ନୂଆଦିଲ୍ଲୀ,୧୭।୧୨: ଦିନିକିଆ ଦଳର ନେତୃତ୍ୱ ପରିବର୍ତ୍ତନ ପରେ ଟେଷ୍ଟ ଅଧିନାୟକ ବିରାଟ କୋହଲି ଓ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ମଧ୍ୟରେ ମୁହଁାମୁହିଁ ସ୍ଥିତି ସୃଷ୍ଟି ହୋଇଛି। କୋହଲି ଟି୨୦ ଦଳର ଅଧିନାୟକ ପଦ ଛାଡ଼ି ଥିବାରୁ ଦିନିକିଆ ଦଳର ନେତୃତ୍ୱ ପରିବର୍ତ୍ତନରେ ପ୍ରଶଂସକଙ୍କ କିଛି ଅସୁବିଧା ନାହିଁ। କିନ୍ତୁ ଯେଉଁଭଳି ଭାବେ କୋହଲିଙ୍କ ଠାରୁ ଦାୟିତ୍ୱ ନିଆ ଦିଆଗଲା, ତାହା ଭାରତୀୟ ଟେଷ୍ଟ ଦଳର ପ୍ରଶଂସକଙ୍କୁ ଖୁବ୍ଧ କରିଛି। ସ୍ଥିତି ଏଭଳି ଯେ, ଟୁଇଟରରେ #ଓ୍ବାଲର୍ଡଷ୍ଟାଣ୍ଡ୍ସଓ୍ବିଥ୍କୋହଲି (କୋହଲିଙ୍କ ସହ ପୂରା ଦେଶ ଛିଡ଼ା ହୋଇଛି) ଟ୍ରେଣ୍ଡ କରୁଛି। ଏହି ହାସ୍ଟ୍ୟାଗକୁ ଟ୍ୟାଗ କରି ପୂରା ବିଶ୍ୱରେ ୮୫.୪ ହଜାର ଟୁଇଟ୍ କରାଯାଇଛି।
ଏହି ହାସ୍ଟ୍ୟାଗକୁ ବ୍ୟବହାର କରି କ୍ରିକେଟ ପ୍ରଶଂସକ କୋହଲିଙ୍କୁ ସମର୍ଥନ ଜଣାଇବା ସହ ସୌରଭ ଗାଙ୍ଗୁଲିଙ୍କୁ ସମାଲୋଚନା କରୁଥିବା ଦେଖିବାକୁ ମିଳିଛି। ଜଣେ ଫ୍ୟାନ ଲେଖିଛନ୍ତି, କୋହଲିଙ୍କ ଭଳି ଟେଷ୍ଟ କ୍ୟାରିୟର ପାଇବା ପାଇଁ ଗାଙ୍ଗୁଲି କେବଳ ସ୍ବପ୍ନ ଦେଖିପାରିବେ। ସେହିଭଳି ଅନ୍ୟ ପ୍ରଶଂସକ ଲେଖିଛନ୍ତି, କିଙ୍ଗ୍ କୋହଲିଙ୍କ ଅପମାନ ଭାରତ ସହିବ ନାହିଁ।
