ନୂଆଦିଲ୍ଲୀ,୩।୭: ଭାରତୀୟ ଦଳ ଟି-୨୦ ବିଶ୍ୱକପ ଟାଇଟଲ ଜିତିଛି। ଫାଇନାଲରେ ଦକ୍ଷିଣ ଆଫ୍ରିକାକୁ ପରାସ୍ତ କରି ୧୭ ବର୍ଷ ପରେ ଟିମ ଇଣ୍ଡିଆ ଟାଇଟଲ ହାସଲ କରିଛି। ଚାମ୍ପିୟନ୍ ହେବାପେରେ ଟିମ ଇଣ୍ଡିଆ ଜୁଲାଇ ୪ରେ ଭାରତରେ ପହଞ୍ଚିବ। ଟିମ ଇଣ୍ଡିଆକୁ ଦିଲ୍ଲୀ ବିମାନବନ୍ଦରରେ ସ୍ବାଗତ କରାଯିବ। ଭାରତୀୟ ଦଳର ବିଜୟ ସମଗ୍ର ଦେଶରେ ଏକ ପର୍ବ ପରି ପାଳନ କରାଯାଉଛି। ଟିମ ଇଣ୍ଡିଆର ପ୍ରଶଂସକମାନେ ଚାମ୍ପିୟନ ଖେଳାଳିଙ୍କୁ ଦେଖିବାକୁ ଅପେକ୍ଷା କରିଛନ୍ତି । ଟିମ ଇଣ୍ଡିଆ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦିଲ୍ଲୀରେ ଭେଟିବ। ଏହା ପରେ ଟିମ ଇଣ୍ଡିଆର ଖେଳାଳିମାନେ ମୁମ୍ବାଇ ଯିବେ। ସେଠାରେ ଓ୍ବାଙ୍ଖେଡେ ଷ୍ଟାଡିୟମରେ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିବେ। ଏହା ବ୍ୟତୀତ ରୋଡ ଶୋ’ ମଧ୍ୟ ଆୟୋଜିତ ହେବାର କାର୍ଯ୍ୟକ୍ରମ ରହିଛି।
ଏହି କାର୍ଯ୍ୟକ୍ରମର ଲାଇଭ ପ୍ରଶଂସକମାନେ ଦେଖିପାରିବେ। ସମସ୍ତ ପ୍ରଶଂସକଙ୍କୁ ଭାରତୀୟ ଦଳକୁ ସ୍ବାଗତ କରିବା ପାଇଁ ଦିଲ୍ଲୀ କିମ୍ବା ମୁମ୍ବାଇ ଆସିବା କଷ୍ଟସାଧ୍ୟ, କିନ୍ତୁ ବର୍ତ୍ତମାନ ସେମାନେ ନିଜ ଘରେ ବସି ଏହି ମୁହୂର୍ତ୍ତକୁ ଉପଭୋଗ କରିପାରିବେ। ଟିମ ଇଣ୍ଡିଆର ରୋଡ ଶୋ’ ଷ୍ଟାର୍ ସ୍ପୋର୍ଟସରେ ଲାଇଭ ପ୍ରଦର୍ଶିତ ହେବ। ଏହା ବ୍ୟତୀତ ପ୍ରଧାନମନ୍ତ୍ରୀଙ୍କ ବାସଭବନରେ ଖେଳାଳିଙ୍କ ସହ ପ୍ରଧାନମନ୍ତ୍ରୀଙ୍କ ଭେଟ ଟିଭିରେ ସିଧା ଦେଖାଯାଇପାରିବ। ଷ୍ଟାର୍ ସ୍ପୋର୍ଟସ ୟୁଟ୍ୟୁବ ଚ୍ୟାନେଲରେ ରୋଡ ଶୋ’ ଲାଇଭ ଦେଖିପାରିବେ।
ଭାରତୀୟ ଖେଳାଳିମାନେ ଜୁଲାଇ ୪ରେ ସକାଳ ପ୍ରାୟ ୬ଟା ସମୟରେ ଭାରତରେ ପହଞ୍ଚିବେ। ଯେଉଁଠାରେ ଭାରତୀୟ ଖେଳାଳିଙ୍କୁ ବିମାନବନ୍ଦରରେ ସ୍ବାଗତ କରାଯିବ। ଟିମ ଇଣ୍ଡିଆ ବାର୍ବାଡୋସ୍ରୁ ବିସିସିଆଇ ଦ୍ୱାରା ବୁକ ହୋଇଥିବା ଏକ ସ୍ବତନ୍ତ୍ର ଏୟାର ଇଣ୍ଡିଆ ବିମାନରେ ଯାତ୍ରା କରିଛି। ଏହି ଟିମ ଇଣ୍ଡିଆ ପରେ ଦିଲ୍ଲୀର ହୋଟେଲରେ ପହଞ୍ଚିବ। ସେଠାରୁ ସେମାନେ ଦିନ ୧୦ଟାରେ ପ୍ରଧାନମନ୍ତ୍ରୀଙ୍କ ବାସଭବନକୁ ଯିବେ। ଭାରତୀୟ ଖେଳାଳିମାନେ ସକାଳ ପ୍ରାୟ ୧୧ଟା ସମୟରେ ପ୍ରଧାନମନ୍ତ୍ରୀଙ୍କ ବାସଭବନରେ ମୋଦିଙ୍କୁ ଭେଟିବେ। ଏହା ପରେ ଦଳ ମୁମ୍ବାଇ ଅଭିମୁଖେ ଯାତ୍ରା କରିବ। ଏଠାରେ ନରିମାନ ପଏଣ୍ଟରୁ ଏକ ରୋଡ ଶୋ ହେବ ଏବଂ ପରେ ଖେଳାଳିମାନଙ୍କୁ ବିସିସିଆଇ ଦ୍ୱାରା ସମ୍ମାନିତ କରାଯିବ। ସନ୍ଧ୍ୟା ୫ଟାରେ ରୋଡ ଶୋ’ ଆୟୋଜିତ ହେବ। ଖେଳାଳିମାନଙ୍କୁ ୱାଙ୍ଖେଡେ ଷ୍ଟାଡିୟମରେ ୭ଟା ସମୟରେ ସମ୍ମାନିତ କରାଯିବ।
