ଲକ୍ଷ ଉତ୍ପାଦ ବିକ୍ରି ପାଇଁ ଲକ୍ଷ୍ୟ ରଖାଯାଇଛି। ୨୦୨୦ ସୁଦ୍ଧା ୧ ବିଲିୟନ୍ ଟ୍ରାକର ବିକ୍ରି କରିବାର ଯୋଜନା ରହିଛି। ଆସନ୍ତା ଅଗଷ୍ଟ ସୁଦ୍ଧା ଏହା ୭୦ଟି ଦେଶରେ ଉପଲବ୍ଧ ହେବ। ଏହି ବ୍ୟାଣ୍ଡ ତିଆରି କରିବାର ମୂଳ ଉଦ୍ଦେଶ୍ୟ ହେଉଛି ପ୍ରଥମରୁ ରୋଗୀଙ୍କୁ ଚିହ୍ନଟ କରିବା। ଯାହା ଫଳରେ ଉପଯୁକ୍ତ ସମୟରେ ସେମାନଙ୍କ ଚିକିତ୍ସା କରାଯାଇପାରିବ ବୋଲି ଅନ୍ୟ ଜଣେ ଛାତ୍ର କହିଛନ୍ତି।
