ଭୁବନେଶ୍ୱର,୨୧।୩(ବ୍ୟୁରୋ): ମାର୍ଚ୍ଚ ୨୦ ତାରିଖକୁ ସାରା ବିଶ୍ୱ ଘରଚଟିଆ ସୁରକ୍ଷା ଦିବସ ଭାବେ ପାଳନ କରିଛି । ଘରଚଟିଆଙ୍କ ସୁରକ୍ଷା ଏବଂ ବଂଶବୃଦ୍ଧି ପାଇଁ ଲୋକଙ୍କୁ ସଚେତନ କରିବା ହିଁ ଏହି ଦିବସର ମୂଳ ଲକ୍ଷ୍ୟ।
ଗଞ୍ଜାମ ଜିଲାର ଅଗ୍ରଣୀ ସ୍ବେଚ୍ଛାସେବୀ ଅନୁଷ୍ଠାନ ଆଞ୍ଚଳିକ ବିକାଶ ପରିଷଦର ସଭାପତି ସାଗର କୁମାର ପାତ୍ରଙ୍କ ତତ୍ତ୍ୱାବଧାନରେ ଯୁକ୍ତରାଷ୍ଟ୍ର ଆମେରିକାର ୱାଶିଂଟନ ଡି.ସି.ର ସ୍ମିଥସୋନିଆନ ଟ୍ରପିକାଲ ଗବେଷଣା ପ୍ରତିଷ୍ଠାନରେ ଏହି ଦିବସ ପାଳିତ ହୋଇଯାଇଛି l
ହସ୍ତଶିଳ୍ପ ପାଇଁ ବିଶ୍ୱ ପ୍ରସିଦ୍ଧ ଗଞ୍ଜାମ ଜିଲାର ପଦ୍ମନାଭପୁର ଗ୍ରାମ ବାସିନ୍ଦା ବୁଣାକାର ୟୁ. ନୀଳକଣ୍ଠଙ୍କ ଦ୍ୱାରା ନିର୍ମିତ ହସ୍ତିଶିଳ୍ପ ଏଥିରେ ପ୍ରଦର୍ଶିତ ହୋଇଥିଲା । ଅତିଥିମାନେ ଏଭଳି ହସ୍ତ ଶିଳ୍ପ ଦେଖି ପ୍ରଶଂସା କରିବା ସହ ଏହାର ଇତିହାସ ବିଷୟରେ ପଚାରି ବୁଝିଥିଲେ।
ବାଲୁକା ଶିଳ୍ପୀ ସତ୍ୟନାରାୟଣ ମହାରଣାଙ୍କ ଦ୍ୱାରା ଅଦରକାରୀ କାଗଜରେ ନିର୍ମିତ ଘରଚଟିଆ ପ୍ରତିକୃତିକୁ ଜୈବ ବିଜ୍ଞାନୀ କ୍ରିଷ୍ଟିନା ଆଣ୍ଡରସନ, କାର୍ଯ୍ୟକ୍ରମ ସଂଯୋଜକ ତଥା ଭର୍ଜିନିଆ ତୃଣଭୂମି ପକ୍ଷୀ ପଦକ୍ଷେପ ଅଧିକାରୀ
ଏରିନ ଶିବଲି ଏବଂ ଜଷ୍ଟିନ ପ୍ରକ୍ଟରଙ୍କୁ ପ୍ରଦାନ କରାଯାଇଥିଲା।
ଏହି ଦିବସର ମୁଖ୍ୟ ଆହ୍ବାନ ହେଉଛି ଜଳବାୟୁ ପରିବର୍ତ୍ତନ ପରିଚାଳନା ଏବଂ ଜୈବ ବିବିଧତା ସଂରକ୍ଷଣ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବରିଷ୍ଠ ସାମ୍ବାଦିକ ଭବାନୀ ଶଙ୍କର ତ୍ରିପାଠୀ, ଯୁବ ପରିବେଶବିତ ସୌମ୍ୟ ରଞ୍ଜନ ବିଶ୍ୱାଳ, ଡାକ୍ତର ହରି ପାଙ୍ଗି, ଅର୍ଚ୍ଚନା ସୋରେନ ଓ ସସ୍ମିତା ମହାପାତ୍ର ପ୍ରମୁଖ ଯୋଗଦେଇଥିଲେ। ଅନ୍ୟପକ୍ଷରେ ଏହି କାର୍ଯ୍ୟକ୍ରମ ଏପ୍ରିଲ ୧ ତାରିଖ ପର୍ଯ୍ୟନ୍ତ ଆମେରିକାରେ ଅନୁଷ୍ଠିତ ହେବ।
ସୂଚନାଯୋଗ୍ୟ, ଯୁକ୍ତରାଷ୍ଟ୍ର ଆମେରିକା ସରକାରଙ୍କ ଦ୍ୱାରା ପରିଚାଳିତ ସମ୍ମାନଜନକ ଅନ୍ତର୍ଜାତୀୟ ନେତୃତ୍ୱ ପରିଦର୍ଶକ(ଆଭିଏଲପି)କାର୍ଯ୍ୟକ୍ରମରେ ସଭାପତି ସାଗରଙ୍କ ସମେତ ବିଭିନ୍ନ ବର୍ଗରୁ ଅନ୍ୟ ୫ଜଣ ମନୋନୀତ ହୋଇ ବର୍ତ୍ତମାନ ଆମେରିକାର ବିଭିନ୍ନ ସହର ପରିଦର୍ଶନ କରୁଛନ୍ତି।
